ဖဲတၢ်ဆါသတြိာ်စှၤလီၤဒီး တၢ်သိးထီၣ်တၢ်ကးဘၢမဲာ် တၢ်ဘိးဘၣ်သ့ၣ်ညါ, တၢ်ဟ့ၣ်ပလီၢ်တဖၣ် စၢ်လီၤဝဲန့ၣ် တၢ်လီၢ်တနီၤ, ဒ်သိးယဖိမုၣ်အကၠိန့ၣ် လိၣ်ဘၣ်ဒံးဝဲလၢ တၢ်ကးဘၢမဲာ်အဃိ ယဘၣ်ကျဲးစၢးမၤသ့ၣ်နီၣ်ထီၣ်သးလၢ ယကဟံးဃာ်တၢ်မၤဘၢမဲာ်ဒီးယၤ ဖဲလၢယလိၣ်ဘၣ်တၢ် အကတီၢ်, ယမၤကန့ၢ်ညီအီၤအဂီၢ်န့ၣ်လီၤ. ဘၣ်တနံၤ, ယလိၣ်ဘၣ်တၢ်မၤဘၢမဲာ်ဒီး ယထံၣ်န့ၢ်အီၤ လၢယသိလ့ၣ်အပူၤ, ဒီးမ့ၢ်တၢ်မၤဘၢမဲာ်တဘ့ၣ်လၢ ယတအဲၣ်ဒိးသူအီၤ, ခီဖျိလၢ တၢ်ကတိၤ ‘တၢ်ဘၣ်ဆိၣ်ဂ့ၤ’ (BLESSED) အိၣ်ကွဲးသး လၢအလိၤအဃိန့ၣ်လီၤ.
ယအဲၣ်ဒိးသူဒၣ် တၢ်မၤဘၢမဲာ်လၢ တၢ်ကွဲးတအိၣ်နီၤတမံၤတဖၣ်, ဒီးယနာ်, တၢ်မၤဘၢမဲာ်လၢ အအိၣ်ဒီးတၢ်ကွဲးအသး, လၢယထံၣ်န့ၢ်အံၤ ဘၣ်တၢ်စူးကါအါမးလံန့ၣ်လီၤ. ဘၣ်ဆၣ် ယကဃုထၢ တၢ်အဂၤတအိၣ်ဘၣ်အဃိ, လၢတၢ်သူၣ်တဆူၣ်သးတဆူၣ်အပူၤ ယသိးထီၣ် တၢ်မၤဘၢမဲာ်န့ၣ်လီၤ. ဒီးယတၢ်သးအ့န့အံၤ ဘူးတ့ၢ်မးလၢ ယကပာ်ဖျါထီၣ်ဆူ ကၠိအၦၤတူၢ်လိာ်တၢ်အသီတဂၤန့ၣ်ဒီး, မ့ၢ်လၢယသ့ၣ်နီၣ်ထီၣ်က့ၤ လံာ်မဲာ်ဖျၢၣ်လၢ ယမး(စ)(Mask)အလိၤအဃိ ယပၢၤက့ၤ ယသးန့ၣ်လီၤ. ယတအဲၣ်ဒိးပာ်မၤယသး ဒ်ပှၤအဂ့ၤအဝါ, လၢအသိးထီၣ် တၢ်မၤဘၢမဲာ်တခါလၢ အိၣ်ဒီးတၢ်ကွဲးလံာ်မဲာ်ဖျၢၣ် “တၢ်ဘၣ်ဆိၣ်ဂ့ၤ,” မ့မ့ၢ် ယနီၢ်ကစၢ်တခီ မ့ၢ်ပှၤလၢ အပာ်ဖျါထီၣ် တၢ်သးအ့န့ဆူ ပှၤမၤတၢ်အသီတဂၤန့ၣ်ဘၣ်. ပစၢ်န့ၣ် ကျဲးစၢးဃုသ့ၣ်ညါတၢ်မၤလၢ ပှၤကနၢ်ပၢၢ်အီၤကီတမံၤန့ၣ်လီၤ.
လံာ်မဲာ်ဖျၢၣ်တဖၣ်လၢ, တၢ်မၤဘၢမဲာ်အလိၤန့ၣ် ဒုးသ့ၣ်နီၣ်ယၤလၢ ယမ့ၢ်ပှၤအုၣ်အသး လၢခရံာ်ဂီၢ် ဘၣ်ဆၣ် ယွၤကလုၢ်ကထါလၢယသးပူၤတဖၣ်န့ၣ် ကြၢးမ့ၢ်တၢ်မၤသ့ၣ်နီၣ်အမ့ၢ်အတီ ဒ်သိးယကမ့ၢ် ပှၤသးစူၤတၢ်တဂၤ ဆူၦၤဂုၤၦၤဂၤအအိၣ်န့ၣ်လီၤ. ၂ကရံၣ် ၃:၃ အပူၤ စီၤပီလူးကွဲးန့ၢ် ၦၤကရံၣ်သူးဖိတဖၣ်လၢ “သုမ့ၢ်ခရံာ်အလံာ် လၢပမၤအီၤ အိၣ်ကွဲးအသးလၢကသံၣ်ထံတမ့ၢ်ဘၣ်, မ့ၢ်လၢယွၤလၢ အမူဝဲတဂၤန့ၣ်အသး, လၢလၢၢ်ဘ့ၣ်ဘၣ်အလိၤတမ့ၢ်ဘၣ်, မ့ၢ်လၢသးအဖံးအညၣ် ဘ့ၣ်ဘၣ်အလိၤ” န့ၣ်လီၤ. အဆၢဖိ ၆ ပာ်ဖျါဝဲ (မ့မ့ၢ်သးန့ၣ်မၤမူတၢ်), ကလၤ ၅:၂၂ စံးဘၣ်ပှၤလၢ သးစီဆှံကမၤစၢၤၦၤ ဒ်သိးပကအိၣ်မူလၢ “တၢ်အဲၣ်တၢ်ကွံ, လၢတၢ်သူၣ်ခုသးခု, လၢတၢ်ဃူတၢ်ဖိး” ဒီးလၢအမ့ၢ်, “တၢ်သူၣ်စူၤသးစူၤ” သ့ဝဲဒၣ်န့ၣ်လီၤ. ပဝဲပဘၣ်ဘျုးနီၢ်နီၢ် လၢယွၤအတၢ်အိၣ်ဒီးၦၤ အဃိန့ၣ်လီၤ.
