ဒ့ဘ့းဝံၣ်လံၣ် (David Willis) အိၣ်ဝဲဒၣ်လၢ ဝီထၢစတိ(Waterstones)အလံာ်ကျး အဖီခိၣ်တကထၢ ဒီးဖဲအဟဲက့ၤဆူ တၢ်ဖီလာ်ကထၢန့ၣ် ထံၣ်ဝဲလၢ ပှၤမၤလီၤပံာ်မ့ၣ်အူတၢ်ကပီၤတဖၣ် ဒီးတြဲၤတဖၣ်ဘၣ်တၢ်ကးတံာ်ဃာ်သးလံန့ၣ်လီၤ. အဝဲအိၣ်လီၤတဲာ်တ့ၢ်ဒၣ်ထဲတဂၤ လၢလံာ်လဲၢ်ကျးအပူၤန့ၣ်လီၤ. ကဘၣ်မၤတၢ်မနုၤလဲၣ်န့ၣ် တသ့ၣ်ညါဝဲဒၣ်အဃိ အိးထီၣ်ထွံးထၢၣ်(Twitter)ဒီး ဒိလီၤလံာ်လၢ “ဝီထၢစတိဧိၤ, ယဘၣ်တၢ်ကးတံာ်ယခံလၢ နလံာ်ကျးအိၣ်ဖဲ ထရၣ်ဖီၣ်ကၢၣ် စကွဲ (Trafalgar Square)န့ၣ် အိၣ်ခံနၣ်ရံၣ်လံန့ၣ်လီၤ. ဝံသးစူၤ ဒုးဟးထီၣ်ဘၣ်ယၤတက့ၢ်” န့ၣ်လီၤ. အဝဲကွဲးလီၤ ဝံၤတယံၢ်ဘၣ်န့ၣ် ပှၤဟဲတုၤဒီး အိးထီၣ်န့ၢ်အီၤ ပဲတြီန့ၣ်လီၤ.

ဖဲပဘၣ်ကီဘၣ်ခဲအကတီၢ်, ပကဒိးန့ၢ် တၢ်မၤစၢၤအဂီၢ် ကျဲမ့ၢ်အိၣ်ဒီးဂ့ၤဝဲဒၣ်န့ၣ်လီၤ. ဖဲပဘၣ်ကွၢ်ဆၢၣ်မဲာ်ဒီး တၢ်ဂ့ၢ်ကီတဖၣ် လၢပမၤ, ပဒုးအိၣ်ထီၣ်တဖၣ် အဆၢကတီၢ်, ဝံယရှါယၤ စံးဝဲဒၣ် လၢပှၤအိၣ်ဝဲတဂၤ လၢကစံးဆၢ ပတၢ်ကိးပသူထီၣ် ဒီးဃ့တၢ်မၤစၢၤတၢ်အဂီၢ်န့ၣ်လီၤ. ယရှါ ၅၈:၁-၇ အပူၤ ဝံကွဲးပာ်ဖျါဝဲလၢ ယွၤ ပာ်တၢ်ကမၣ်လၢအပှၤဂီၢ်မုၢ်အလိၤ, မ့ၢ်လၢပှၤဂီၢ်မုၢ်တဖၣ် မၤတရီတပါ တၢ်မၤ ယွၤအတၢ်မၤ ဒီးတၢ်ဘူၣ်ထီၣ်ဘါထီၣ် ယွၤအဃိန့ၣ်လီၤ. အဝဲသ့ၣ် ဒုၣ်တၢ်အီၣ်တၢ်အီ ဒ်တၢ်ဘူၣ်ထီၣ်ဘါထီၣ် ယွၤအလုၢ်အလၢ်တမံၤဘၣ်ဆၣ် တမ့ၢ်လၢ တၢ်သူၣ်တီသးလိၤအပူၤန့ၣ်ဘၣ်. တၢ်လၢအမၤအၢမၤသီ ပှၤဖှီၣ်ဖိယာ်ဖိတဖၣ်န့ၣ် အဝဲသ့ၣ် မၤဘၢ, မၤဟါမၢ်ဝဲလၢ တၢ်ဘူၣ်တၢ်ဘါလုၢ်လၢ်လၢ တၢ်မၤကလီကလီတၢ် ဒီးတၢ်ကကဲဘျုးလၢအကစၢ် ဒၣ်ဝဲအဂီၢ်န့ၣ်လီၤ. တၢ်မၤတဖၣ်အံၤ တမ့ၢ် တၢ်ဘၣ်ယွၤအသးန့ၣ်ဘၣ်. ယရှါ ၁:၁၅ စံးဘၣ်ပှၤ ယွၤပာ်တဒၢ အမဲာ်လၢ အပှၤဂီၢ်မုၢ် ဒီးတစံးဆၢပှၤဂီၢ်မုၢ်အတၢ်ထုကဖၣ်န့ၣ်ဘၣ်. ယရှါ ၅၈:၆-၇ အပူၤ ယွၤစံးဘၣ် အပှၤဂီၢ်မုၢ်လၢ ကပီၢ်ယၢ်လီၤက့ၤအသးဒီး ကပာ်ဖျါထီၣ် တၢ်ကွၢ်ထွဲ ကဟူကယာ် ပှၤဂုၤပှၤဂၤန့ၣ်လီၤ ပှၤဂီၢ်မုၢ်တဖၣ် မ့ၢ်မၤတၢ်ဒ်သိးအံၤန့ၣ် ဒီးအဆၢဖိ ၉ အပူၤ ယွၤစံးဘၣ် အဝဲသ့ၣ်လၢ “နကကိးထီၣ် ဒီးယွၤကစံးဆၢတၢ်, နကဃ့တၢ်ဒီး ယွၤကစံးဝဲ ကွၢ်ကွၢ်ယၤလီၤ. နမ့ၢ်သုးကွံာ်နီၣ်ယိးဘိလၢ နကျါ, တၢ်ယူာ်ထီၣ်စုမုၢ်ဒီး ကတိၤအၢတၢ်တဖၣ်”န့ၣ်လီၤ.

မ်ပကလဲၤသကိးဆူ ပှၤဖှီၣ်ဖိယာ်ဖိတဖၣ် အအိၣ်ဒီးစံးဘၣ်အဝဲသ့ၣ်လၢ “ကွၢ်ကွၢ်ယၤလီၤ”န့ၣ်တက့ၢ်. အဂ့ၢ်ဒ်အံၤ ယွၤဒိကနၣ် ပတၢ်ကိးပသူထီၣ် တၢ်လၢ တၢ်မၤစၢၤအဂီၢ် ဒီးစံးဘၣ်ပှၤ “ကွၢ်ကွၢ်ယၤလီၤ”အဃိန့ၣ်လီၤ.