ဖဲ ၁၉၆၆ နံၣ်, လါနိၣ်ဝ့ဘၢၣ် (၄) သီန့ၣ်, ထံလုၢ်ဘၢဖးဒိၣ် လီၤဘၣ်ဖဲဝ့ၢ်ဖလီရဲး(စ)(Florence), ကီၢ်အံၤတလံၣ်(Italy), ဒီးလုၢ်ဘၢကွံာ် ကၠရီကၠံအိၣ် ဘဲၣ်စရံၣ် (Giorgio Vasari)အတၢ်ဂီၤခဲၣ် လၢအမံၤဟူသၣ်ဖျါ လၢအမ့ၢ် “ဟါတၢ်အီၣ်လၢခံကတၢၢ်-The Last Supper” လၢကပံာ်, ဒ်သိးထံဒီးသိကိၢ်တဖၣ်အဖီလာ်, ယံာ်ဝဲအါန့ၢ်တဆံခံနၣ်ရံၣ်န့ၣ်လီၤ. တၢ်ဂီၤအကသံၣ်တဖၣ် လီၤကပုာ်ဒီး အသ့ၣ်တကွီၣ်ဟးထီၣ်ဝဲဖးဒိၣ်, ဒီးပှၤအါဂၤ နာ်လၢတၢ်ဂီၤခဲၣ်အံၤ တၢ်ဘှီဂ့ၤထီၣ်က့ၤအီၤတန့ၢ်လၢၤဘၣ်န့ၣ်လီၤ. နာ်သက့,တၢ်ဂုာ်ကျဲးစၢး ဘှီဂ့ၤထီၣ်က့ၤ လၢအဃၢဒိၣ်မးဒီး ယံာ်ဝဲအနံၣ်ယဲၢ်ဆံဝံ အလီၢ်ခံန့ၣ်, ပှၤစဲၣ်နီၤတဖၣ်ဒီး ပှၤဟ့ၣ်လီၤအတၢ်ဆၢကတီၢ်ဒၣ်အတၢ်တဖၣ် မၤနၢၤတၢ်ကီတၢ်ခဲတၢ်နိးတၢ်ဘျး လၢအဒိၣ်အမုၢ်တဖၣ်ဒီး ဘှီဂ့ၤက့ၤ တၢ်ဂီၤခဲၣ်လၢ အလုၢ်ဒိၣ်ပှ့ၤဒိၣ်တဘ့ၣ်အံၤန့ၣ်လီၤ.

ဖဲပှၤဘၤဘူၤလိၣ်ဖိတဖၣ် မၤနၢၤကီၢ်အံၣ်စရ့လးအခါ, ပှၤဂီၢ်မုၢ်တဖၣ် အတၢ်မုၢ်လၢ် လီၤမၢ်ကွံာ်ဝဲ, မ့ၢ်လၢ တၢ်သံဒီး တၢ်ဟးဂူာ်ဟးဂီၤဒီးတၢ်လိၣ်ဝဲဒၣ်လၢ တၢ်ကဘှီဂ့ၤထီၣ်က့ၤတဖၣ် အိၣ်ဝးတရံးအီၤ အဃိန့ၣ်လီၤ (ကွၢ် လံာ်သးသယုၢ်တၢ် ၁). အကတီၢ်ကီခဲအံၤအခါ, ယွၤကိးဝံယဃ့းစက့လးဆူ ကစၢၢ်ကဆူးအပူၤ ဒီးဟ့ၣ်အီၤတၢ်ထံၣ်လၢညါခီ ဖဲ အဘၣ်တၢ်ဝးတရံးဃာ်အီၤဒီး တၢ်ဃံအဃ့တဖၣ်န့ၣ်လီၤ. ယွၤသံကွၢ်အီၤ “တၢ်ဃံတၢ်ကွဲအံၤ မူထီၣ်ဝဲ ဘၣ်ကသ့ဧါ”. ဒီးဝံစံးဆၢလၢ “ကစၢ်ယွၤဧၢ, နသ့ၣ်ညါနဲလီၤ” (၃၇:၃) ဖဲန့ၣ်ယွၤတဲဘၣ်အီၤလၢ အက “ကတိၤတၢ်လၢ ဝံကျိာ်လၢတၢ်ဃံတၢ်ကွဲအံၤအဖီခိၣ်” (:၄) ဒ်သိးအကမူထီၣ်အဂီၢ်လီၤ. ဝံယဃ့းစက့လးတဲဖျါက့ၤဝဲ “ဒီးလၢယကတိၤတၢ်လၢ ဝံကျိာ် အဖၢမုၢ်ဒီး, တၢ်သီၣ်ထီၣ်, ဒီးကွၢ်ကွၢ်, တၢ်ဟူးဝးအိၣ်ဝဲ, ဒီးတၢ်ဃံတဖၣ်န့ၣ် သုးဖှိၣ်အသး တဘိဒီးတဘိလီၤ” (:၇). ခီဖျိတၢ်ထံၣ်လၢညါခီအံၤန့ၣ်, ယွၤပာ်ဖျါထီၣ်တၢ်ဆူ ဝံယဃ့းစက့းလး လၢပှၤအံၣ်စရ့လးဖိတဖၣ် အတၢ်ဘှီဂ့ၤထီၣ်က့ၤတၢ်န့ၣ် ကဟဲဒၣ်ထဲလၢယွၤန့ၣ်လီၤ.

ဖဲပသးပလၢၢ်ဘၣ် ဒ်တၢ်အိၣ်လၢတၢ်အိၣ်မူအပူၤတဖၣ် ဘၣ်တၢ်မၤဟးဂီၤကွံာ်ဒီး တၢ်ဘှီဂ့ၤထီၣ်က့ၤအီၤတန့ၢ်လၢၤဘၣ်အခါ, ယွၤစံးလီၤတံၢ်ပှၤလၢ အဝဲဘှီထီၣ်က့ၤ ပတၢ်လီၤကလဲတဖၣ်သ့ဝဲန့ၣ်လီၤ. အဝဲကဟ့ၣ်ပှၤတၢ်အသါအသီ ဒီး တၢ်အိၣ်မူအသီန့ၣ်လီၤ.