ဖဲလၢပမ့ၢ်ဒံး ပှၤသးစၢ်န့ၣ် ယၤဒီး ယဒီပုၢ်ဝဲၢ်မုၣ် အ့ၣ်လိာ်သးတလီၢ်လီၢ်လီၤ. ဘၣ်ဆၣ်တဘျီန့ၣ် အိၣ်ထီဝဲလၢ ယတၢ်သ့ၣ်နီၣ်အပူၤလီၤ. ဖဲပကိးဃါလိာ်သးယၢ်ခီယၢ်ခီဒီး တဲဆါလိာ် ပသးဝံၤန့ၣ် အဝဲတဲတၢ်တမံၤ ဖဲအကတီၢ်န့ၣ် လၢဖျါလၢယပျၢ်အတၢ်ကမၣ် တန့ၢ်ဘၣ်လီၤ. ယဖံပာ်သူၣ်ပာ်သးလၢ ပတၢ်သးဒိၣ်လိာ်ပသး လၢဒိၣ်ထီၣ်န့ၣ် အဝဲဒုးသ့ၣ်နီၣ်ထီၣ်ပှၤလၢ ပအိၣ်ဒီးပမူပဒါလၢ ပဘၣ်အဲၣ်လိာ်ပသးကဒဲကဒဲလီၤ. အဝဲစံး “ယွၤဟ့ၣ်နၤနဒီပုၢ်ဝဲၢ်မုၣ်ထဲတဂၤ ဒီးနကြၢးဒုးနဲၣ် တၢ်ဘျုးတၢ်ဖှိၣ်လၢ တဂၤဒီးတဂၤအဘၢၣ်စၢၤလီၤ.” ဖဲယဃ့ယွၤလၢ ကမၤပှဲၤပှၤဒီးတၢ်အဲၣ်န့ၣ် အဝဲမၤစၢၤပှၤဒ်သိး ပကအၢၣ်လီၤပသးလၢ တဂၤဒီးတဂၤ ပမၤကမၣ်ဘၣ်တၢ်ဒီး ပဘၣ်ပျၢ်လိာ်ပသး ပတၢ်ကမၣ်လီၤ.
ပဟံးဃာ် တၢ်သးခၣ်ဒီး တၢ်သးဒိၣ်န့ၣ်ညီမး, ဘၣ်ဆၣ် ကစၢ်ယွၤ သးအိၣ်လၢ ပကပလၢၢ်လီဖျိဘၣ်သးအတၢ်ဃူတၢ်ဖိး လၢအဟ့ၣ်ဝဲ ဖဲပဃ့တၢ်လၢအီၤလၢ ကမၤထူၣ်ဖျဲး ပှၤလၢ တၢ်သူၣ်ဒိၣ်သးဖျိးဒီး တၢ်သူၣ်တမံၤသးတမံၤန့ၣ်လီၤ(အ့း ၄:၃၁). လၢပကဂုာ်ဟံးဃာ် တၢ်သးပလၢၢ်ဘၣ်ဒ်န့ၣ်တဖၣ်အလီၢ်, ပကြၢးကွၢ်ထီၣ်ဆူခရံာ် ဟ့ၣ်တၢ်အဒိဘၣ်ဃး တၢ်ပျၢ်တၢ်ကမၣ်လၢ အိၣ်ဟဲဝဲလၢ တၢ်အဲၣ်ဒီးတၢ်ဘျုးတၢ်ဖှိၣ်အလီၢ်လီၤ. ဂုာ်မၤန့ၢ် “တၢ်ဝံသးစူၤလိာ်သးဒီး သူၣ်ကညီၤသးကညီၤလိာ်သး” ဒီးပျၢ်လိာ်သကိးပသး ဒ်ယွၤအိၣ်လၢခရံာ်အပူၤ ပျၢ်ပတၢ်ဒဲးဘး အသိးလီၤ (:၃၂). ဖဲပထံၣ်လၢ တၢ်သ့ပျၢ်ပှၤဂၤအတၢ်ကမၣ်အံၤ တၤပှၤန့ၣ်, မ်ပဆိကမိၣ်ထီၣ် တၢ်ဘျုးတၢ်ဖှိၣ်လၢ ခရံာ်ဟ့ၣ်ပှၤကိးမုၢ်နံၤဒဲးန့ၣ်တက့ၢ်. ပတၢ်ဂံၢ်စၢ်ဘါစၢ် ကအိၣ်ဒၣ်ဝဲအါဘျီန့ၣ် အတၢ်သူၣ်အိၣ်သးအိၣ်ပှၤ တလီၤတူာ်လီၤကာ်နီတဘျီဘၣ် (သးသယုၢ် ၃:၂၂). ယွၤမၤစၢၤပှၤလၢ ပကသုးကွံာ် တၢ်သးခၣ်လၢပသးအပူၤ, ဒီးပအိၣ်သဘျ့ဒီး ဒ်ပအိၣ်ပဆိးလၢ တၢ်မုၢ်လၢ်အပူၤန့ၣ် ပဒိးန့ၢ်အတၢ်အဲၣ်သ့ထီဘိလီၤ.
