တၢ်မနုၤတမံၤမး ကထုးထီၣ်ကွံာ် အၣ်ကးၡ် (Aakash) လၢ အတၢ်သူၣ်အုးသးအုး, အတၢ် သးဟးဂီၤဒိၣ်ဒိၣ်ယိာ်ယိာ်အပူၤ တန့ၢ်ဘၣ်န့ၣ်လီၤ. ခီဖျိလၢ သိလ့ၣ် ဘၣ်တိၢ်လိာ်သးအဃိ အဝဲဘၣ်ဒိဘၣ်ထံးနးနးကလဲာ် ဒီးဘၣ်တၢ်လဲၤစိာ်အီၤဆူ မ့းရှၢၣ်နရံၣ်အတၢ်ဆါဟံၣ်, အိၣ်လၢ အ့ရှၢၣ်အမုၢ်နုာ်ကလံၤထံးတကပၤန့ၣ်လီၤ. ဒ်သိးအဃံတဖၣ် ကဘၣ်တၢ်မၤဂ့ၤထီၣ်အဂီၢ် ဘၣ်တၢ်ကွဲးကါအီၤ ဃိးဘျီန့ၣ်လီၤ. မ့ၢ်လၢ အသးဟးဂီၤနးနးဖှီၣ်ဖှီၣ်အဃိ အီၣ်တၢ်အီၣ်တၢ်အီတနုာ်လၢၤဘၣ်န့ၣ်လီၤ. အဟံၣ်ဖိဃီဖိတဖၣ် ဘၣ်သန့ၤအသးလၢအီၤ ဒီးခဲကနံၣ်အံၤ လုၢ်အီၣ်လုၢ်အီဝဲတန့ၢ်လၢၤဘၣ်အဃိ အတၢ်အိၣ်မူန့ၣ် ဒံးယံာ်ထီၣ် ဒံးခံးသူအါထီၣ်ဝဲဒၣ်န့ၣ်လီၤ.
ဘၣ်တနံၤန့ၣ် ပှၤသးမှံၤတဂၤဖးန့ၢ်ဝဲ လံာ်စီဆှံတတီၤလၢ လံာ်ယိၤဟၣ်အပူၤ လၢကျိာ်တၢ်ကတိၤ ဒ်သိး အၣ်ကး(ရှ) ကနၢ်ပၢၢ်ဝဲဒီး ဃ့ထုကဖၣ်တၢ်လၢအဂီၢ်န့ၣ်လီၤ. တၢ်မုၢ်လၢ်တၢ်လၢ ယွၤအတၢ်ဟ့ၣ်ကလီပှၤ တၢ်ပျၢ်တၢ်ဒဲးဘးဒီး တၢ်အုၣ်က့ၤခီၣ်က့ၤ ပှၤဟဲခီဖျိလၢ ယ့ၣ်ရှူးအဂ့ၢ်န့ၣ် ထိးဘၣ်အသးအဃိ အၣ်ကး(ရှ) စူၢ်က့ၤနာ်က့ၤ ယ့ၣ်ရှူးန့ၣ်လီၤ. အတၢ်သူၣ်ဟးဂီၤသးဟးဂီၤတဖၣ်စ့ၢ်ကီး တယံာ်ဘၣ်န့ၣ် လီၤမၢ်ကွံာ်ဝဲဒၣ်န့ၣ်လီၤ. ဖဲအဝဲက့ၤတုၤဟံၣ်န့ၣ်, အခီၣ်ထံးန့ၣ် အၣ်ကး(ရှ) ပျံၤဝဲဒၣ်လၢ ကဘၣ်စံးကတိၤ ပာ်ဖျါထီၣ် တၢ်စူၢ်တၢ်နာ်အသီအဂ့ၢ်လၢ အဃုဒိးန့ၢ်ဝဲဒၣ်န့ၣ်လီၤ. ဒ်လဲၣ်ဂ့ၤ, ဒ်လဲၣ်ဂ့ၤ, အကတၢၢ်န့ၣ် အဝဲစံးကတိၤပာ်ဖျါထီၣ် ယ့ၣ်ရှူးအဂ့ၢ်ဒီး အဟံၣ်ဖိဃီဖိအကျါဃုဂၤစ့ၢ်ကီး စူၢ်က့ၤနာ်က့ၤ ယ့ၣ်ရှူးန့ၣ်လီၤ.
