ဖဲယဃ့ၢ်ဝဲလၢ သ့ၣ်ပှၢ်အပူၤအဆၢကတီၢ် ယလူၤကွၢ်ဃုဃ့ၢ်ဘၣ်ကျဲဖုၣ်ဒီး ဖျါဒ်ယကျဲကမၣ် ကျဲလၢယတညီနုာ် လဲၤတၢ်န့ၣ်လီၤ. လၢယသးပူၤ မ့ၢ်ယကျဲကမၣ်လံဧါအဃိ, ယသံကွၢ်ပှၤဃ့ၢ်တၢ်ဖိတဂၤ လၢအအိၣ်ဟဲဝဲဒၣ်လၢ တၢ်မဲာ်ညါ, မ့ၢ်ယပိာ်ကျဲ ဘၣ်ကစီဒီဧၣ်န့ၣ်လီၤ. အဝဲစံးဆၢ“မ့ၢ်” လၢတၢ်လီၤတံာ်အပူၤ ဒီးထံၣ်ဝဲယတၢ်သးဒ့ဒီ အဃိ, စံးကဒီးဝဲ “တဘၣ်ဘၣ်ယိၣ်တၢ်တဂ့ၤ, ယဃ့ၢ်ကျဲလၢ အကမၣ်ခဲလၢာ်ဝံၤလၢာ်လံ. ဘၣ်ဆၣ် တဘၣ်မနုၤမးဘၣ်. ကျဲခဲလၢာ် ပှၤဃ့ၢ်န့ၢ်ဝဲဒၣ်န့ၣ်လီၤ.”
တၢ်မၤအသးလၢထးအံၤန့ၣ် ပာ်ဖျါထီၣ် ယနီၢ်သးအတၢ်အိၣ်သး အကြၢးကတၢၢ် န့ၣ်လီၤ. မ့ၢ်ယအိၣ်မူအိၣ်ဂဲၤလၢ တၢ်လ့ပစီတဖၣ်အပူၤ, မ့ၢ်ယသးစဲဘူးဒီး ဟီၣ်ခိၣ်အတၢ်ထူးတၢ်တီၤအဃိ မ့ၢ်ယလဲၤကပာ်ဘၣ် ကစၢ်ယွၤ အဘျီဆံးအါလံလဲၣ်. ကစၢ်ယွၤ သ့ၣ်ညါပာ်စၢၤလၢ ယကမၤကမၣ်ကဒီးအီၤဘၣ်ဆၣ် အဝဲပျၢ်ယတၢ်ကမၣ် ကိးဘျီဒီး မၤစၢၤယၤလၢ ယကလဲၤတၢ်ဆူညါန့ၣ်လီၤ. လၢပသးသမူအတၢ်လဲၤကျဲအပူၤ အကတီၢ်ကအိၣ်ဝဲဒၣ်လၢ ပကလဲၤကမၣ်တၢ်န့ၣ် ကစၢ်ယွၤသ့ၣ်ညါဝဲဒၣ်န့ၣ်လီၤ. ဘၣ်ဆၣ် ပမ့ၢ် အၢၣ်လီၤ ပတၢ်ကမၣ်ဒီး ပျဲသးစီဆှံဆီတလဲ မၤဂ့ၤထီၣ်ပှၤန့ၣ်ဒီး ထီဘိန့ၣ် ကစၢ်ယွၤ အိၣ်ကတဲာ်ကတီၤအသး လၢကပျၢ်ပတၢ်ကမၣ်တဘျီလၢ်လၢ်န့ၣ်လီၤ.
စီၤပီလူးသ့ၣ်ညါတ့ၢ်ဝဲစ့ၢ်ကီးလၢ ပတၢ်စူၢ်တၢ်နာ်အတၢ်လဲၤကျဲအပူၤ တၢ်ကမၤအသး ဒ်သိးအံၤန့ၣ်လီၤ. အဝဲသ့ၣ်ညါ အတၢ်ဒဲးဘးလၢ အပူၤကွံာ်လီၤတံာ်လီၤဆဲး ဃုာ်ဒီးအတၢ်ဂံၢ်စၢ်ဘါစၢ်လၢ ခ့ခါအတၢ်အိၣ်မူအိၣ်ဂဲၤအဃိ, ဖံး ၃:၁၂ အပူၤ စံးဝဲ “မ့ၢ်ယလူၤတၢ် ဒ်သိးယကမၤန့ၢ်တၢ်တမံၤလၢ ခရံာ်မၤန့ၢ်ယၤလၢအဃိတမံၤ”န့ၣ်လီၤ. အဆၢဖိ ၁၃-၁၄ အပူၤ စံးကဒီးဝဲ “မ့မ့ၢ် တၢ်တမံၤဧိၤ ယမၤ, ယပာ်သးပ့ၤနီၣ်ယသးလၢတၢ်အိၣ်လၢယလီၢ်ခံ, ဒီးယယူာ်ဃီၤယသးဆူ တၢ်အိၣ်လၢယမဲာ်ညါ, -ဒီးယဃ့ၢ်သဘျိၣ်ဆူတၢ်ပနီၣ်အအိၣ်…”န့ၣ်လီၤ. လၢပတၢ်လဲၤတၢ်ဒီးကစၢ်ယွၤန့ၣ် ပကအိၣ်ဒီးတၢ်လီၤဃံၤ (ပမၤကမၣ်ဘၣ်ယွၤ) ဒီးလၢတၢ်မၤအသးအံၤအပူၤ ကစၢ်ယွၤဘှီဂ့ၤက့ၤပှၤန့ၣ်လီၤ. ဒ်ပမ့ၢ်ဖိလၢ အဘၣ်တၢ်ပျၢ် ပတၢ်ဒဲးဘးအသိး ကစၢ်ယွၤအဘျုးအဖှိၣ် ဟ့ၣ်ပှၤဂံၢ်ဘါလၢ ပကဃ့ၢ်သဘျိၣ်တၢ်ဆူ အအိၣ်န့ၣ်လီၤ.
