ဖဲလါယူၤ, ၁၉၆၅ နံၣ်န့ၣ်, ပှၤတိၣ်ကၢ် (Tongan) သးစၢ်လိၣ်ဘိ ၆ ဂၤ ဒိးထီၣ်ချံ ဒီးအိၣ်ဟးထီၣ်လၢ ကီးလၢ အဝဲသ့ၣ်အိၣ်ဆိးတၢ်အလီၢ် ဒ်သိးအကဃုထံၣ်န့ၢ် တၢ်လဲၤခီဖျိအသီ လၢ အလီၤသူၣ်ဟူးသးဂဲၤတၢ်န့ၣ်လီၤ. ဘၣ်ဆၣ် တၢ်အခီၣ်ထံးတနၤန့ၣ် ကလံၤမုၢ်မၤကၢ်ကွံာ် အချံယၢ်ထူၣ်ဒီး သန့ၤလၣ် လၢအကၢၤတၢ်အဃိ တချုးတုၤဆူ ကီး အါတၢ် (island of ‘Ata) လၢပှၤတအိၣ်နီတဂၤဘၣ်န့ၣ်, အဝဲသ့ၣ် အချံလီၤထွံ အါနံၤအါသီ လၢတၢ်အီၣ်တၢ်အီဒီး ထံတအိၣ် နိတအိၣ် အပူၤန့ၣ်လီၤ. တချုးလၢ ပှၤဃုထံၣ်န့ၣ်ဘၣ် ပှၤသးစၢ်တဖၣ်အံၤန့ၣ် အဝဲသ့ၣ် ဘၣ်အိၣ်ဖဲကီးအံၤ ၁၅ လါန့ၣ်လီၤ.
ဖဲပိာ်ခွါဖိတဖၣ် အိၣ်ဆိးဝဲဒၣ်လၢ ကီးအါတၢ်အဆၢကတီၢ် ဒ်သိးအဝဲသ့ၣ် ကအိၣ်မူအိၣ်ဂဲၤဝဲအဂီၢ် ဘၣ်မၤသကိးတၢ် ဒုးအိၣ်ထီၣ် တၢ်သူၣ်တၢ်ဖျးအကျီးဖိတခါ မၤလီၤကအိဝဲ အသ့ၣ်ဖးဒိၣ်တထူၣ် ဒ်သိးကပာ်ဖှိၣ်ဃာ် မူခိၣ်ထံအဂီၢ်, ဒီးတၢ်မၤနီၢ်ခိတၢ်ဟူးတၢ်ဂဲၤအဂီၢ်ဒၣ်လဲာ် တ့ထီၣ်တၢ်သူၣ်ထီၣ်ဖိတဖျၢၣ်န့ၣ်လီၤ. ဖဲပှၤပိာ်ခွါဖိတဂၤ လီၤတဲာ်လၢ လ့ဖးထီဒီး အခီၣ်ကၢ်အဆၢကတီၢ် အတံၤသကိးတဖၣ် ဘိၣ်ဘံမၤဂ့ၤထီၣ်က့ၤ အခီၣ်လၢ သ့ၣ်ဒ့ဒီးသ့ၣ်လၣ်တဖၣ်န့ၣ်လီၤ. တၢ်ဂ့ၢ်လိာ်ဘှီလိာ်တဖၣ်န့ၣ် ဘၣ်တၢ်ရဲၣ်ကျဲၤပၢဃာ်ခီဖျိ တၢ်မၤဘၣ်လိာ်ဖိးဒ့သး အတၢ်သိၣ်တၢ်ဘျၢလၢ တၢ်ကဘၣ် ပိာ်ထွဲမၤထွဲ သပှၢ်တၢၢ်န့ၣ်လီၤ. ကိးမုၢ်ဒဲး အဝဲသ့ၣ် စးထီၣ်ဒီး မၤကတၢၢ် မုၢ်နံၤမုၢ်သီတဖၣ် လၢတၢ်သူၣ်ဝံၣ်သးဆၢဒီး တၢ်ထုကဖၣ်န့ၣ်လီၤ. ပှၤသးစၢ်တဖၣ် ဟဲက့ၤတုၤဝဲဒၣ် ဖဲလၢ အဟံၣ်ဖိဃီဖိတဖၣ် မၤဝဲ တၢ်ဆိးသီခူၣ်လီၤပှၤသံတၢ်ဘါ တၢ်ရဲၣ်တၢ်ကျဲၤဝံၤ အလီၢ်ခံအဃိ ကဲထီၣ် တၢ်ကမၢကမၣ်ဖးဒိၣ်လၢ ဒူၣ်ဖိထၢဖိတဖၣ်အဂီၢ်န့ၣ်လီၤ.
ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် လၢနံၣ်ကယၤတၢအကတီၢ်န့ၣ် ဘၣ်လဲၤခီဖျိ ကွၢ်ဆၢၣ်မဲာ်ဝဲ တၢ်အိၣ်မူအိၣ်ဂဲၤအကစၢ်ဒၣ်ဝဲန့ၣ်လီၤ. ဘၣ်တၢ်မၤအၢမၤနးလၢ အတၢ်စူၢ်တၢ်နာ်အဃိ ဘၣ်အိၣ်ယံၤဒီး အဟံၣ်ဖိဃီဖိ ဒီးလီၤဂာ်ဒံး ကဘၣ်စူးကွံာ်ညိကွံာ် အဝဲသ့ၣ်တဖၣ်န့ၣ်လီၤ. ၁ ပ့း ၄:၇ အပူၤ တၢ်မၢဖိ စီၤပ့းတရူး ဟ့ၣ်ဂံၢ်ဟ့ၣ်ဘါဝဲ ပှၤဒ်သိးအံၤတဖၣ် ကအိၣ်ဂၢၢ်ဆိးကျၢၤလၢ ပာ်သုသးသပှၢ်ပှၢ် ဒီးဆိးသီလၢတၢ်ထုကဖၣ်အဂီၢ်, အဆၢဖိ ၈ တၢ်အဲၣ်တၢ်ကွံဒိၣ်မး အိၣ်လၢသုကျါ, ဒီး အဆၢဖိ ၁၀-၁၁ အပူၤစံးဝဲ စူးကါ အတၢ်သ့တၢ်ဘၣ် တမံၤလၢ်လၢ် လၢအအိၣ်ဒီးအီၤ ဒ်သိးတၢ်မၤကဲထီၣ်အဂီၢ်န့ၣ်လီၤ. အဆၢကတီၢ်မ့ၢ်ဘၣ်ဒီး ကစၢ်ယွၤ ကဆှၢဖျိအဝဲသ့ၣ်လၢ အတၢ်နးတၢ်ဖှီၣ်တဖၣ်အပူၤ ဒီးကဟ့ၣ်ဝဲ “တၢ်ဂၢၢ်တၢ်ကျၢၤ, တၢ်ဂံၢ်တၢ်ဘါ, ဒီးတၢ်အခီၣ်ထံး လၢအဂၢၢ်အကျၢၤ”န့ၣ် ဖျါဖဲ ၁ ပ့း ၅:၁၀(ခ့ခါ) အပူၤန့ၣ်လီၤ.
လၢတၢ်မၤကွၢ်အဆၢကတီၢ်န့ၣ်, “ပှၤလၢအဘၣ်အိၣ်သယူၢ်အိၣ်လီၤဖးဒီး ပှၤတဝၢအတၢ်စူၢ်တၢ်နာ်”န့ၣ်လိၣ်ဘၣ်ဝဲဒၣ်န့ၣ်လီၤ. ပဘါထုကဖၣ်ဒီး မၤတၢ်လၢတၢ်သးတဖျၢၣ်ဃီအပူၤန့ၣ်, ဒီးကစၢ်ယွၤကဆှၢစိာ်ခီပှၤန့ၣ်လီၤ.
