ဘၣ်တဘျီန့ၣ် ပိာ်မုၣ်တဂၤ စံးဘၣ်ယၤလၢ တၢ်ပာ်သူၣ်ပာ်သးတလီၤပလိာ်သးအဃိ အတၢ်အိၣ်ဖှိၣ် လီၤမုၢ်လီၤဖးအဂ့ၢ်န့ၣ်လီၤ. ယသံကွၢ်အီၤ“တၢ်သးတလီၤပလိာ်သး လၢတၢ်မနုၤအဂ့ၢ်န့ၣ်လဲၣ်”. ဒီးအဝဲစံးဆၢ“ဟီၣ်ခိၣ်အံၤ မ့ၢ်အဖျၢၣ်ဧါ. မ့ၢ်တၢ်အိၣ်ပၢၤ ဘံၣ်သလၣ်အသးဧါ”န့ၣ်လီၤ. စှၤလါပူၤကွံာ်ဝံၤ တၢ်ကစီၣ်တယုၢ် အိၣ်ဖျါထီၣ် လၢပှၤခရံာ်ဖိပိာ်ခွါလၢ ဖီၣ်တၢ်စုကဝဲၤတဂၤ လဲၤနုာ်လီၤဆူ ပှၤဆါတၢ်အီၣ်တၢ်အီကျးပူၤ တကီၢ်ခါ, ဒ်သိးကလဲၤမၤပူၤဖျဲး ဖိသၣ်တဖၣ်လၢ ကျးအလီၢ်ခံဒၢးအပူၤ, ဆိကမိၣ်ဝဲဒၣ်လၢ ဖိသၣ်တဖၣ်အံၤ ဘၣ်တၢ်မၤအၢမၤနးအဝဲသ့ၣ်အဃိလီၤ. ကျးအံၤန့ၣ် တၢ်လီၢ်ခံဒၢး တအိၣ်ဝဲဒၣ်ဘၣ်ဒီး ပိာ်ခွါအံၤ ဘၣ်တၢ်ဖီၣ်အီၤန့ၣ်လီၤ. တၢ်ဂ့ၢ်ခံမံၤလိာ်အံၤအပူၤ, ပှၤမၤကမၣ်တၢ် မၤဘၣ်ဝဲ တၢ်ကစီၣ်ဟဲခီဖျိလၢ အ့ထၢၣ်နဲး(internet), တၢ်ကစီၣ်လၢ ပနာ်န့ၢ်တသ့, တၢ်ကစီၣ်လၢ အတဘၣ်တတီအဃိန့ၣ်လီၤ.

ရိမ့ၤ ၁၃:၁-၇ ပာ်ဖျါဝဲ “ပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ် ဘၣ်တၢ်ကိးအီၤ ထံဖိကီၢ်ဖိလၢအဂ့ၤ ဒီးထံဖိကီၢ်ဖိအဂ့ၤတဖၣ် တရၤလီၤတၢ်ကစီၣ်လၢအကမၣ်တဖၣ်ဘၣ်.” လူၤကၣ် ၁:၁ ပာ်ဖျါဝဲ စီၤလူၤကၣ်အစိၤအဆၢကတီၢ်, ကစၢ်ယ့ၣ်ရှူးအဂ့ၢ်တဖၣ် ဘၣ်တၢ်စံးကတိၤရၤလီၤအါအါဂီၢ်ဂီၢ် ဒီးတနီၤနီၤန့ၣ် တမ့ၢ်တၢ်ဂ့ၢ်တၢ်ကျိၤအမ့ၢ်အတီဘၣ်. လၢတၢ်ဟ့ၣ်ခီဟ့ၣ်နီၤလီၤ ကယဲၢ်တၢ်လၢအနၢ်ဟူဝဲတဖၣ် ခဲလၢာ်အလီၢ်န့ၣ် တၢ်လၢအကါဒိၣ်ကတၢၢ် စီၤလူၤကၣ်ကဲထီၣ် ပှၤလူၤဃုထံသ့ၣ်ညါတၢ်အဂ့ၢ်အကျိၤ လီၤတံၢ်လီၤဆဲးဝံၤမး