လၢကီၢ်မိၢ်ပှၢ်ယူၤရ့ၡါ(Eurasian)အထံကီၢ်တဘ့ၣ် လၢအမ့ၢ် ကီၢ်ကၠီၣ်ကၠံၣ်ယၤ(Georgia)အပူၤ, ကရူၢ်ဘံၤရၣ်-ဘိၣ်ရိၤညၣ်(Krubera-Voronja)န့ၣ်, လၢဟီၣ်ခိၣ်ဖျၢၣ်အံၤ, မ့ၢ်လၢလၢၢ်လ့ကအိအပူၤတဖၣ်အါမး အကျါ မ့ၢ်တၢ်ဃုထံၣ်န့ၢ်ဘၣ်လၢလၢၢ်လ့ကအိအပူၤအယိာ်ကတၢၢ်န့ၣ်လီၤ. ပှၤဃုထံၣ် သ့ၣ်ညါတၢ်တဖု ဃုထံၣ်သ့ၣ်ညါဝဲဒၣ်လၢ တၢ်အယိာ်ဆူဟီၣ်ခိၣ်လာ်အိၣ်ဝဲ ၂,၁၉၇ မံထၢၣ် (၇,၂၀၈ ခီၣ်ယီၢ်ပ့ၣ်)န့ၣ်လီၤ. လၢဟီၣ်ခိၣ်ဒီဘ့ၣ်လၢၢ်လ့ပူၤ ဒ်သိးအံၤ အိၣ် ၄၀၀ ဃၣ်ဃၣ်ဒီး ဘၣ်တၢ်ဃုထံၣ်န့ၢ်အါထီၣ် ကိးဆၢကတီၢ်ဃုာ်ဒီးတၢ်အယိာ် အသီတဖၣ်စ့ၢ်ကီးန့ၣ်လီၤ.
ကစၢ်ယွၤ အတၢ်ဘၣ်တ့လၢ အိၣ်ခူသူၣ်အသးတဖၣ် ဘၣ်တၢ်ဒုးနဲၣ်အိၣ်ဖျါထီၣ်ရူၢ်ရူၢ် ဒီးမၤအါထီၣ် ပတၢ်သ့ၣ်ညါနၢ်ပၢၢ်တၢ် ဘၣ်ဃး ကယဲၢ်တၢ်ဘၣ်တ့တမံၤလၢ်လၢ် ဃုာ်ဒီး တၢ်ကမၢကမၣ်ဘၣ်ထွဲဒီး ကစၢ်ယွၤအတၢ်ဘၣ်တ့, အစုအတၢ်မၤတဖၣ်လၢ ဟီၣ်ခိၣ်အံၤ ဒီး ၁မိၤ၁:၂၆-၂၈ ပာ်ဖျါဝဲလၢ ပကဘၣ်မ့ၢ် ပှၤလၢအံးထွဲကွၢ်ထွဲကဟုကယၢ် တၢ်ဘၣ်တ့တဖၣ် လၢကစၢ်ယွၤအခၢၣ်စးန့ၣ်လီၤ. စံး၉၅:၁ အပူၤ ပှၤကွဲးထါစံးထီၣ်ပတြၢၤ ကွဲမုာ်ပှၤဟီၣ်ခိၣ်ဖိခဲလၢာ် “ဟဲ, သးဝံၣ်သကိးယွၤတက့ၢ်. သးခုဒီး ကိးထီၣ်သကိးယွၤ” လၢအတၢ်မၤအဒိၣ်အယိာ်တဖၣ်အဃိန့ၣ်လီၤ. အဆၢဖိ ၆ ပာ်ဖျါဝဲ “ကယဲၢ်တၢ်ကိးမံၤလၢ တၢ်ဘၣ်တ့အပူၤ-ပဃုထံၣ်တ့ၢ်လံမ့ၢ်ဂ့ၤ တထံၣ်ဒ်ဘၣ်မ့ၢ်ဂ့ၤ, အလီၢ်အိၣ်လၢပကတီၤလီၤ, ချံးလီၤသကိး ပခီၣ်ဒီး ဘူၣ်ထီၣ်ဘါထီၣ်သကိးယွၤ လၢအတ့လီၤပှၤအမဲာ်ညါ”န့ၣ်လီၤ.
ကစၢ်ယွၤ တမ့ၢ်သ့ၣ်ညါဒၣ်ထဲ နီၣ်ခိတၢ်လီၢ်တၢ်ကျဲလၢ အတၢ်ဘၣ်တ့လၢ တၢ်ဖးဒိၣ်ဖးလဲၢ်အပူၤန့ၣ်ဘၣ်. အဝဲသ့ၣ်ညါစ့ၢ်ကီး ပနီၢ်သး, တၢ်အိၣ်အသးအဂ့ၤကတၢၢ် န့ၣ်လီၤ. လၢပတၢ်အိၣ်မူအပူၤ ပကဘၣ်လဲၤခီဖျိ မုၢ်နၤတၢ်ခံးယိာ်ဒီး ဘၣ်သ့ၣ်သ့ၣ် တၢ်လီၤပျံၤလီၤဖုးအကတီၢ်လၢ အတဒ်သိးလိာ်အသးဒီး လၢၢ်လ့ကအိအပူၤလၢ ကီၢ်ကၠီၣ်ကၠ့ၣ်ယၤအပူၤန့ၣ်ဘၣ်. ပသ့ၣ်ညါလၢ ပဘၣ်ကီဘၣ်ခဲနးနးဒိၣ်ဒိၣ်အပူၤဒၣ်လဲၣ် ကစၢ်ယွၤဟံးဃာ်ပၢၤဃာ်ပှၤလၢ တၢ်ကဟုကယၢ်တၢ်အစိကမီၤလၢ အကပုာ်လုး ကဖီလီအပူၤန့ၣ်လီၤ. စံး ၉၅:၇အပူၤ ပှၤကွဲးထါပာ်ဖျါထီၣ် “ပမ့ၢ်အတၢ်အီၣ်ဆၣ်အလီၢ် အပှၤဂီၢ်မုၢ်, အစုအသိတဖုလီၤ”န့ၣ်လီၤ.
