ပှၤကွဲးထါဒီး တၢ်ဘူၣ်တၢ်ဘါအလံာ်လဲၢ်တဖၣ် လၢအမ့ၢ် ခရံးစတံနၣ် ရူၤစဲးထံၣ် (Christina Rossetti) တဂၤအံၤန့ၣ် လၢအတၢ်အိၣ်မူပူၤ ကမၤန့ၢ်တၢ်လၢအဘီၣ်အညီပူၤ တအိၣ်တၢ်နီတမံၤဘၣ်န့ၣ်လီၤ. အတၢ်အိၣ်မူပူၤ ဒီစိၤတူၢ်ဘၣ်ဝဲ တၢ်သးအုး, တၢ်သးလီၤသဘှံး ဒီးတၢ်ဆူးတၢ်ဆါအကလုာ်ကလုာ်ဒီး တၢ်ပာ်အဲၣ်တီလၢအၢၣ်လီၤ လိာ်သး ဒ်သိးကသူၣ်ထီၣ် ဟံၣ်ဖိဃီဖိအဂီၢ်န့ၣ် ဟးဂီၤကွံာ် သၢဘျီန့ၣ်လီၤ. အကတၢၢ်န့ၣ်ဘၣ်သံဝဲလၢ ခဲစၢၣ်အတၢ်ဆါန့ၣ်လီၤ.
ပှၤအံၣ်စရ့လးဖိတဖၣ် စးထီၣ်သ့ၣ်ညါဝဲ စီၤဒၤဝံး ဒ်အမ့ၢ်ပှၤလၢအမၤနၢၤတၢ်လၢ တၢ်ဒုးတၢ်ယၤသိၣ်ဒူတဂၤန့ၣ်လီၤ. ဘၣ်ဆၣ် အတၢ်အိၣ်မူဒီစိၤဘၣ်ကွၢ်ဆၢၣ်မဲာ်ဝဲဒီးတၢ်ကီတၢ်ခဲ, တၢ်နးတၢ်ဖှီၣ်တဖၣ်န့ၣ်လီၤ. ဖဲစီၤပၤစီၤဒၤဝံး ပၢတၢ်လၢခံအကတီၢ်န့ၣ် ၂ ရှမူၤ ၁၅:၁-၁၂ အပူၤ စံးဘၣ်ပှၤလၢ အဖိခွါဒၣ်ဝဲ ဒီးပှၤကူၣ်လိာ်တၢ်လၢအနာ်န့ၢ်ဝဲ ဃုာ်ဒီး ထံဖိကီၢ်ဖိအါဂၤ ဆၢထၢၣ်ထီဒါအီၤန့ၣ်လီၤ. လၢတၢ်န့ၣ်အဃိ အဆၢဖိ ၁၄,၂၄-၂၅ အပူၤ ပကထံၣ်ဘၣ် စီၤဒၤဝံး ကိးန့ၢ်ပှၤလုၢ်တၢ်အဒိၣ် စီၤအ့ဘယၤသၢ်, စီၤစၤဒိး ဒီးစိာ်ထီၣ်တလါစီဆှံ ဒီးဃ့ၢ်ဟးထီၣ်ကွံာ်လၢ ဝ့ၢ်ယရူၤရှလ့ၣ်န့ၣ်လီၤ.
စီၤအ့ဘယၤသၣ် လုၢ်ထီၣ်တၢ်လုၢ်ဆူယွၤအအိၣ်ဝံၤ ဒီးစီၤဒၤဝံးစံးဘၣ် ပှၤလုၢ်တၢ်တဖၣ် ဖဲအဆၢဖိ ၂၅ အပူၤ “က့ၤစိာ်ယွၤအတလါဆူ ဝ့ၢ်ပူၤတက့ၢ်. ယမ့ၢ်ဘၣ်ဘျုးဘၣ်ဖှိၣ်လၢ ယွၤအမဲာ်ဒီး, ကဒုးဟဲက့ၤကဒါယၤ, ဒီးကဒုးနဲၣ်ယၤလၢ အဝဲန့ၣ်, ဒီးအအိၣ်အလီၢ်လီၤ”န့ၣ်လီၤ. တၢ်မၤအသးတဖၣ် တလီၤတံၢ်ဘၣ်ဆၣ် အဆၢဖိ ၂၆ အပူၤ စီၤဒၤဝံးစံးဝဲ ယွၤမ့ၢ်စံးဒံးအံၤ တဘၣ်ဘၣ် ယသးလၢနၤဘၣ်ဒီး မ်အမၢယၤ ဖဲအဂ့ၤလၢအမဲာ်တက့ၢ်န့ၣ်လီၤ. စီၤဒၤဝံးသ့ၣ်ညါဝဲလၢ နာ်န့ၢ်ကစၢ်ယွၤသ့ဝဲဒၣ်န့ၣ်လီၤ.
ခရံးစတံနၣ် ရူၤစဲးထံၣ်စ့ၢ်ကီး နာ်န့ၢ်ယွၤအဃိဒီး အတၢ်အိၣ်မူကတၢၢ်ဝဲလၢ တၢ်မုၢ်လၢ်အပူၤန့ၣ်လီၤ. ပတၢ်အိၣ်မူအတၢ်လဲၤကျဲ ကမ့ၢ်ဒၣ်ဝဲကျဲလၢ အက့ၣ်တရံးသး ဒိၣ်ဒိၣ်မုာ်မုာ် ဒီးပဘၣ်လဲၤကီကီခဲခဲ ထီဘိဘၣ်ဆၣ် တၢ်အံၤန့ၣ် နဲၣ်ဆှၢပှၤဆူ ပာ်အိၣ်လၢမူခိၣ်ဒီး ပာ်ယွၤအစုန့ၣ် အိးထီၣ်အသးလၢကသဂၢၢ်ပှၤအဂီၢ်န့ၣ်လီၤ.
