“မ့ၢ်လၢပါပၢ်ဆှၢလီၤန့ၢ်ယၤ ဖီဖိတဖၣ်အဃိ ယသ့ၣ်ညါလၢ အဝဲကဟဲက့ၤဆူဟံၣ်န့ၣ်လီၤ”. တၢ်ကတိၤတဖၣ်အံၤ မ့ၢ်ဝဲ ယဒ့မုၣ်လၢ အိၣ်နွံနံၣ်ကတိၤဝဲဆူ ပမိမိၢ်, ဖဲပါပၢ်ဟါမၢ်လၢ တၢ်ဒုးဖဲလၢ တၢ်ဒုးတၢ်ယၤအဆၢကတီၢ်န့ၣ်လီၤ. တချုးပါပၢ်ဘၣ်လဲၤဆူ အမူဒါလီၤဆီန့ၣ် အဝဲကတဲာ်ကတီၤဆိဖီဖိတဖၣ် လၢယဒ့မုၣ်ဖိအတၢ်အိၣ်ဖျဲၣ်ဆၢက့ၤအမုၢ်နံၤအဂီၢ် ဒီးဖီတဖၣ် ဟဲတုၤဝဲဖဲ ပပၢ်ဟါမၢ်လၢတၢ်ဒုးအဆၢကတီၢ်န့ၣ်လီၤ. ဘၣ်ဆၣ် ယဒ့မုၢ်ဖိစံးကတိၤဝဲန့ၣ်ဘၣ်ဝဲလီၤ. ပၢ်တဂၤအံၤ ဖဲလဲၤခီဖျိတၢ်ဒုးတၢ်ယၤလၢ အလီၤဘၣ်ယိၣ်ဒိၣ်မး ဝံၤအလီၢ်ခံန့ၣ် ဟဲက့ၤတုၤဘၣ်ဝဲ ဟံၣ်သးပှၢ်တၢၢ်န့ၣ်လီၤ. နံၣ်လၢ အဆံတဖၣ် လဲၤပူၤကွံာ်ဝံၤအလီၢ်ခံ, ယဒ့မုၣ်ဖိဟံးဃာ်ဒ်ဝဲ ဖီကိဖိလၢ ပှၤဆဲးတ့ၢ်ဖီတဖၣ်, ဒ်ကမ့ၢ်တၢ်သ့ၣ်နီၣ်က့ၤလၢ တၢ်ဟံးဃာ်ဂၢၢ်ကျၢၤ တၢ်မုၢ်လၢ်ထီဘိအဂီၢ်န့ၣ်လီၤ.

ဘၣ်တဘျီဘျီ တၢ်ဟံးဃာ်ဂၢၢ်ကျၢၤတၢ်မုၢ်လၢ်န့ၣ် တမ့ၢ်တၢ်ဘီၣ်တၢ်ညီလၢ ဟီၣ်ခိၣ်တဘ့ၣ်အံၤအပူၤ လၢအအိၣ်ပှဲၤဒီးတၢ်ဟးဂီၤဒီး တၢ်ဒဲးဘးတဖၣ်န့ၣ်လီၤ. ပၢ်တဖၣ်တဟဲက့ၤဆူ ဟံၣ်ထီဘိဘၣ်. ဖိတဖၣ် အတၢ်ဆၢမုၢ်လၢ်စ့ၢ်ကီး ဘၣ်တဘျီဘျီတလၢထီၣ်ပှဲၤထီၣ်ဘၣ်. ဘၣ်ဆၣ် ကစၢ်ယွၤဟ့ၣ်ပှၤတၢ်မုၢ်လၢ်လၢ တၢ်အိၣ်အသး, မၤအသးတဖၣ်လၢ အကီခဲကတၢၢ်အပူၤန့ၣ်လီၤ. တၢ်ဒုးတၢ်ယၤအဂၤအဂ့ၢ်န့ၣ် ဝံဃဘးကူာ် စံးကတိၤဆိ ပှၤဘၤဘူၤလိၣ်ဖိအတၢ်ဟဲနုာ်လီၤ ဂုာ်န့ၢ်ဆူၣ်ကီၢ်ယူၤဒၤဖဲ ဃဘး ၁:၆ အပူၤန့ၣ်လီၤ (ကွၢ် ၂ စီၤပၤ ၂၄), ဘၣ်ဆၣ် ဃဘး ၁:၁၂-၁၃ အပူၤ ဝံမၤဂၢၢ်မၤကျၢၤဝဲလၢ ကစၢ်ယွၤန့ၣ်ဂ့ၤဝဲထီဘိန့ၣ်လီၤ. လၢတၢ်သ့ၣ်နီၣ်ထီၣ်က့ၤအပူၤကွံာ် ကစၢ်ယွၤအတၢ်သူၣ်ကညီၤသးကညီၤတၢ်လၢ အပှၤဂီၢ်မုၢ်အလိၤအဂ့ၢ်အပူၤန့ၣ် ဝံစံၣ်တဲၤတဲလီၤ လၢ ဃဘး ၃:၁၇-၁၈ အပူၤစံးဝဲ “ချၢၣ်ဒၢ မ့ၢ်တဆှိးဘၣ်ဘၣ်ဆၣ်, တၤသၣ်မ့ၢ်တအိၣ်ဘၣ် လၢစပံးမုၢ်အလိၤဘၣ်ဆၣ်, သ့ၣ်စၤယံးအသၣ် မ့ၢ်လီၤဘီ ဘၣ်ဆၣ်, တၢ်အီၣ်တၢ်အီ မ့ၢ်တအိၣ်လၢပှၢ်လၢ်ကျါဘၣ်ဆၣ်, သိဒီး မဲာ်တဲးလဲး မ့ၢ်လၢၢ်ဝဲလၢ ကရၢပူၤဘၣ်ဆၣ်, ဒီးဂီၤဘုၣ်ဂီၤဖံးမ့ၢ်တအိၣ်လၢ အလီၢ်ပူၤဘၣ်ဆၣ်ဒီး, ယကသူၣ်ပိာ် ယသးကဝးလၢ ယွၤအပူၤ, ယကသူၣ်ဖှံသးညီလၢတၢ်အုၣ်က့ၤခီၣ်က့ၤ အကစၢ်အပူၤလီၤ”န့ၣ်လီၤ.

ပှၤမဲာ်ထံနီၤဖး ဒီးထုးထီၣ်လံာ်စီဆှံအခီပညီတနီၤန့ၣ် နာ်ဝဲလၢ ဝံဃဘးကူာ်အမံၤ အခီပညီမ့ၢ် “တၢ်ဟံးဃာ်စှီဃာ်တၢ်”န့ၣ်လီၤ. လၢတၢ်ကီတၢ်ခဲတၢ်နးတၢ်ဖှီၣ်အပူၤဒၣ်လဲာ် ကစၢ်ယွၤဟံးဃာ်ဂၢၢ်ကျၢၤပှၤဒီး တပျဲပျၢ်ကွံာ်ပှၤနီတဘျီဘၣ်အဃိ ပဟံးဃာ်စှီဃာ်ကစၢ်ယွၤဒ်အမ့ၢ်ပတၢ်မုၢ်လၢ်ဒီး တၢ်သးခုအခီၣ်ထံးအသိးန့ၣ်သ့ဝဲဒၣ်လၢပဂီၢ်န့ၣ်လီၤ.