စီၤယိၤဟၣ်အလံာ်တၢ်သးခုကစီၣ်န့ၣ် မ့ၢ်တၢ်ကပီၤလၢအကဒုးနဲၣ် ဟီၣ်ခိၣ်ချၢလၢ အခံးသူအံၤအဂီၢ်န့ၣ်လီၤ. ယိၤ ၃:၁၆ အပူၤ ပကဖးဘၣ် “ကယဲၢ်ပှၤလၢ အစူၢ်က့ၤနာ်ကၤအီၤ (ယ့ၣ်ရှူး) တဂၤလၢ်လၢ်န့ၣ် အသုတဟးဂီၤတဂၤ ဒီးကန့ၢ်ဘၣ် တၢ်မူအထူအယိာ်”န့ၣ်လီၤ. ယိၤ ၅:၂၄ အပူၤ ပကထံၣ်ဘၣ် “ပှၤလၢအနၢ်ဟူ ယကလုၢ်ယကထါ, ဒီးစူၢ်က့ၤနာ်က့ၤပှၤလၢ အမၢလီၤယၤန့ၣ် အိၣ်ဒီး တၢ်မူလီၤထူလီၤယိာ်”န့ၣ်လီၤ. ယိၤ ၆:၃၅ အပူၤ ပကနၢ်ဟူ ယ့ၣ်ရှူးစံးဘၣ်ပှၤ “ယဲဒၣ် ယမ့ၢ်ကိၢ်မူန့ၣ်လီၤ. ပှၤလၢအဟဲဆူ ယအိၣ်န့ၣ် တၢ်တသၣ်ဝံၤလၢၤဘၣ် အသးဘၣ်” န့ၣ်လီၤ. တၢ်လၢအမ့ၢ်ဝဲအတီဝဲန့ၣ် ယိၤ ၃:၂၁ ပာ်ဖျါဝဲ “မ့မ့ၢ် ပှၤလၢ အမၤတၢ်မ့ၢ်တၢ်တီန့ၣ် ဟဲဝဲဆူ တၢ်ကပီၤအအိၣ်လီၤ”န့ၣ်လီၤ.
တၢ်ကီတၢ်ခဲလၢ ပဘၣ်ကွၢ်ဆၢၣ်မဲာ်တဖၣ်န့ၣ် ကနးဝဲ, ဒိၣ်ဝဲဘၣ်ဆၣ် ယ့ၣ်ရှူးန့ၣ် ဒိၣ်န့ၢ်ဒံး တၢ်သ့ၣ်တဖၣ်န့ၣ်လီၤ. ယိၤ ၁၀:၁၀ ပာ်ဖျါထီၣ် ယ့ၣ်ရှူးအတၢ်ဟဲန့ၣ် ဒ်သိးကဟ့ၣ်ပှၤ “တၢ်မူ…တုၤတၢ်လၢတၢ်ပှဲၤတစု”န့ၣ်လီၤ. ဒ်အၣ်ကး(ရှ)အသိးန့ၣ် မ်နကစူၢ်က့ၤနာ်က့ၤ ယ့ၣ်ရှူး, လၢအမ့ၢ် ဟီၣ်ခိၣ်အတၢ်မုၢ်လၢ် ဒီးတၢ်ကပီၤလၢ ပှၤဟီၣ်ခိၣ်ဖိခဲလၢာ်အဂီၢ်န့ၣ်တက့ၢ်.
