ယူၣ်ကၠ့ ဖံထၢၣ်စၢၣ် (Eugene Peterson) အတၢ်ကွဲးလၢအအိၣ်ဒီး အစိကမီၤ လၢဆိကမိၣ်ထံၣ်ကဒါက့ၤ ထါစံးထီၣ်ပတြၢၤ ၁၂၀ န့ၣ်, အဝဲကွဲးဝဲ, “ပှၤခရံာ်ဖိတဖၣ် အတၢ်သ့ၣ်ညါလီၤက့ၤအသးန့ၣ် စးထီၣ်ဖဲလၢ ပသ့ၣ်ညါနၢ်ပၢၢ်က့ၤ လၢတၢ်သူၣ်အုးသးအုးအပူၤ တၢ်မ့ၢ်တၢ်တီတဖၣ် လၢပထံၣ်လၢအဘၣ်န့ၣ် နီၢ်နီၢ်တခီ မ့ၢ်တၢ်လီတၢ်ဝ့ၤန့ၣ်လီၤ”. ထါစံးထီၣ်ပတြၢၤ ၁၂၀ မ့ၢ် “ထါတဖၣ်လၢအလဲၤထီၣ်ဆူအဖီခိၣ်” အကျါ အဆိကတၢၢ်တယုၢ် (စံး ၁၂၀-၁၃၄) ဒီးဘၣ်တၢ်သးဝံၣ်အီၤဖဲ ယွၤအပှၤဂီၢ်မုၢ်တဖၣ် အတၢ်လဲၤဘူၣ်ထီၣ်ဘါထီၣ် ကစၢ်ယွၤ လၢဝ့ၢ်ယရူၤၡလ့ၣ်အဆၢကတီၢ် န့ၣ်လီၤ. ဒီးဖံထၢၣ်စၢၣ် ဃုထံၣ် သ့ၣ်ညါတၢ်အံၤလၢ အလံာ် “တၢ်စူၢ်ဒိကနၣ်ဖးယံာ်လၢ အလဲၤတၢ်တကျိၤဃီအခါ” ဒီးထါစံးထီၣ်ပတြၢၤတဖၣ်အံၤ ဟ့ၣ်ထီၣ်ဝဲ တၢ်ဂီၤဒိလၢအပာ်ဖျါ ပနီၢ်သးအတၢ်လဲၤဆူ ယွၤအအိၣ်န့ၣ်လီၤ.

တၢ်လဲၤဒ်သိးအံၤ စးထီၣ်အသးသ့ဝဲဒၣ်ထဲလၢ ပသ့ၣ်ညါလၢ ပလိၣ်ဘၣ် တၢ်လီၤဆီနီၢ်နီၢ်အဆၢကတီၢ်န့ၣ်လီၤ. ဖံထၢၣ်စၢၣ်တဲဝဲလၢ, “ပှၤတဂၤ ကဘၣ်ပာ်ဖျါအတၢ်သးဘၣ်အၢလ့ၤတုၢ်လ့ၤတီၤလၢ ဟီၣ်ခိၣ်အတၢ်မၤသးတဖၣ် ဒ်သိးကဃုထံၣ်န့ၢ် တၢ်ထိၣ်ဟူးထိၣ်ဂဲၤအသးလၢ ကစးထီၣ်ဝဲ ပှၤခရံာ်ဖိအကျဲန့ၣ်လီၤ. တချုးလၢ အဝဲမၤန့ၢ် တၢ်သးဃ့အီၣ် တၢ်ဘျူးတၢ်ဖှိၣ် အဝဲကဘၣ်သးလၢာ် ဟီၣ်ခိၣ်အကျဲ အကျိၤအကွၢ်တဖၣ်န့ၣ်လီၤ”.

ပသးဟးဂီၤတၢ်လၢ ဟီၣ်ခိၣ်အတၢ်တလၢတပှဲၤ တၢ်ဟးဂူာ်ဟးဂီၤလၢအိၣ်ဝးတရံး ပှၤန့ၣ် ညီဒိၣ်မးဒီးခ့ခါလုၢ်လၢ် တၢ်အိၣ်သးတဖၣ် ပာ်ဖျါထီၣ်ဝဲ တၢ်တဒိသူၣ်ဒိသးဒီးတၢ်အၢလၢ ပမၤဘၣ်ပှၤဂၤတဖၣ်န့ၣ်လီၤ. ထါစံးထီၣ်ပတြၢၤယုၢ် ၁၂ဝ ပာ်ဖျါဝဲ တၢ်မိၣ်တၢ်မးအံၤ တီတီလိၤလိၤ ဒီးအဆၢဖိ ၇ အပူၤ စံးဝဲ, “ယအဲၣ် တၢ်ဃူတၢ်ဖိးလီၤ. မ့မ့ၢ် တုၤယကတိၤထီၣ်တၢ်ဒီး အဝဲသ့ၣ်တဖၣ်အဲၣ်တၢ်ဒုးတၢ်ယၤလီၤ”န့ၣ်လီၤ.

ဘၣ်ဆၣ် တၢ်မၤဘျါဒီး တၢ်ပူၤဖျဲးအလီၢ်အိၣ်ဝဲဒၣ် ဖဲပသ့ၣ်ညါနၢ်ပၢၢ် ပတၢ်နးတၢ်ဖှီၣ်အံၤ ကဲထီၣ်တၢ်မၤဖုးသ့ၣ်နီၣ်ထီၣ်က့ၤ ပသးဆူ တၢ်စးထီၣ်အသီ ခီဖျိ ပတၢ်မၤစၢၤထဲတမံၤဧိၤ ဒ်အမ့ၢ် တၢ်အုၣ်က့ၤခီၣ်က့ၤကစၢ်လၢ အနဲၣ်လိၤပကျဲ လၢတၢ်ဟးဂုာ်ဟးဂီၤအပူၤ ဒီး ဆူကျဲလၢအမုာ် အခုၣ် အလၢအပှဲၤန့ၣ်လီၤ (၁၂၁:၂). ဒ်ပနုာ်လီၤဆူ နံၣ်အသီပူၤန့ၣ်, မ်ကဃုယွၤဒီး အကျဲအကျိၤအကွာ်တဖၣ် န့ၣ်တက့ၢ်.