ခၤစၣ် (Carson) မ့ၢ်ပှၤအတၢ်မၤအါထီဘိတဂၤ, အဝဲလူၤတၢ်မံၤလာ်, တခွဲညၣ်, ဒိးလ့ၣ်ယီၢ်ခီၣ်, ဒီးဒိးစက့းန့ၣ်လီၤ. အဝဲအဲၣ်မၤ ကယဲၢ်တၢ်ချၢအတၢ်မၤခဲလၢာ်လီၤ. ဘၣ်ဆၣ် အဝဲဘၣ်ဒိ ဖဲအဒိးမီထိၣ်ဆၣ်ကဲၣ် န့ၣ်လီၤ. အဝဲအနီၢ်ကစၢ်စးထီၣ်လၢအမိၢ်ပှၢ်ဒီးဆူဖီလာ်န့ၣ် ဟူးဂဲၤတန့ၢ်လၢၤဘၣ်လီၤ. တယံာ်ဘၣ်, အဝဲဒိးန့ၢ်တၢ်သးဟးဂီၤတၢ်ဆါ ဒီးတၢ်မုၢ်လၢ်ဘၣ်ဃး ခါဆူညါန့ၣ် တအိၣ်ကဲၣ်ဆိးလၢအဂီၢ်လၢၤဘၣ်. တၢ်န့ၣ်ဝံၤ, ဘၣ်တနံၤ အသကိးအကျါတဂၤ ကိးန့ၢ်အီၤဆူ တၢ်လူၤဖီၣ်တၢ်မံၤလာ်လီၤ. တစိာ်ဖိ ဖဲအခါအံၤအဂီၢ် အဝဲသးပ့ၤနီၣ်ကွံာ် အတၢ်ဆူးတၢ်ဆါ, မ့ၢ်လၢအထံၣ်ဘၣ် န့ဆၢၣ်အတၢ်ဃံလၤဝးဝးအဃၢၤ အဃိလီၤ. တၢ်လဲၤခီဖျိအံၤ ဟဲစိာ်န့ၢ်အီၤ သးအတၢ်ယါဘျါ ဒီးဒုးဆူၣ်ထီၣ်က့ၤ အဂံၢ်အဘါ လၢတၢ်မုၢ်လၢ်အသီ လၢအတၢ်အိၣ်မူအဂီၢ် – မ့ၢ်ဒ်သိးအကဟ့ၣ် တၢ်လဲၤခီဖျိဆူ ပှၤလၢ ဒ်သိးအီၤတဖၣ် ခီဖျိ “Hunt 2 Heal”, ကရၢသဘျ့ (NGO)တဖုန့ၣ်လီၤ. အဝဲစံးဝဲလၢ အတၢ်ဘၣ်ဒိန့ၣ် မ့ၢ် “တၢ်ဆိၣ်ဂ့ၤတမံၤ လၢဆီတလဲဃာ်အက့ၢ်အဂီၤ ခဲအံၤ ယဟ့ၣ်ဆၢက့ၤတၢ်လၢ ထီဘိယအဲၣ်ဒိးမၤတဖၣ်လီၤ. ယသးခုယဲလီၤ.” အဝဲအသူၣ်ဆူၣ်သးဂဲၤလၢ ကဟ့ၣ်ပှၤလၢ အနီၢ်မိၢ်ပှၢ်ဟူးဂဲၤတန့ၢ်ဒီး ကဘၣ်သုးလီၢ်သုးကျဲ ကီခဲဒိၣ်ဝဲတဖၣ်အဂီၢ် ဒီးပှၤကွၢ်ထွဲအီၤတဖၣ်အဂီၢ် တၢ်လီၢ် ဒ်သိးကထံၣ်န့ၢ်တၢ်ယါဘျါန့ၣ်လီၤ.

ဝံယရှါယၤ တဲဖျါဆိပာ်ကစၢ်တဂၤ လၢအကယါဘျါ တၢ်ဘၣ်ဒိဆါတဖၣ်အဂ့ၢ်လီၤ (ယရှါ ၆၁). အဝဲဒၣ် က “မၤဘျါက့ၤ ပှၤအသူၣ်ကၢ်သးလီၤ” ဒီး က “မၤမုာ်က့ၤပှၤလၢ အသးအုး”တဖၣ်လီၤ (:၁-၂). ဖဲယ့ၣ်ရှူးဖးဖျါထီၣ် လံာ်စီဆှံအဆၢအံၤ ဖဲအအိၣ်ဆိးအလီၢ် ဝ့ၢ်အဘူၣ်ဘျီၣ်ပူၤဝံၤန့ၣ် စံးဝဲ “တၢ်ကွဲးအသးအံၤ လၢထီၣ်ပှဲၤထီၣ် လၢသုနၢ်ပူၤ လၢမုၢ်မဆါတနံၤအံၤလီၤ” (လူၤကၣ် ၄:၂၁). ယ့ၣ်ရှူးဟဲဝဲ ဒ်သိးကအုၣ်က့ၤခီၣ်က့ၤ ပှၤဒီး မၤလၢပှဲၤက့ၤပှၤလၢ တၢ်ကိးမံၤလီၤ.

မ့ၢ်နအိၣ်ဒီး တၢ်လိၣ်ဘၣ်သးအတၢ်ယါဘျါဧါ. က့ၤဆူယ့ၣ်ရှူးအအိၣ်ဒီး အဝဲကဟ့ၣ်နၤ “တၢ်စံးထီၣ်ပတြၢၤအဆ့လၢ တၢ်သးဃၢအလီၢ်”န့ၣ်လီၤ (ရှါ ၆၁:၃).