ယဒိးန့ၢ်ဘၣ် တၢ်ကိးယၤလၢ ကွဲၤဒီနၢ်ဒီး မ့ၢ်မတၤကိးယၤလဲၣ်န့ၣ် ယတသ့ၣ်ညါဘၣ်. အါဘျီ ယပျဲ တၢ်ကိးယၤလၢ ကွဲၤဒီနၢ်န့ၣ် ယပျဲၤလဲၤဒၣ်ဆူ တၢ်ကစီၣ်ဒၢပူၤဘၣ်ဆၣ် တဘျီအံၤန့ၣ် ယစံးဆၢယကွဲၤဒီနၢ်န့ၣ်လီၤ. ပှၤကိးတၢ်တဂၤအံၤန့ၣ် ဃ့ဝံသးစူၤယၤ လၢတၢ်သညူးသၦၢ်အပူၤ ဒီးသံကွၢ်ယၤ ဒ်သိးကဟ့ၣ်နီၤလီၤဒီး စံးကတိၤသကိး လံာ်စီဆှံ အဆၢတနီၤဒီးယၤအဂီၢ် မ့ၢ်ယဟ့ၣ်အီၤ တၢ်ဆၢကတီၢ်တစိၤဖိ ကန့ၢ်ဧါန့ၣ်လီၤ. အဝဲပာ်ဖျါထီၣ်လီၣ်ဖျါ ၂၁:၃-၅ လၢ အစံးဘၣ်ပှၤ “ယွၤကထွါကွံာ် မဲာ်ထံခဲလၢာ်လၢအမဲာ်”န့ၣ်လီၤ. အဝဲစံးဘၣ်ယၤ ကစၢ်ယ့ၣ်ရှူးအဂ့ၢ်ဒီး အဝဲမ့ၢ်ပှၤလၢ ကအုၣ်ကီၤပသးသမူ ဒီးပတၢ်မုၢ်လၢ်ဒ်လဲၣ်အဂ့ၢ်န့ၣ်လီၤ. ယစံးဘၣ်အီၤ ယသ့ၣ်ညါတ့ၢ်လံလၢ ကစၢ်ယ့ၣ်ရှူးမ့ၢ် ယတၢ်အုၣ်က့ၤခီၣ်က့ၤ တၢ်ကစၢ်န့ၣ်လီၤ. ဘၣ်ပှၤကတိၤတၢ်ဒီးယၤတဂၤအံၤန့ၣ် တတိာ်ပာ်ဝဲလၢ ကအုၣ်အသးဘၣ်ဃးဒီး ကစၢ်ယ့ၣ်ရှူးအဂ့ၢ်ဒီးယၤဘၣ်. အလီၢ်န့ၣ် ဃ့ယၤ တၢ်ခွဲးလၢ ကဃ့ထုကဖၣ်သကိးဒီးယၤ အဂီၢ်န့ၣ်လီၤ. ဒီးအဝဲဃ့ထုကဖၣ်တၢ်လၢယဂီၢ်, ဒ်သိးယွၤကဟ့ၣ်ယၤလၢ တၢ်မၤဆူၣ်ထီၣ်ယသး ဒီးနီၢ်သးအတၢ်ဂံၢ်တၢ်ဘါအဂီၢ်န့ၣ်လီၤ.
တၢ်ကိးယၤလၢကွဲၤဒီနၢ်တဘျီအံၤန့ၣ် ဒုးသ့ၣ်နီၣ်ထီၣ်ယၤ “တၢ်ကိး”အဂၤတထံၣ်လၢ လံာ်စီဆှံအပူၤန့ၣ်လီၤ. ၁ရှမူၤ ၃:၄-၁၀ ပာ်ဖျါ ကစၢ်ယွၤကိးထီၣ် ပိာ်ခွါဖိသၣ် စီၤရှမူၤအ့လး လၢဖးဖီမုၢ် အကတီၢ်န့ၣ်လီၤ. စီၤရှမူၤအ့လး နၢ်ဟူဝဲ တၢ်ကိးအီၤ သၢဘျီ ဒီးဆိကမိၣ် ဝဲဒၣ် ပှၤလုၢ်တၢ်အဒိၣ် ဖုဧ့လံၤကိးအီၤန့ၣ်လီၤ. အကတၢၢ်တဘျီ, ဖဲစီၤရှမူၤအ့လး သ့ၣ်ညါဝဲလၢ ကစၢ်ယွၤကိးအီၤအဃိ, ဒ်သိးစီၤဧ့လံၤ ဟ့ၣ်ကူၣ်အီၤအသိး အဆၢဖိ ၁၀ အပူၤ စံးဆၢဝဲ “ကတိၤလၢ်တၢ်တက့ၢ်, အဂ့ၢ်ဒ်အံၤ နခ့နပှၤဒိကနၣ်တၢ်လီၤ”န့ၣ်လီၤ. ဒ်န့ၣ်အသိး, ခီဖျိလၢ ပမုၢ်နံၤဒီးမုၢ်နၤတဖၣ်အပူၤန့ၣ် ယွၤကတိၤတၢ်ဒီးပှၤအဃိ ဒီးအလီၢ်အိၣ်လၢ ပကဘၣ်ဟံးထီၣ် စံးဆၢပကွဲၤဒီနၢ်န့ၣ်လီၤ. အခီပညီမ့ၢ်ဝဲ ပကဘၣ်ဟံးန့ၢ်အါထီၣ် ပတၢ်ဆၢကတီၢ်လၢ ယွၤအမဲာ်ညါဒီး ဒိကနၣ်ယွၤအကလုၢ်အဂီၢ်န့ၣ်လီၤ.
တၢ်မၤအသးလၢခံန့ၣ် ယထံၣ်တၢ်ကိးယၤလၢကွဲၤဒီနၢ် ဒ်သိးအံၤလၢ တၢ်ထံၣ်အဂၤတမံၤန့ၣ်လီၤ. ဘၣ်တဘျီဘျီ ပမ့မ့ၢ် ပှၤစိာ်ဆှၢယွၤကလုၢ်ကထါဆူ ပှၤတဂၤဂၤအအိၣ်ဒီး တၢ်ကမၤအသးဒ်လဲၣ်. ပကပလၢၢ်ဘၣ်လၢ မ့ၢ်ပကမၤစၢၤပှၤဂၤအဂီၢ် ကျဲတအိၣ်နီၤတထံၣ်ဘၣ်န့ၣ်လီၤ. ဘၣ်ဆၣ် ဒ်ကစၢ်ယွၤဒုးနဲၣ်ပှၤအသိး ပကကိးပှၤတဂၤဂၤလၢ ပကွဲၤဒီနၢ်ဒီး စံးဘၣ်အီၤလၢ “တနံၤအံၤ, မ့ၢ်ယဃ့ဘါထုကဖၣ်လိာ်သကိးဒီးနၤကသ့ဧါ”န့ၣ်လီၤ.
