လံာ်ပရၢဖိတဘ့ၣ် အိၣ်ဟဲလၢ ပှၤလီၤဃိာ်ဖိ ကၠ့စၢၣ်(Jason)န့ၣ် ဒုးကဲထီၣ် တၢ်ကမၢကမၣ်လၢ ယမါသးဘိဒီးယၤန့ၣ်လီၤ. ပကွၢ်လုၢ်ဒိၣ်ထီၣ် ထွံၣ်ဆံးဆံးဖိတဖၣ် ဒ်သိး ကကဲထီၣ် ထွံၣ်လၢ အမၤဂ့ၤမၤစၢၤပှၤ နီၢ်ခိက့ၢ်ဂီၤတလၢတပှဲၤတဖၣ်အဂီၢ်န့ၣ်လီၤ. ထွံၣ်ဖိတဖၣ်အကျါတဒုန့ၣ် တၢ်သိၣ်လိနဲၣ်ယုၤအီၤ တၢ်လၢခံတပတီၢ် ဒီးဘၣ်တၢ်သိၣ်လိနဲၣ်လိအီၤလၢ ပှၤလီၤဃိာ်ဖိတဖၣ် လၢအသ့ၣ်ညါမၤလိဘၣ် တၢ်သိၣ်လိနဲၣ်ယုၤ ထွံၣ်ဖိတဖၣ်န့ၣ်လီၤ. ကၠ့စၢၣ်အလံာ်ပရၢဖိ ပာ်ဖျါဝဲ, အတၢ်သူၣ်အုးသးအုးဝဲဒၣ်လၢ အတၢ်အိၣ်မူအပူၤကွံာ်အဂီၢ်, ဝံၤန့ၣ်ဒီးစံးဝဲ “စနံးခၢၣ်(Snicker) မ့ၢ်ထံၣ်တဆံနွံဒုတဒုလၢ ယဘၣ်သိၣ်လိတ့ၢ်တဖၣ်အကျါတဒု ဒီးအဝဲမ့ၢ်ထွံၣ်မိၢ်ဖိတဒုလၢ အဂ့ၤကတၢၢ်တဒုန့ၣ်လီၤ. ဖဲယထံၣ်ဘၣ်အကွၢ်ထီၣ်တၢ်ဆူ ယအိၣ်န့ၣ်, ယသးကလၢၢ်ဘၣ် ဒ်သိး, အကတၢၢ်န့ၣ် ယမၤဘၣ်တၢ်လၢ အဘၣ်တမံၤလံန့ၣ်လီၤ”.
တမ့ၢ်ထဲကၠ့စၢၣ်တဂၤဧိၤဘၣ်. ပဝဲကိးဂၤစ့ၢ်ကီး ပအိၣ်ဒီး တၢ်ပီၢ်ယၢ်လီၤက့ၤသး န့ၣ်လီၤ. ကီၢ်ယူဒၤအစီၤပၤ စီၤမနၤရှ့ၤဒၣ်လဲာ် အိၣ်ဒီး တၢ်ပီၢ်ယၢ်လီၤက့ၤသး အါမးန့ၣ်လီၤ. ၂ ကွဲး ၃၃ ပာ်ဖျါထီၣ် အတၢ်မၤအၢအၢသီသီတဖၣ်, အဆၢဖိ ၃ ပာ်ဖျါထီၣ် တၢ်ဘှီထီၣ် တၢ်လုၢ်လီၢ်တဖၣ် လၢအပာ်ဖျါထီၣ် မုၣ်-ခွါ အတၢ်ရ့လိာ်ဘၣ်ထွဲလိာ်ဖျိဖျိဖျါဖျါ လၢဘဧၤလးဒီး အရှ့ရၤအဂီၢ်, အဆၢဖိ ၆ ပာ်ဖျါ အမၤဝဲ တၢ်ဟိၣ်တၢ်လိၣ်တၢ် ဒီးလုၢ်ထီၣ်အဖိတဖၣ်လၢ မ့ၣ်အူဒီး, အဆၢဖိ ၉ စံးဘၣ်ပှၤလၢ ဆှၢထံကီၢ်ဒီတဘ့ၣ်ညါဆူကျဲလၢ အဘၣ်အၢဘၣ်သီတဘိအံၤအလိၤန့ၣ်လီၤ.
အဆၢဖိ ၁၀ ပာ်ဖျါဝဲ “ဒီးယွၤကတိၤတၢ်ဒီးစီၤမနၤရှ့ၤ, ဒီးအပှၤဂီၢ်မုၢ်, ဒီးတဒိကနၣ်ဘၣ်တၢ်ဘၣ်”န့ၣ်လီၤ. အကတၢၢ်န့ၣ် ကစၢ်ယွၤ မၤတၢ်ဒ်သိးစီၤပၤမနၤရှ့ၤ ကသ့ၣ်ညါဝဲအဂီၢ်န့ၣ်လီၤ. အဆၢဖိ ၁၁ စံးဘၣ်ပှၤ “ယွၤဒုးဟဲထီဒါအီၤလၢ အၤရှူၢ်အစီၤပၤ… မၤန့ၣ် စီၤမနၤရှ့ၤလၢတၤဆှုၣ်, ဒီးစၢဃာ်အီၤလၢထးသွဲ, ဒီးစိာ်ထီၣ်ကွံာ်အီၤဆူ ဘၤဘူလိၣ်အပူၤ” န့ၣ်လီၤ. လၢခံကတၢၢ် စီၤမနၤရှ့ မၤဝဲတၢ်လၢအဘၣ်တမံၤန့ၣ်လီၤ. အဆၢဖိ ၁၂ ပာ်ဖျါဝဲ “… ဒီးဃ့ကညးယွၤအကစၢ်, ဒီးဆီၣ်လီၤအသးဒိၣ်ဒိၣ်ကလဲာ်လၢ အပၢ်တဖၣ်အကစၢ်အမဲာ်ညါလီၤ”န့ၣ်လီၤ. ယွၤဒိကနၣ် အတၢ်ထုကဖၣ်ဒီးပာ်က့ၤအီၤလၢ စီၤပၤအလီၢ်န့ၣ်လီၤ. အဆၢဖိ ၁၅-၁၆ ပာ်ဖျါဝဲ “စီၤမနၤရှ့ၤ မၤဟးဂီၤပှၤတခီဘီမုၢ်ဖိတဖၣ် အတၢ်လုၢ်လီၢ်ဒီး တၢ်ဘါအလုၢ်အလၢ်တဖၣ် ဒီးအလီၢ်န့ၣ် မၤက့ၤယွၤအတၢ်လုၢ်လီၢ် ဒီးမၤဝဲကစၢ်လၢအမ့ၢ်အတီတဂၤ အတၢ်မၤန့ၣ်လီၤ.”
နတၢ်ပီၢ်ယၢ်လီၤက့ၤသးတဖၣ် မၤပျံၤမၤဖုးနၤလၢ ကမၤဟးဂီၤ အီၣ်လၢာ်ကွံာ်နၤလီၤဧါ. တၢ်ဆၢကတီၢ်တစဲၤခံဒံးဘၣ်. ကစၢ်ယွၤဒိကနၣ် ပတၢ်ပီၢ်ယၢ်လီၤသး အတၢ်ထုကဖၣ်လၢ ပတၢ်ဆီၣ်လီၤသးအပူၤန့ၣ်လီၤ.
