မိၣ်နံးကၣ် (Monica) ဘါထုကဖၣ် လၢတၢ်ကိၢ်တၢ်ဂီၤ ဒ်သိးအဖိခွါကဟဲက့ၤဆူ ယွၤအအိၣ်န့ၣ်လီၤ. အဖိခွါတပိာ်ကျဲအဂ့ၤအဃိ ဘၣ်ဟီၣ်ဘၣ်ယၢၤဝဲ ဒီးဘၣ်လူၤကွၢ်ဝဲ အဖိခွါအိၣ်တၢ်အလီၢ်လၢဝ့ၢ်တဘျုးဝ့ၢ်န့ၣ်လီၤ. တၢ်အိၣ်သးတဖၣ် ဖျါဒ်တၢ်မုၢ်လၢ်တအိၣ်န့ၣ်လီၤ. တနံၤန့ၣ် တၢ်ကဲထီၣ်အသးလၢအဖိခွါထံၣ်လိာ်သး လီၢ်တံၢ်လီၤဆဲးဒီးယွၤန့ၣ်လီၤ. အဝဲကဲထီၣ်တၢ်အိၣ်ဖှိၣ် ပှၤမၤလိယွၤဂ့ၢ်ပီညါစဲၣ်နီးအကျါတဂၤန့ၣ်လီၤ. ပသ့ၣ်ညါအီၤ ဒ်အမ့ၢ် ဘံရှီး(ပၤပၤ) အီကၢးစတံ, လၢဟ့းပိၣ် (Augustine, Bishop of Hippo) န့ၣ်လီၤ.
ဒီးစံးဝဲ “ဆံးယံာ်လဲၣ်, ယွၤဧၢ.”န့ၣ်လီၤ(ဃဘး ၁:၂). ဒီး ဝံဃဘးကူာ် ပာ်ဖျါဝဲ အတၢ်သူၣ်အုးသးအုး မ့ၢ်လၢ ယွၤတမၤတၢ်နီတမံၤ ဘၣ်ဃး ဒီး ပှၤဒိၣ်စိဒိၣ်ကမီၤတဖၣ် ဃၣ်ကွံာ်အသးလၢတၢ်တီတၢ်လိၤ အဃိန့ၣ်လီၤ. ကွၢ်ဆိကမိၣ်က့ၤ အတၢ်ဆၢကတီၢ်တဖၣ် လၢအမ့ၢ် တၢ်တတီၤတလိၤအဂီၢ်, တၢ်ကူစါယါဘျါလၢ တၢ်မုၢ်လၢ်တအိၣ်, ကျိာ်စ့တၢ်ဃံးတၢ်စ့ၤ, မ့တမ့ၢ် ပဖိတဖၣ် လၢလဲၤကပာ် ကစၢ်ယွၤအဃိ ဒီး ပဘၣ်ဃၣ်ပသးဆူ ယွၤအအိၣ် ဒ်သိး ပကပာ်ဖျါထီၣ် ပတၢ်ဘၣ်ယိၣ်ဘၣ်ဘီ, ပတၢ်သူၣ်အုးသးအုးအဂီၢ်န့ၣ်လီၤ.
ဖဲဝံဃဘးကူာ် ကအုကစွါတဘျီလၢ်လၢ်န့ၣ် ယွၤနၢ်ဟူအတၢ်ဟီၣ်တၢ်ယၢၤန့ၣ်လီၤ. ဃဘး ၃:၁၈ အပူၤ ဝံဃဘးကူာ်စံးဝဲလၢ “ယကသူၣ်ဖှံသးညီ လၢတၢ်အုၣ်က့ၤခီၣ်က့ၤအကစၢ်အပူၤလီၤ” အသိးန့ၣ် ပမၤလိန့ၢ်တၢ်လၢ ဝံတဂၤအံၤအအိၣ် ဖဲပဆိးသီ အိၣ်ခိးတၢ်လၢ တၢ်နာ်အကတီၢ် ပကဘၣ် ဆီတလဲပတၢ်သူၣ်အုးသးအုးဆူ တၢ်စံးထီၣ်ပတြၢၤယွၤန့ၣ်လီၤ. အဝဲတနၢ်ပၢၢ်ယွၤအကျဲတဖၣ် သနာ်က့ အဝဲနာ်ယွၤန့ၣ်လီၤ. တၢ်သးအုးမ့ၢ်ဂ့ၤ တၢ်စံးထီၣ်ပတြၢၤမ့ၢ်ဂ့ၤ မ့ၢ်ပနဲၣ်ဒိ ပတၢ်စူၢ်တၢ်နာ် ဒီးပာ်ဖျါထီၣ် ပတၢ်နာ်န့ၢ်အီၤလီၤ. ပကအုကစွါ ဒ်တၢ်ဃ့ကညးထီၣ်ဆူယွၤ သန့ၤသးလၢ ယွၤအသူးအသ့ၣ် အလၤကပီၤ အဖီခိၣ်န့ၣ်လီၤ. ဒီးပတၢ်စံးထီၣ်ပတြၢၤ သန့ၤအသးလၢယွၤ လၢအလီၤ ကမၢကမၣ် ဒီးသ့တၢ်လၢာ်တဂၤအဖီခိၣ်န့ၣ်လီၤ. ခီဖျိလၢယွၤအဘျုးအဖှိၣ်အဃိ ဒီးမုၢ်တနံၤန့ၣ် ပတၢ်သးအုတၢ်ကအုကစွါတဖၣ် ကဆီတလဲအသးဆူ တၢ်စံးထီၣ်ပတြၢၤယွၤန့ၣ်လီၤ.
