ယတံၤသကိး အဲရၢ်(Ira) အတၢ်အိၣ်သး မၤသး တယံၥ်ဒံးဘၣ်အဖီခိၣ်, ယတသးအုး ဒိၣ်ဒိၣ်ဘၣ်န့ၣ် တသ့ဘၣ်. အဝဲပၥ်ဖျါထီၣ်အနီၢ်ကစၢ်အဂီၤ, ယူၥ်ထီၣ်အထံကီၢ်နီၣ်တယၢ် ဖဲအဃ့ၢ်တၢ်ဃ့ၢ်ပြၢဝံၤအလီၢ်ခံ, တီၣ်ထီၣ်ပၥ်ဖျါလၢ ပှၤကမျၢၢ်ကထံၣ်ဘၣ်အဂီၢ်, ဖဲအဝဲဘၣ်ပၥ်တ့ၢ်ကွံၥ် အဟံၣ်အိၣ်ဖဲ ဝ့ၢ်ခံၣ်(Kyiv), လၢအမ့ၢ် ကီၢ်ယူၣ်ကရ့(Ukraine)အဝ့ၢ်ခိၣ်လၢ အလီၤဘၣ်လၢဒုၣ်ဒါအစုပူၤန့ၣ်လီၤ. အဝဲကွဲးလီၤလံၥ်လၢ “ပဝဲခဲလၢၥ် ပဃ့ၢ်သးသမူ အတၢ်ဃ့ၢ် ဒ်တၢ်သ့အိၣ်ဒီးပှၤ အဂ့ၤကတၢၢ်လီၤ. မ်ပဃ့ၢ်မုၢ်နံၤခဲအံၤတဖၣ်အပူၤ ဂ့ၤန့ၢ်ဒံးလၢညါတက့ၢ်. အိၣ်ဒီး တၢ်တမံၤမံၤလၢ အတသံနီတဘျီလၢ ပသးပူၤတက့ၢ်”. မုၢ်နံၤပိၥ်ထွဲလၢအခံတဖၣ်အပူၤ, ယထံၣ်ယတံၤသကိးဃ့ၢ် တၢ်ဝဲန့ၣ် လၢကျဲအါဘိ, ဖဲအဝဲဆှၢတၢ်ဂ့ၢ်လၢ ပကထုကဖၣ်အဂီၢ်ဒ်လဲၣ်, ဒီးဆီၣ်ထွဲမၤစၢၤပှၤလၢ အတူၢ်ဘၣ်တၢ် အိၣ်လၢအထံအကီၢ်ပူၤတဖၣ်အဂီၢ် ဒ်လဲၣ်န့ၣ်လီၤ.

အဲရၢ်အတၢ်ကတိၤဖျၢၣ်တဖၣ် ဟဲစိၥ်ယိၥ်ယိၥ် လံၥ်ဧ့ၤဘြံၤ ၁၂ အတၢ်ကိး လၢပှၤစူၢ်က့ၤနၥ်က့ၤတၢ်ဖိတဖၣ် ဒ်သိး “ကဃ့ၢ်လၢတၢ်သးစူၤအပူၤလီၤ” (:၁). တၢ်ကိးဝဲန့ၣ် ပိၥ်ထွဲထီၣ် အဆၢဒိၣ် ၁၁ လၢအမ့ၢ် တၢ်စူၢ်တၢ်နၥ် အပှၤဒူဃိၤတဖၣ်အဂ့ၢ်, “ပှၤအုၣ်အသးဂီၢ်မုၢ်”(:၁၂), လၢအအိၣ်မူတ့ၢ် အိၣ်ဒီးတၢ်သးဒူ, တၢ်နၥ်ကျၢၤမုဆှူ- ညိကွံၥ် အသးသမူဒၣ်လဲၥ်လီၤ (၁၁:၃၂-၃၈). အဝဲသ့ၣ်မ့ၢ်ထံၣ်လီၤတၢ်ဒီး တူၢ်လိၥ်မုၥ် ကစၢ်ယွၤအတၢ်အၢၣ်လီၤတဖၣ်လၢ အယံၤဘၣ်ဆၣ် (:၁၃), အဝဲသ့ၣ်အိၣ်မူလၢ တၢ်လီၤထူလီၤယိၥ်တမံၤမံၤအဂီၢ်, တၢ်လၢအတသံဝဲ နီတဘျီအဂီၢ်လီၤ.

ပှၤလၢအစူၢ်နၥ်ယ့ၣ်ၡူးတဖၣ်ခဲလၢၥ် ဘၣ်တၢ်ကိးလၢ ကမူဒ်သိးန့ၣ် ကိးဂၤလီၤ. မ့ၢ်လၢ ရှလိၣ် (Shalom) – တၢ်လၢအအါထီၣ်ဒီးအိၣ်ဒီးတၢ်ဃူတၢ်ဖိး – လၢအမ့ၢ်ယွၤအဘီအမုၢ်န့ၣ် ကြၢးဝဲကၢကီၣ်ဝဲလၢ ပကဟ့ၣ်လီၤပတၢ်ခဲလၢၥ်လီၤ. ဒီးခရံၥ်အတၢ်ဟ့ၣ်ဒိ ဒီးအတၢ်စိကမီၤမ့ၢ်တၢ်လၢ ဖီၣ်ဟံးဃၥ်ကျၢၤပှၤန့ၣ်လီၤ (၁၂:၂-၃).