ကွဲးဖျါထီၣ် တၢ်တဂၤ, အဆၢဖိ ၂ ပာ်ဖျါဝဲ “အတၢ်လူၤဃုကတိၤတၢ်ဒီး ပှၤထံၣ်ဘၣ် တၢ်မၤအသးတဖၣ် လၢအနီၢ်ကစၢ်ဒၣ်ဝဲ”, အဆၢဖိ ၃ ပာ်ဖျါဝဲ “အတၢ်လူၤဃုမၤန့ၢ် တၢ်ဂ့ၢ်တၢ်ကျိၤတဖၣ်လၢ တၢ်အခီၣ်ထံးလံၤလံၤ” ဒီးကွဲးဒုးအိၣ်ထီၣ် လံာ်တၢ်သးခုကစီၣ်တဘ့ၣ် လၢအတၢ်ဃုထံၣ်န့ၢ်တၢ်တဖၣ်, ထၢနုာ်ဝဲ ပှၤအမံၤအသၣ်တဖၣ်, တၢ်ဂ့ၢ်ဒိးသန့ၤသးတဖၣ် ဒီးစံၣ်စီၤနုာ်တၢ်ဂ့ၢ်တၢ်ကျိၤတဖၣ် လၢသန့ၤထီၣ်အသးဒီး ပှၤလၢလဲၤခီဖျိထံၣ်န့ၢ်ဘၣ် တၢ်ဂ့ၢ်တၢ်ကျိၤလၢ အနီၢ်ကစၢ်ဒၣ်ဝဲန့ၣ်လီၤ. အတၢ်ပာ်ဖျါတဖၣ်န့ၣ် တမ့ၢ်တၢ်လၢ အတမၤလီၤတံၢ်တၢ် ဒီးတမ့ၢ်တၢ်ပာ်ဖျါလၢ တဂၢၢ်တကျၢၤတဖၣ်န့ၣ်ဘၣ်.”

ပမၤတၢ်ဒ်သိး စီၤလူၤကၣ်မၤသ့ဝဲဒၣ်န့ၣ်လီၤ. တၢ်ကစီၣ်လၢ အတမ့ၢ်တတီတဖၣ် မၤလီၤဖးတၢ်အိၣ်ဖှိၣ်တဖၣ် သ့ဝဲဒီးဒုးအိၣ်ထီၣ် တၢ်ဂ့ၢ်ကီလၢ သးသမူတဖၣ် အဂီၢ် သ့ဝဲအဃိ လူၤ ၁၀:၂၇ စံးဘၣ်ပှၤ “တၢ်ကွၢ်ထံ မၤလီၤတံၢ်တၢ်ဂ့ၢ်တၢ်ကျိၤန့ၣ် မ့ၢ်တၢ်အဲၣ်ပှၤလၢ ပခိၣ်ပဃၢၤအတၢ်မၤန့ၣ်လီၤ.” တၢ်ဂ့ၢ်တၢ်ကျိၤလၢ ထိၣ်ဟူးထိၣ်ဂဲၤ ပှၤသးမ့ၢ် ဟဲတုၤဆူပအိၣ်န့ၣ်ဒီး မ်ပသုတမ့ၢ် ပှၤလၢအရၤလီၤတၢ်ကစီၣ် အကမၣ်တဖၣ်အဂီၢ်, ပကမၤလီၤတံၢ်တၢ်ဂ့ၢ်တၢ်ကျိၤတဖၣ် ခီဖျိလၢပှၤအိၣ်ဒီးကံာ်စီစဲၣ်နီၤ, ပှၤလၢ ပနာ်န့ၢ်သ့တဖၣ် ဒ်သိး ပကမ့ၢ်ပှၤတဖၣ် လၢအလူၤဃုတၢ်မ့ၢ်တၢ်တီအသိးန့ၣ်လီၤ. တၢ်မၤအံၤ ကဟဲစိာ်တၢ်နာ်န့ၢ် တၢ်သးခုကစီၣ်အဂီၢ်လီၤ. လၢတၢ်ခဲလၢာ်အဖီခိၣ်န့ၣ် ယိၤဟၣ် ၁:၁၄ ပာ်ဖျါဝဲ ပဘူၣ်ထီၣ်ဘါထီၣ် ကစၢ်တဂၤလၢ အပှဲၤဒီးတၢ်မ့ၢ်တၢ်တီတဂၤန့ၣ်လီၤ.