ဟဲစၢၣ် ဖး(ချ)မဲး (Hansle Parchment)န့ၣ် တၢ်ကီတၢ်ခဲဘၣ်အီၤ ဖဲအကလဲၤပြၢတၢ်လၢ ထိၣ်ကၠိၣ် အိၣ်လဲပ့း (Tokyo Olympics) လၢတၢ်လိၣ်ကွဲ စံၣ်မံဖဲၣ်နဲၣ်(semifinal) အဂီၢ်အဆၢကတီၢ် ဒိးကမၣ်ဝဲ သိလ့ၣ်ဆူ တၢ်လီၤအဂၤအဃိ ကလဲၤတုၤဆူ တၢ်ပြၢအလီၢ်ဘၣ်ဆၢဘၣ်ကတီၢ်အဂီၢ်န့ၣ် တၢ်မုၢ်လၢ်အိၣ်ဒၣ်ဆံးကိာ်ဖိန့ၣ်လီၤ. ဘၣ်ဆၣ်ဒီး ဟဲစၢၣ် ကဘၣ်စံးဘျုးဝဲဒၣ်လၢ ထံၣ်လိာ်အသးဒီး တံၣ်ယၤနၤ စတိၣ်ကိၣ်ဘ့း(ချ) (Trijana Stojkovic) လၢအမၤစၢၤတၢ်, ပှၤမုာ်သးမၤကလီၤတၢ်တဂၤ ဒီးပိာ်မုၣ်န့ၣ် ဟ့ၣ်အီၤစ့ ဒ်သိးကလဲၤငါဒိး ထဲးကစံၣ်(taxi)အဂီၢ်န့ၣ်လီၤ. ဟဲစၢၣ်ဖး(ချ)မဲး လဲၤတုၤဘၣ်ဝဲ တၢ်ပြၢအလီၢ် လၢဘၣ်ဆၢဘၣ်ကတီၢ် ဒီးအကတၢၢ်န့ၣ် မၤနၢၤဝဲ ခိၣ်ဖးတၢ ထူကဘျၣ်လၢ မံးထၢၣ် ၁၁၀ တၢ်ဃ့ၢ်ခီတၢၣ်အတၢ်ပြၢအဂီၢ်န့ၣ်လီၤ. လၢခံန့ၣ်ဒီး အဝဲလဲၤဃုထံၣ်ဝဲ စတိၣ်ကိၣ်ဘ့း(ချ) ဒီးစံးဘျုးစံးဖှိၣ် ပိာ်မုၣ်အံၤလၢ အတၢ်သူၣ်အိၣ်သးအိၣ်တၢ်အဂီၢ်န့ၣ်လီၤ.
ဖဲလံာ်လူၤကၣ် ၁၇:၁၅-၁၆ အပူၤ ပကဖးဘၣ် ပှၤရှၤမရံလၢအလိၤတဂ့ၤတဂၤန့ၣ်, ဟဲက့ၤကဒါက့ၤဆူ ကစၢ်ယ့ၣ်ရှူးခရံာ်အအိၣ် လၢကစံးဘျုးစံးဖှိၣ်က့ၤ ကစၢ်ယ့ၣ်ရှူးအဂီၢ် မ့ၢ်လၢ အမၤဘျါက့ၤ အတၢ်ဆါအဃိန့ၣ်လီၤ. ဖဲကစၢ်ယ့ၣ်ရှူး လဲၤနုာ်ဆူ သဝီတဖျၢၣ်အပူၤ အဆၢကတီၢ်, ထံၣ်ဝဲ ပှၤအလိၤတဂ့ၤအဂၤ ၁၀ န့ၣ်လီၤ. ပှၤအလိၤတဂၤတဖၣ်အံၤခဲလၢာ် ဃ့ကညးကစၢ်ယ့ၣ်ရှူး လၢကယါဘျါအဝဲသ့ၣ်ဒီး အဝဲသ့ၣ်ဒိးန့ၢ်ဘၣ်ဝဲ ကစၢ်ယ့ၣ်ရှူးအဘျုးအဖှိၣ် ဒီးအစိအကမီၤန့ၣ်လီၤ. ပှၤအလိၤတဂ့ၤအဂၤ၁၀, ခဲလၢာ်န့ၣ် အတၢ်ဆါဘျါက့ၤဝဲအဃိ သူၣ်ခုသးခုဝဲ, ဘၣ်ဆၣ် ထဲဒၣ်ပှၤတဂၤဧိၤန့ၣ် ဟဲက့ၤကဒါက့ၤဆူ ကစၢ်ယ့ၣ်ရှူးအအိၣ် ဒ်သိးကစံးဘျုးစံးဖှိၣ်အီၤအဂီၢ်န့ၣ်လီၤ. အဆၢဖိ ၁၅-၁၆ ပာ်ဖျါဝဲ အဝဲဒၣ် “ဟဲက့ၤကဒါက့ၤ, စံးထီၣ်ပတြၢၤယွၤလၢ အကလုၢ်ဖးဒိၣ်လီၤ. ဒီးထိၣ်လီၤပှီၤအသးလၢအခီၣ်ထံး ဒီးစံးထီၣ်ပတြၢၤအဘျုးအဖှိၣ်လီၤ”န့ၣ်လီၤ.
ကိးမုၢ်နံၤဒဲးန့ၣ် ပလဲၤခီဖျိ ပလၢၢ်ဘၣ် ကစၢ်ယွၤအတၢ်ဆိၣ်ဂ့ၤတဖၣ် လၢကျဲအါကလုၢ်အါဘိန့ၣ်လီၤ. လၢတၢ်ကမၢကမၣ်အပူၤ ယွၤအတၢ်ဆိၣ်ဂ့ၤတဖၣ် ဟဲအိၣ်ထီၣ်သ့ ခီဖျိ တၢ်စံးဆၢပတၢ်ထုကဖၣ် ဘၣ်ထွဲဒီး ပတၢ်နးတၢ်ဖှီၣ်, ပတူၢ်ဘၣ်တၢ်ဆူးတၢ်ဆါ အါနံၣ်အါလါအဂီၢ်မ့ၢ်ဂ့ၤ, ပဒိးန့ၢ်ဘၣ် တၢ်မၤစၢၤ ဘၣ်ဆၢဘၣ်ကတီၢ် အဟဲခီဖျိပှၤလၢ ပတသ့ၣ်ညါတဂၤအအိၣ်မ့ၢ်ဂ့ၤန့ၣ်လီၤ. ဘၣ်တဘျီဘျီ ယွၤအတၢ်ဆိၣ်ဂ့ၤ ဟဲခီဖျိသ့ဝဲဒၣ်လၢ တၢ်မၤအသးဆှဲဆှဲဖိ ဒ်အမ့ၢ်မူခိၣ်ကလံၤသီၣ်ဂီၤအဂ့ၤလၢ ပကမၤဝံၤ ပမူဒါတၢ်မၤတဖၣ် လၢပကဘၣ်မၤအီၤလၢ ဟံၣ်အချၢ တၢ်လီၢ်ပျီတဖၣ်အဂီၢ်န့ၣ်လီၤ. ဒ်ပှၤရှၤမရံလၢ အလိၤတဂ့ၤတဂၤအသိး ပကသ့ၣ်နီၣ် စံးဘျုးက့ၤ ကစၢ်ယွၤလၢ အသူၣ်ကညီၤသးကညီၤပှၤအဃိန့ၣ်တက့ၢ်.
