ၦၤဆါဟံၣ်အခၢၣ်စးန့ၣ် ဒုးနဲၣ်နီၢ်ဒီမိဝၤသးစၢ်ခံဂၤလၢ ဟံၣ်အဂ့ၤတဖျၢၣ် စးထီၣ်လၢဃီတရံး ပၢၢ်တုၤလီၢ်မံဒၢးဖးလဲၢ်, သ့ၣ်ဘၣ်ဒါလၢသ့ၣ်အညၣ်ကိၤဒီး ခီၣ်ယီၢ်ဒါလၢအၦ့ၤဒိၣ်, တၢ်ဆှုၣ်ကူသိးဒၢးဖးဒိၣ်ဒီး ဝဲၤဒၢးလၢတၢ်ဖံးတၢ်မၤဂီၢ် လၢဘၣ်တၢ်သုးကျဲၤဃာ် လီၤတံၢ်တဖၣ်လီၤ. တုၤမ့ၢ်အဝဲသ့ၣ်တုၤအိၣ် ဟံၣ်အနၢၣ်န့ၣ် အဝဲသ့ၣ် ပတြၢၤဟံၣ်အံၤအတၢ်ဃံလၤလီၤ. “နဃုထၢန့ၢ်ၦၤလၢ တၢ်လီၢ်အဂ့ၤကတၢၢ်လီၤ. ဟံၣ်အံၤ ကဟုကညီၢ်ဒိၣ်မးလီၤ”. ဖဲန့ၣ် ၦၤဆါဟံၣ်အခၢၣ်စးအံၤ စံးဆၢက့ၤတၢ်ကတိၤတထံၣ် လၢအလီၤဆီတစဲး ဘၣ်ဆၣ် မ့ၢ်တၢ်အမ့ၢ်အတီလၢစံးဝဲ “ယကစံးတဲဘၣ်က့ၤသုတၢ်ကတိၤ စံးဂ့ၤစံးဝါဆူ ၦၤဘှီဟံၣ်အံၤလီၤ. ၦၤလၢအသူၣ်ထီၣ်ဟံၣ်အံၤ ကြၢးဝဲ ကၢကီၣ်ဝဲဒီး တၢ်စံးထီၣ်ပတြၢၤလီၤ. တမ့ၢ် ဟံၣ်ဒၣ်ဝဲ တမ့ၢ်ၦၤလၢအဒုးနဲၣ်တၢ်တဂၤ ကြၢးဝဲဒီးတၢ်စံးပတြၢၤဘၣ်”န့ၣ်လီၤ.
ၦၤဆါဟံၣ်ခၢၣ်စးအတၢ်ကတိၤတဖၣ် မၤဖျါထီၣ်က့ၤ ၦၤကွဲးလံာ်ဧ့ၤဘြံၤအတၢ်ကွဲး လၢအစံး “ၦၤဒုးကဲထီၣ်ဟံၣ်တဂၤ ကြၢးဒိးတၢ်ယူးတၢ်ယီၣ်အါန့ၢ်ဟံၣ် တက့ၢ်လီၤ” (ဧ့ၤဘြံၤ ၃:၃) . ၦၤကွဲးလံာ်န့ၣ် ထိၣ်သတြီၤ ယ့ၣ်ရှူးအတၢ်သးတီ, ယွၤအဖိခွါ, ဃုာ်ဒီးဝံမိၤရှ့လီၤ (:၁-၆). မ့မ့ၢ် စီၤမိၤရှ့ဘၣ်ဘျုးလၢ ကတိၤဘၣ်တၢ်ဒီးကစၢ်ယွၤ မဲာ်သကိးမဲာ် ဒီးထံၣ်ဘၣ်ယွၤအက့ၢ်အဂီၤ (၄မိၤ ၁၂:၈), ဘၣ်ဆၣ် အဝဲမ့ၢ်ထဲဒၣ် “တၢ်အခ့အၦၤတဂၤ” လၢယွၤအဟံၣ်ပူၤလီၤ (ဧ့ၤဘြံၤ ၃:၅). ခရံာ်မ့ၢ်တၢ်ဒ် ၦၤလၢအတ့လီၤတၢ် (၁:၂, ၁ဝ), ကြၢးကၢကီၣ်ဝဲ တၢ်လၤကပီၤ ဒ်တၢ်ထီကတၢၢ်တဂၤအသိး “ၦၤလၢအဒုးကဲထီၣ်တၢ်ခဲလၢာ်” ဒီးဒ်ဖိခွါ “လၢယွၤအဟံၣ်အလိၤ” လီၤ(၃:၄,၆). ယွၤအဟံၣ်န့ၣ် မ့ၢ်ယွၤအၦၤဂီၢ်မုၢ်လီၤ.
ဖဲပမၤယွၤအတၢ် လၢတၢ်သးတီန့ၣ် ယ့ၣ်ရှူးမ့ၢ်တၢ်ထီကတၢၢ်တဂၤ လၢသူၣ်ထီၣ်တၢ်လၢ အကၢကီၣ်ဝဲဒီး တၢ်စံးထီၣ်ပတြၢၤလီၤ. ကယဲၢ်တၢ်စံးထီၣ်ပတြၢၤတမံၤလၢ်လၢ် လၢပဒိးန့ၢ်န့ၣ် မ့ၢ်ဒၣ်ယွၤအတၢ်လီၤ.
