ထွံၣ်ဖိ ဝ့စတၢၣ် (Winston) န့ၣ် သ့ၣ်ညါဝဲလၢ အတဘၣ်အ့ၣ်ဟးဂီၤ ခီၣ်ဖံးတဖၣ်န့ၣ်လီၤ. လၢတၢ်န့ၣ်အဃိ, အဝဲကူၣ်ဝဲ ကျဲလၢ ကလံၣ်ကလီတၢ်အဂီၢ်န့ၣ်လီၤ. တၢ်မၤအံၤ ပကိးအီၤလၢ တၢ်မၤခူသူၣ်တၢ် (slow-walking) (တၢ်ထုးယံာ်တၢ်ဆၢကတီၢ်လၢ ပမၤတၢ်တမံၤမံၤ ဖဲလၢ ပှၤတပာ်သူၣ်ပာ်သးအကတီၢ်)န့ၣ်လီၤ. ဖဲပှၤတပာ်သူၣ်ပာ်သးအဆၢကတီၢ် ဝ့စတၢၣ် မ့ၢ်ထံၣ်ဝဲ ခီၣ်ဖံးလၢ ပှၤစူးကွံာ်အီၤတခိၣ်ခိၣ်န့ၣ်, လဲၤဝဲဆူ ခီၣ်ဖံးအဝဲန့ၣ်ဒီး ကအ့ၣ်စိာ်လဲၤတၢ်ကယီကယီဖိန့ၣ်လီၤ. ပှၤမ့ၢ်တထံၣ်ထွဲဘၣ်နီတဂၤဘၣ်န့ၣ်ဒီး ကလဲၤစိာ် ဟးထီၣ်တုၤဟံၣ်အချၢန့ၣ်လီၤ. “မိမိၢ်ဧၢ, ဝ့စတၢၣ် စိာ်ခူသူၣ် နခီၣ်ဖံးဆူ တြဲၤအချၢလံ”.
ဒ်သိးကစၢ်ယွၤတထံၣ်သ့ၣ်ညါအဂီၢ် ဘၣ်တဘျီဘျီ ပဆိကမိၣ်လၢ ပမၤခူသူၣ် ပတၢ်ဒဲးဘး ကသ့ကန့ၢ်န့ၣ်လီၤ. တၢ်လ့ပစီ ကဟဲဝဲ ဒ်သိးပဆိကမိၣ် ကစၢ်ယွၤတမ့ၢ် ကသ့ၣ်ညါဝဲဒၣ်ဘၣ်န့ၣ်လီၤ. တၢ်မၤကမၣ် တၢ်တမံၤဂ့ၤ တမံၤဂ့ၤ ပကဆိကမိၣ်လၢ တမ့ၢ်တၢ်အကါဒိၣ်ဝဲဘၣ်န့ၣ်လီၤ. ဘၣ်ဆၣ်, ဒ်ဝ့စတၢၣ်အသိး, ပတၢ်ဃုထၢမၤတၢ်တဖၣ်န့ၣ် တမ့ၢ်တၢ်ဘၣ်ယွၤအသးတဖၣ်လီၤန့ၣ် ပသ့ၣ်ညါအါန့ၢ် တၢ်န့ၣ်လီၤ.
ဒ်စီၤအၤဒၣ် ဒီးနီၢ်အံၣ်အုလၢ တၤသၣ်လီၢ်အပူၤအသိး, ၁ မိၤ ၃:၁၀ စံးဘၣ်ပှၤလၢ မ့ၢ်ပကကျဲးစၢၤ ပာ်ခူသူၣ်တၢ်ခီဖျိလၢ ပမဲာ်ဆှးလီၤက့ၤ ပသးလၢ ပတၢ်ဒဲးဘးအဃိ, မ့တမ့ၢ် ဘၣ်ဒီး ပကပာ်မၤပသး ဒ်ပတမၤတၢ်ဒဲးဘးအသိးန့ၣ်လီၤ. ဘၣ်ဆၣ် လံာ်စီဆှံ ကွဲမုာ်ပှၤလၢ ပကမၤတၢ်တမံၤလၢ အလီၤဆီဒိၣ်မး, တၢ်မၤအံၤ မ့ၢ်တၢ်ဃ့ၢ်ဆူယွၤ လၢအသးကညီၤတၢ်ဒီး ပျၢ်ပတၢ်ဒဲးဘးအအိၣ်န့ၣ်လီၤ. ကတိၤ ၂၈:၁၃ စံးဘၣ်ပှၤ, “ပှၤလၢ အကျၢၢ်ဘၢအတၢ်သရူးကမၣ်န့ၣ် တဘီၣ်ထီၣ် တညီထီၣ်ဘၣ်ဆၣ်, မ့မ့ၢ်ပှၤလၢ အတဲလီၤကျဲၤလီၤ ဒီးညိကွံာ်ဝဲန့ၣ် ကဒိးတၢ်သးကညီ”န့ၣ်လီၤ.
ဒ်သိးပှၤဂၤ တသ့ၣ်ညါအဂီၢ်, အလီၢ်တအိၣ်လၢ ပကဂုာ်ကျဲးစၢး ကျၢၢ်ဘၢ ပတၢ်ဒဲးဘးန့ၣ်ဘၣ်. ဘၣ်ဃးဒီး ပတၢ်ဃုထၢတဖၣ်အဂ့ၢ် ပမ့ၢ်စံးဘၣ်တီတီလိၤလိၤဆူ ပနီၢ်ကစၢ်ဒၣ်ဝဲ, ဆူကစၢ်ယွၤအအိၣ်ဒီး ဆူတံၤသကိးလၢ ပနာ်န့ၢ်အီၤသ့တဖၣ်န့ၣ်ဒီး ၁ ယိၤ ၁:၉ ပာ်ဖျါဝဲ “ပဃုထံၣ်န့ၢ် တၢ်ပူးဖျဲးသ့ဝဲဒၣ်လၢ တၢ်မၤကမၣ်တၢ်ဒီး တၢ်မဲာ်ဆှးဟဲခီဖျိလၢ တၢ်ဒဲးဘးလၢပဝံစိာ် လၢတၢ်ခူသူၣ်အပူၤအဃိန့ၣ်လီၤ”.
