လၢအပူၤကွံာ်နံၣ်တဖၣ်န့ၣ်, ယကဟုကယာ် ယမိၢ်လၢထီၣ်တၢ်ဆါဟံၣ်လီၤ. ယစံးဘျုးယွၤလၢအပျဲ ယမ့ၢ်ပှၤကဟုကယာ်တၢ်ဒီး ဒ်ယဃ့တ့ၢ်အီၤန့ၣ် အဝဲမၤစၢၤယၤလၢ ယတၢ်သးအုးအကတီၢ်တဖၣ်လီၤ. ယဘၣ်ဂုာ်မၤတၢ်စံးထီၣ်ပတြၢၤယွၤ ဖဲလၢယအိၣ်ဒီး တၢ်သူၣ်ဟူးသးဂဲၤအါကလုာ်ခံၣ်ခူၣ်ယၤလီၤ. ဘၣ်ဆၣ် ဖဲယမိၢ်အတၢ်သါ လၢခံကတၢၢ်ကတီၢ်န့ၣ် ယဟီၣ်လၢတၢ်ကီၤသူၣ်ပၢၤသးတန့ၢ်ဘၣ်အပူၤ ယတဲကသွံဒံႇ “ဟါလ့ၤလူယၤ”လီၤ. ဖဲယစံးထီၣ်ပတြၢၤတၢ်ဒ်န့ၣ်ကတီၢ် ယပလၢၢ်ဘၣ်လၢ ယတၢ်ကမၣ်အိၣ် တုၤလၢနံၣ်တဖၣ် လၢပိာ်ထွဲထီၣ်အခံ ဖဲယဃုကွၢ်ထံ ထါစံးထီၣ် ပတြၢၤအယုၢ် (၃ဝ) လီၤ.

လၢစီၤဒၤဝံးအထါ “တၢ်ပာ်စီဆှံတၢ်လုၢ်ဟံၣ်” (တၢ်မၤဘူၣ်အဟံၣ်)န့ၣ် အဝဲဘူၣ်ထီၣ်ဘါထီၣ်ယွၤ လၢအတၢ်တီတၢ်လိၤအဃိဒီး အတၢ်သးကညီၤအဃိလီၤ (:၁-၃). စီၤဒၤဝံးဃုထံၣ်ဝဲလၢ ယွၤမိၤဃါဃုာ်တၢ်ကီတၢ်ခဲဒီး တၢ်မုၢ်လၢ် လၢပခီဖျိဘၣ်လီၤ (:၅). အဝဲ အၢၣ်လီၤတူၢ်လိာ် တၢ်သူၣ်အုးသးအုးဒီး တၢ်သူၣ်ခုသးခုကတီၢ်, တၢ်ပလၢၢ်ဘၣ် တၢ်အိၣ်ဘံၣ်အိၣ်ဘၢဒီး တၢ်သူၣ်အုးသးကာ်အကတီၢ်တဖၣ်လီၤ (:၆-၇). အတၢ်ကိးထီၣ်လၢတၢ်မၤစၢၤအဂီၢ် အိၣ်ဖျါဃံလၤလၢအတၢ်နာ်န့ၢ်ယွၤအပူၤလီၤ (:၇-၁ဝ). အတၢ်စံးထီၣ်ပတြၢၤတဖၣ်အံၤ အိၣ်ဖျါက့ၤလၢ အတၢ်အိၣ်မူအပူၤ လၢတၢ်ဟီၣ်ကိးပသူထီၣ်ဒီး တၢ်ဂဲၤကလံၣ်, လၢတၢ်သးအုးဒီးတၢ်သးခုတဖၣ်အပူၤလီၤ (:၁၁). ဒီးဒ်တၢ်အၢၣ်လီၤ ယွၤအတၢ်ခူသူၣ် လၢအဃါဃုာ်သးလၢ တၢ်သ့တူၢ်တၢ်ဆါတဖၣ်ဒီး တၢ်ဆၢမုၢ်လၢ် ယွၤအတၢ်သးတီန့ၣ် စီၤဒၤဝံးတဲဖျါထီၣ် အတၢ်ပာ်ဒိၣ်ဒီး ဘူၣ်ထီၣ်ဘါထီၣ်ယွၤ လၢအကတၢၢ်တအိၣ်လီၤ (:၁၂).

ဒ်စီၤဒၤဝံးအသိး ပသးဝံၣ်သ့လၢ, “ယကစၢ်ဧၢ ယကစံးထီၣ်ပတြၢၤနၤ လီၤထူလီၤယိာ်လီၤ” (:၁၂). ဖဲပသးခုဂ့ၤ ပသးအုးဂ့ၤ, ယွၤမၤစၢၤပှၤ ဒ်သိးပကိးသတြီထီၣ် ပတၢ်နာ်န့ၢ်အီၤ ဒီးဆှၢပှၤဆူတၢ်ဘူၣ်ထီၣ်ဘါ ထီၣ်အီၤလၢ တၢ်သးခုအတၢ်ကိးပသူထီၣ် ဒီးတၢ်စံးထီၣ်ပတြၢၤအီၤ ပှဲၤမဲာ်ထံမဲာ်နိလီၤ.