ရး(Raj) မ့ၢ် ပှၤစူၢ်က့ၤနၥ်က့ၤ ကစၢ်ယ့ၣ်ၡူး ဒ်အမ့ၢ် တၢ်အုၣ်က့ၤခီၣ်က့ၤကစၢ် စးထီၣ်လၢ အသးစၢ်လံလံန့ၣ်လီၤ. ဘၣ်ဆၣ် တယံာ်ဘၣ်န့ၣ် အဝဲဃၣ်က့ၤအသး လၢအတၢ်စူၢ်တၢ်နာ် ဒီးလဲၤကပာ်ကွံာ် ကစၢ်ယွၤန့ၣ်လီၤ. ဘၣ်တနံၤန့ၣ် ရးပာ်လီၤအသးလၢ ကမၤသီထီၣ်က့ၤ အတၢ်ရ့လိာ်သးဒီး ကစၢ်ယ့ၣ်ရှူး ဒီးကမၤသကိးတၢ်ဒီး တၢ်အိၣ်ဖှိၣ်န့ၣ်လီၤ. ပိာ်မုာ်တဂၤန့ၣ် ကတိၤဆါအီၤ လၢတၢ်သူၣ်ဒိၣ်သးဖျိးအပူၤ မ့ၢ်လၢ ရး ဟါမၢ် အါနံၣ်အါလါအဃိလီၤ. တၢ်အ့ၣ်လိာ် ကတိၤဆါအီၤအံၤ ကဲထီၣ် တၢ်မဲာ်ဆှး ဒီးတၢ်မၤကမၣ် တၢ်လၢ ရးအဂီၢ် လၢအတၢ်ဟးဖျိးကွံာ် နံၣ်တဖၣ်အံၤအဂီၢ်န့ၣ်လီၤ. ရးဆိကမိၣ်ထီၣ်က့ၤအသးလၢ “မ့ၢ်တၢ်မုၢ်လၢ် အိၣ်ယံၤဒီးယၤလံဧါ”န့ၣ်လီၤ. အကတီၢ်ဖဲန့ၣ် ရးသ့ၣ်နီၣ်ထီၣ်က့ၤဝဲ ကစၢ်ယ့ၣ်ရှူး တူၢ်လိာ်ကဒါက့ၤ စီၤရှံမိၣ်ပ့းတရူးအဂ့ၢ် ဖျါဖဲ ယိၤ ၂၁:၁၆-၁၇ အပူၤ ဒီး လူၤ ၂၂:၃၄, ၆၀-၆၁ စံးဘၣ်ပှၤအသိး, စီၤပ့းတရူး သမၢအီၤ သၢဘျီဒၣ်လဲာ်န့ၣ်လီၤ.

စီၤပ့းတရူးကမုၢ်လၢ်ဆၢဒိးန့ၢ် တၢ်အ့ၣ်လိာ်ကတိၤဆါအီၤ တမံၤမံၤ ဘၣ်ဆၣ်, တၢ်လၢအဝဲဒိးန့ၢ်ဘၣ်ဝဲ တၢ်န့ၣ် မ့ၢ်တၢ်ပျၢ်တၢ်ကမၣ်ဒီး တူၢ်လိာ်က့ၤအီၤ ဒ်အလီၢ်လီၢ် ဒၣ်ဝဲန့ၣ်လီၤ. ယိၤ ၂၁:၁၅-၁၇ စံးဘၣ်ပှၤ “ကစၢ်ယ့ၣ်ရှူးလၢ ကပာ်ဖျါထီၣ်က့ၤ စီၤပ့းတရူး အတၢ်သမၢအီၤ အလီၢ်န့ၣ်, ဟ့ၣ်စီၤပ့းတရူး တၢ်ခွဲးတၢ်ယာ်လၢ ကမၤလီၤတံၢ်က့ၤ အတၢ်အဲၣ်ဆူ ကစၢ်ယ့ၣ်ရှူးခရံာ် ဒီးကအံးထွဲကွၢ်ထွဲ ကဟုကယာ် ပှၤလၢအပိာ်ကစၢ်ခရံာ်အခံတဖၣ်အဂီၢ်န့ၣ်လီၤ”. တချုးလၢစီၤပ့းတရူးသမၢအီၤဒံးဘၣ်န့ၣ် ကစၢ်ယ့ၣ်ရှူး စံးကတိၤတ့ၢ်လံတဖၣ် ဒ် လူၤ ၂၂:၃၂ ပာ်ဖျါဝဲဒၣ် “ဒီးတုၤ နဃၣ်လိၤက့ၤနသး ဒီးဒုးဆူၣ်ထီၣ် နဒီပုၢ်ဝဲၢ်အဂံၢ်အဘါတက့ၢ်”န့ၣ် လၢဝဲပှဲၤဝဲဒၣ်န့ၣ်လီၤ.

ရး ဃ့ထုကဖၣ် ကစၢ်ယွၤလၢ ကပျၢ်အတၢ်ကမၣ်ဒီး တၢ်တူၢ်လိၥ်ကဒါက့ၤအီၤ ဒ်သိး ကစၢ်ယ့ၣ်ရှူးမၤဝဲဒၣ်လၢ စီၤပ့းတရူးအသိးန့ၣ်လီၤ. ခဲကနံၣ်အံၤ ရးအတၢ်အိၣ်မူန့ၣ် တမ့ၢ်ထဲ လဲၤတၢ်ဒီး ကစၢ်ယ့ၣ်ရှူးဘူးဘူးတံၢ်တံၢ်န့ၣ်ဘၣ်, ဟ့ၣ်လီၤအသး, မၤသကိးတၢ်လၢ တၢ်အိၣ်ဖှိၣ်ပူၤ ဒီးဆီၣ်ထွဲမၤစၢၤ ပှၤစူၢ်က့ၤနာ်က့ၤတၢ်ဖိ အဂုၤအဂၤတဖၣ်စ့ၢ်ကီး န့ၣ်လီၤ. မ့ၢ်ပကအိၣ်ယံၤဒီး ကစၢ်ယွၤဖဲလဲၣ်ဂ့ၤ ဒ်လဲၣ်ဂ့ၤ, ထီဘိ ကစၢ်ယွၤ အိၣ်ကတဲာ်ကတီၤအသးလၢ ကပျၢ် ပတၢ်ဒဲးဘးဒီး တူၢ်လိာ်က့ၤပှၤန့ၣ်လီၤ. တကးဒံးဘၣ်န့ၣ် ဟ့ၣ်က့ၤပှၤ ပတၢ်အိၣ်သးတဖၣ် ဒ်အလီၢ်လီၢ် ဒ်သိးလၢ ပကအဲၣ်ပှၤဂၤ, ပကမၤယွၤအတၢ်မၤ ဒီးအိၣ်မူမၤလၤကပီၤယွၤ ကသ့အဂီၢ်န့ၣ်လီၤ. ပတအိၣ်ယံၤဒီးယွၤ နီတဘျီဘၣ်, ယွၤအစု လၢအိၣ်ပှဲၤဒီး တၢ်အဲၣ်န့ၣ် အိးဟိထီၣ်အသး ကျဲဖးလဲၢ်လၢပဂီၢ်န့ၣ်လီၤ.