မဲ(လ)ကၢၣ်ကလီး (Malcolm Cloutt), ဘၣ်တၢ်ဃုထၢမၤလၤကပီၤအီၤ လၢနီၢ်ပၤမုၣ် အဲလံးစဘဲး ခံဂၤတဂၤ (Queen Elizabeth II), ဒ်ပှၤဒိးန့ၢ်ဘၣ် ၂၀၂၁ နံၣ် “မီၤဒ့ၣ်မၢနံၤ” (Maundy Money), လၢအမ့ၢ်တၢ်ဟ့ၣ်လၤကပီၤဆူ ပှၤအဲကလံး ပိာ်မုၣ်ပိာ်ခွါတဖၣ် လၢအမၤတၢ်ဂ့ၤလၢ အပှၤတဝၢဒီး တၢ်အိၣ်ဖှိၣ်တဖၣ်အဂီၢ်န့ၣ်လီၤ. ဖဲဘၣ်တၢ်ပာ်ပနီၣ်အီၤအဆၢကပတီၢ်န့ၣ် ကလီးအသးအိၣ်ဝဲ အနံၣ်တကယၤလံန့ၣ်လီၤ. အသးသမူဒီစိၤအတီၢ်ပူၤ အဝဲဟ့ၣ်နီၤလီၤ လံာ်စီဆှံ အဘ့ၣ်တကထိအဃိ ဘၣ်တၢ်မၤလၤကပီၤအီၤန့ၣ်လီၤ. ကလီးကွဲးနီၣ်ကွဲးဃါဝဲ ပှၤလၢအဒိးန့ၢ်ဘၣ်လံာ်စီဆှံတဖၣ် ဒီးညီနုၢ်ဘါထုကဖၣ်တၢ်လၢအဝဲသ့ၣ်အဂီၢ်န့ၣ်လီၤ.

ကလီးအိၣ်မူတီဝဲလိၤဝဲဒၣ်ဒီး တၢ်ထုကဖၣ်အပူၤန့ၣ် မ့ၢ်တၢ်အဒိလၢအိၣ်ဒီးအစိအကမီၤဘၣ်ထွဲဒီး တၢ်အဲၣ်တၢ်ကွံတကလုာ်, ဒီးပကထံၣ်ဘၣ်လၢ စီၤပီလူးအတၢ်ကွဲးတဖၣ်လၢလံာ်စီဆှံအသီတကတြူၢ်အပူၤန့ၣ်လီၤ. ပှၤလၢအဒိးန့ၢ် အလံာ်ပရၢတဖၣ်အဂီၢ်န့ၣ် အဝဲဃ့ထုကဖၣ်တၢ်ထီဘိလီၤန့ၣ် စီၤပီလူးမၤဂၢၢ်မၤကျၢၤဝဲ တလီၢ်လီၢ် န့ၣ်လီၤ. ဖံၤ ၁:၄ အပူၤ ပကထံၣ်ဘၣ် အတၢ်ကွဲးဆူ အတံၤသကိးဖံၤလ့မိၣ်န့ၣ် စံးဝဲ “ယစံးထီၣ်ပတြၢၤယွၤ ဒီးသ့ၣ်နီၣ်ထီၣ်က့ၤနၤလၢ ယတၢ်ထုကဖၣ်အပူၤတဘိယူၢ်ဃီ” န့ၣ်လီၤ. ၂တံၤ ၁:၃ အပူၤ အဝဲကွဲးဝဲ အလံာ်ပရၢဆူ စီၤတံၤမသ့းအအိၣ် “ယသ့ၣ်နီၣ်ထီၣ်က့ၤနၤ တဘိယူၢ်ဃီလၢ ယတၢ်ထုကဖၣ်လၢမုၢ်ဆါဆဲးလၢမုၢ်နၤ” န့ၣ်လီၤ. ရိ ၁:၉-၁၀ အပူၤ စီၤပီလူးပာ်ဖျါအတၢ်ပာ်ဒိၣ်ဝဲဒၣ် တၢ်ထုကဖၣ်တၢ် သပှၢ်ပှၢ်လၢ ဝ့ၢ်ရိမ့ၤတၢ်အိၣ်ဖှိၣ်ဖိတဖၣ်အဂီၢ် “တထံၣ်ဃီ” န့ၣ်လီၤ.

ပမ့ၢ်တအိၣ်ဒီး ပှၤလၢပကဃ့ထုကဖၣ်တၢ် ဒ်မဲ(လ)ကၢၣ်ကလီး ထုကဖၣ်တၢ်လၢပှၤတကထိအဂီၢ်အသိးဘၣ်ဆၣ်, ပှၤလၢပသ့ၣ်ညါအီၤတဖၣ်အဂီၢ် ဖဲပပာ်သူၣ်ပာ်သးဒီးဘါထုကဖၣ်တၢ်န့ၣ်ဒီး မ့ၢ်လၢကစၢ်ယွၤစံးဆၢ ပတၢ်ထုကဖၣ်အဃိ ပတၢ်ထုကဖၣ်န့ၣ် အစိကမီၤအိၣ်ဝဲဒၣ် န့ၣ်လီၤ. ဖဲယွၤအသးမုာ်စီဆှံ ထိၣ်ဟူးထိၣ်ဂဲၤယၤဒီး ဟ့ၣ်စိဟ့ၣ်ကမီၤယၤ ဒ်သိးယကဃ့ထုကဖၣ်တၢ် လီၤလီၤဆီဆီလၢ ပှၤတဂၤဂၤအဂီၢ်န့ၣ် ယထံၣ်ဘၣ်လၢ လံာ်တၢ်ထုကဖၣ်ကွဲးနီၣ်တၢ်ဖိတဘ့ၣ်ဒၣ်လဲာ် ကဲထီၣ်တၢ်ဘျုးတၢ်ဖှိၣ်တမံၤသ့ဝဲန့ၣ်လီၤ. တၢ်နီၤလီၤပာ်လီၤ ပှၤအမံၤတဖၣ်လၢ တနံၤအဂီၢ် မ့တမ့ၢ် တနွံအဂီၢ် တၢ်ကွဲးလီၤရဲၣ်လီၤတၢ်အပူၤန့ၣ် ကဲထီၣ်တၢ်မၤစၢၤလၢယတၢ်အိၣ်မူ တီတီလိၤလိၤ ဒီးတၢ်ထုကဖၣ်န့ၣ်လီၤ. ဖဲပသ့ၣ်နီၣ်ထုကဖၣ်တၢ်လၢ ပှၤဂုၤပှၤဂၤအဂီၢ်န့ၣ် မ့ၢ်တၢ်ဃံတၢ်လၤတမံၤလၢ ပဒုးနဲၣ်ဖျါ တၢ်အဲၣ်တၢ်ကွံန့ၣ်လီၤ.