ပှၤဃုသ့ၣ်ညါမၤလိတၢ်တဖၣ်လၢ ကီၢ်ရ့ၣ်ဖၠူကၠၢၣ်(Fujian) လၢတရူးကီၢ် (China) န့ၣ် အဲၣ်ဒိးမၤစၢၤပှၤဆူးပှၤဆါ လၢအအိၣ်လၢ ICU တၢ်ကွၢ်ထွဲ လ့ၤတုာ်လ့ၤတီၤလီၤဆီအပူၤတဖၣ် ကမံဘၣ်မုာ်မုာ်အဂီၢ်လီၤ. အဝဲသ့ၣ် ဒုးအိၣ်ထီၣ် ဒၢးလၢအလီၤဂာ် ဒ် ICU, မၤပှဲၤအီၤဒီး တၢ်ဆါဟံၣ်အတၢ်ကပီၤ, ဒီးအိးထီၣ်ဃာ် စဲးဖီကဟၣ်တဖၣ် အတၢ်သီပံပံ ဒီးပှၤကွၢ်ပှၤဆါတဖၣ် ကတိၤလိာ်သးအကလုာ် လၢအဖီၣ်ဃာ်ဝဲ, ဒီးထီထီၣ် ပိးလီလၢ အမၤစၢၤတၢ်မံ လၢပှၤဒိးတၢ်မၤကွၢ်တဖၣ် (test subjects) အလိၤ, ဒီးထိၣ်ဒွးကွၢ် တၢ်အစၢတဖၣ်န့ၣ်လီၤ. အဝဲသ့ၣ် အတၢ်ဃုကွၢ်ထံ ပာ်ဖျါဝဲလၢ တၢ်အပိးအလီ ဒ်အမ့ၢ် တၢ်ကးဘၢမဲာ် ဖဲတၢ်မံအကတီၢ်(sleep masks) ဒီးတၢ်ဆွံတံာ်နၢ်ပူၤ(ear plugs)န့ၣ် မၤဂ့ၤထီၣ်ပှၤတဖၣ်အတၢ်အိၣ်ဘှံးန့ၣ်လီၤ. ဘၣ်ဆၣ် အဝဲသ့ၣ်အၢၣ်လီၤတူၢ်လိာ်ဝဲလၢ ပှၤဆါနီၢ်နီၢ်လၢ ICU အဒၢးပူၤတဖၣ် မံဝဲကန့ၢ်မုာ်မုာ်အဂီၢ်န့ၣ် ကကီခဲဒံးဝဲန့ၣ်လီၤ.

ဖဲပဘၣ်တၢ်ကီတၢ်ခဲအခါ, ပထံၣ်န့ၢ် တၢ်အိၣ်ဘှံးကသ့ဒ်လဲၣ်. လံာ်စီဆှံ ပာ်ဖျါ ဆှဲဆှဲ လၢတၢ်အိၣ်အသး ကမ့ၢ်ဒ်လဲၣ်ဂ့ၤ ဒ်လဲၣ်ဂ့ၤ, ပှၤလၢအသန့ၤအသး လၢယွၤတဖၣ်အဂီၢ် တၢ်ဃူတၢ်ဖိး အိၣ်ဝဲန့ၣ်လီၤ. ဝံယရှါယၤ ကွဲးဝဲဘၣ်ဃးဒီး မုၢ်နံၤ လၢအကဟဲတဖၣ်အဂ့ၢ်, ဖဲပှၤအံၣ်စရ့လးဖိ လၢပျၢၤတဖၣ် ကဘၣ်တၢ်မၤထူၣ်ဖျဲးထီၣ်က့ၤ ဖဲအဘၣ်ကီဘၣ်ခဲဝံၤ အလီၢ်ခံန့ၣ်လီၤ. အဝဲသ့ၣ် ကအိၣ်ဘၣ်ဘံၣ်ဘံၣ်ဘၢဘၢ လၢအဝ့ၢ်ပူၤ, မ့ၢ်လၢအဝဲသ့ၣ် သ့ၣ်ညါလၢယွၤဒုးအိၣ်ထီၣ် တၢ်ဘံၣ်တၢ်ဘၢအဃိန့ၣ်လီၤ(ယရှါ ၂၆:၁). အဝဲသ့ၣ် ကနာ်ဝဲလၢ ယွၤမၤတၢ်လၢဟီၣ်ခိၣ်ချၢ လၢတၢ်ဂ့ၤအဂီၢ်, “ဆီၣ်လီၤပှၤအိၣ်ဝဲဆိးဝဲလၢ အလီၢ်ထီၣ်ထီ”, ပာ်ထီၣ်ပှၤလၢ အဘၣ်တၢ်ဆီၣ်ဘံၣ်ဆီၣ်ဘၢ, ဒီးဟဲစိာ်န့ၢ်တၢ်တီတၢ်လိၤ န့ၣ်လီၤ(:၅-၆). အဝဲသ့ၣ် ကသ့ၣ်ညါဝဲ “လၢကစၢ်ယွၤအပူၤန့ၣ် လၢၢ်အထူအယိာ်အိၣ်ဝဲ တဖျၢၣ်လီၤ”, ဒီးအဝဲသ့ၣ် ကနာ်အီၤ လီၤစိၤလီၤထီန့ၣ်လီၤ (:၄).

ဝံယရှါယၤ ကွဲးဝဲ, “ပှၤအသးလၢအသန့ၤအသးလၢနၤန့ၣ် နကပၢၤအီၤလၢတၢ်ဃူတၢ်ဖိး အလၢအပှဲၤန့ၣ်လီၤ. အဂ့ၢ်ဒ်အံၤ, သန့ၤအသးလၢနၤလီၤ” (:၃). ယွၤဟ့ၣ်တၢ်ဃူတၢ်ဖိး ဒီးတၢ်အိၣ်ဘှံးလၢပဂီၢ် သ့ဝဲန့ၣ်လီၤ. လၢပခိၣ်ပဃၢၤဝးဝး တၢ်မ့ၢ်မၤအသးဒ်လဲၣ်ဂ့ၤ ဒ်လဲၣ်ဂ့ၤ, ပအိၣ်ဘှံးသ့ လၢတၢ်နာ်န့ၢ်ယွၤအတၢ်အဲၣ် ဒီးအစိကမီၤအပူၤန့ၣ်လီၤ.