ယလဲၤဟးဆူ ကီၢ်အၣ်ယၣ်လဲ (Ireland)န့ၣ်, ယထံၣ်ပှၤစူးကါ ရှဲ(မ)ရီး(shamrock)အမုၢ်, က့ၢ်ဂီၤ အါအါဂီၢ်ဂီၢ် လၢတၢ်ကယၢကယဲတၢ်အဂီၢ်အဃိ ကဲထီၣ်တၢ်ကမၢကမၣ်ဒိၣ်မး လၢယဂီၢ်န့ၣ်လီၤ. သ့ၣ်အမုၢ်အလါဖိ လၢအိၣ်ဒီးသ့ၣ်လၣ်သၢလၣ်ပာ်ဖှိၣ်အက့ၢ်အဂီၤအံၤန့ၣ် နထံၣ်ဘၣ်အီၤသ့ဝဲလၢ ပှၤဆါတၢ်ပှ့ၤတၢ်အလီၢ်ကိးပူၤ – လၢတၢ်ကူတၢ်သိးလိၤ, ခိၣ်သလုးလိၤ, တၢ်မၤဃံမၤလၤတၢ်ဖိတၢ်လံၤ လၢအလုၢ်ဒိၣ်ၦ့ၤဒိၣ်အလိၤ, ဒီးတၢ်အဂုၤအဂၤအါမးတဖၣ်အလိၤန့ၣ်လီၤ.
သ့ၣ်အမုၢ်တဖၣ်အံၤ မဲထီၣ်အါအါဂီၢ်ဂီၢ် လၢကီၢ်အၣ်ယၣ်လဲဒီဘ့ၣ်အပူၤဒီး တကးဒ်ဘၣ်န့ၣ်, သ့ၣ်ရှဲ(မ)ရီးအံၤ ဘၣ်တၢ်တူၢ်လိာ်ဟံးန့ၢ်အီၤ လၢပှၤတစိၤဘၣ်တစိၤ ဒ်သနူကျိၤကျဲတထံၣ် လၢတၢ်ကပာ်ဖျါ ယွၤသၢဂၤ မ့ၢ်တၢ်တဂၤဃီ ဒ်အမ့ၢ်စံၣ်စိၤနုာ်ခရံာ်ဖိအတၢ်စူၢ်တၢ်နာ် လၢအမ့ၢ် ယွၤမ့ၢ်တၢ်တမံၤဃီ လၢအအိၣ်လၢၦၤလီၤဆီသၢဂၤအပူၤလီၤစိၤ, ပၢ်ကစၢ် ဖိခွါကစၢ်, ဒီးသးစီဆှံကစၢ် န့ၣ်လီၤ. ယွၤသၢဂၤတဂၤဃီအဂ့ၢ် ၦၤကညီအတၢ်ပာ်ဖျါထီၣ်တၢ် မ့ၢ်တလၢတၦဲၤဘၣ်ဒီး, ရှဲ(မ)ရီးလၣ်န့ၣ် ကဲဘျုးလၢတၢ်ပနီၣ်ဟ့ၣ်ဒိ ခီဖျိလၢ သ့ၣ်အမုၢ်အံၤအိၣ်ကဲထီၣ်လၢ တၢ်အသံးအကာ်တမံၤဃီ လၢအိၣ်ဒီးအလၣ်တဒ်သိးသၢလၣ်အဃိန့ၣ်လီၤ.
တၢ်ကတိၤယွၤသၢဂၤတဂၤဃီအံၤ တဖျါလၢလံာ်စီဆှံအပူၤဘၣ်ဆၣ် မ့ၢ်တၢ်ပာ်ဖျါကျၢၢ်တံၢ် ထူဂ့ၢ်ယွၤဂ့ၢ်အမ့ၢ်အတီ လၢပကထံၣ်ဘၣ်ဖျိဖျိဖျါဖျါ, လၢလံာ်စီဆှံတၢ်ကွဲးတဖၣ်အပူၤ ယွၤသၢဂၤလိာ်အံၤ အိၣ်ဖျါဝဲတကတီၢ်ဃီအပူၤန့ၣ်လီၤ. မၢ်ကူး ၁:၁၁ ပာ်ဖျါထီၣ် ဖိခွါကစၢ်, ကစၢ်ယ့ၣ်ရှူး ဒိးစုၣ်ဒိးဘျၢသးအဆၢကတီၢ် ပကထံၣ်ဘၣ် သးစီဆှံကစၢ်ဟဲလီၤလၢမူခိၣ် ဒ်ထိၣ်လွံၢ် အသိး, ဒီးပကနၢ်ဟူ ပၢ်ကစၢ်အကလုၢ်သီၣ်ထီၣ်ဒီးစံးဝဲ “နမ့ၢ်ယဖိခွါ” န့ၣ်လီၤ.
ၦၤအဲရ့း(ရှ)ဖိလၢအစူၢ်က့ၤနာ်က့ၤကစၢ်ယ့ၣ်ရှူးတဖၣ် စူးကါရှဲ(မ)ရီးအလၣ်အံၤ ဒ်သိးကမၤစၢၤ ၦၤဂၤကသ့ၣ်ညါ ကစၢ်ယွၤအဂီၢ်န့ၣ်လီၤ. ဖဲပနၢ်ပၢၢ်အါထီၣ်ယွၤသၢဂၤတဂၤဃီ အတၢ်ဃံတၢ်လၤ န့ၣ်ဒီး ပတၢ်နၢ်ပၢၢ်အံၤ မၤစၢၤၦၤလၢ ပတၢ်သ့ၣ်ညါကစၢ်ယွၤ ဒီးမၤယိာ်အါထီၣ် ပဂံၢ်ပဘါ လၢပတၢ် ဘူၣ်ထီၣ်ဘါထီၣ်ယွၤ, ဒ် ယိၤ ၄:၂၄ ပာ်ဖျါဝဲအသိး “လၢသူၣ်လၢသး ဒီးတၢ်မ့ၢ်တၢ်တီ”အပူၤန့ၣ်လီၤ.
