ဖဲတၣ်ဟၣ်(Taher) ဒီးအမါဒိၣ်ညၣ်(Donya)ကဲထီၣ် ပှၤစူၣ်က့ၤနာ်က့ၤခရံာ် အဆၢကတီၢ်, တၢ်ဘၣ်ယိၣ်အလီၢ်အိၣ်လၢ အဝဲသ့ၣ် ကဘၣ်တၢ်မၤအၢမၤနး လၢအထံကီၢ်န့ၣ် သ့ၣ်ညါဝဲန့ၣ်လီၤ. တနံၤ တၣ်ဟၣ် ဘၣ်တၢ်မၤဘၢအမဲာ်ချံ, ဒုးကျီၤထီၣ် ထးကျီၤစု, ဘၣ်တၢ်ထၢနုာ်အီၤလၢဃိာ်ပူၤဒီး ဘၣ်တၢ်စံၣ်ညီၣ်အီၤလၢ စူၢ်ကမၣ်နာ်ကမၣ်တၢ်အဂီၢ်န့ၣ်လီၤ. တချုးလၢ အဝဲဟဲထီၣ်လၢ တၢ်စံၣ်ညီၣ်အလီၢ်န့ၣ်, အဝဲဒီးအမါဒိၣ်ညၣ် အၢၣ်လီၤတူၢ်လိာ် လိာ်အသးလၢ တစူးကွံာ်ညိကွံာ် ကစၢ်ယ့ၣ်ရှူးဘၣ်န့ၣ်လီၤ.

တၢ်စံၣ်ညီၣ်အဆၢကတီၢ် တၢ်ကဲထီၣ်အသးလၢ မၤကမၢကမၣ်အီၤန့ၣ်လီၤ. ၦၤစံၣ်ညီၣ်ကွီၢ်စံးဝဲ, “ဘၣ်မနုၤအဃိ ယအဲၣ်ဒိးထုးထီၣ်နၤလၢ ညၣ်ဖးဒိၣ်ဒီး ခ့ယုၢ်အကိာ်ပူၤလဲၣ်န့ၣ် ယတသ့ၣ်ညါဘၣ်”န့ၣ်လီၤ. တဘျီဃီ တၣ်ဟၣ် “သ့ၣ်ညါဝဲလၢ ကစၢ်ယွၤမၤတၢ်”န့ၣ်လီၤ. ဘၣ်မနုၤအဃိ စံၣ်ညီၣ်ကွီၢ်စူးကါ လံာ်စီဆှံခံတီၤအံၤလဲၣ်န့ၣ် အဝဲစံးကတိၤ ပာ်ဖျါတသ့ဘၣ်(ကွၢ် ယိၤနါ ၂, ဒီးဒၤနံးယ့လး ၆) . တၣ်ယၣ် ဘၣ်တၢ်ပျၢ်ကွံာ်အီၤလၢဃိာ်ပူၤ ဒီးအဟံၣ်ဖိဃီဖိတဖၣ် လၢခံ ဟးထီၣ်အိၣ်ဆိးလၢ တၢ်လီၢ်အဂၤတတီၤန့ၣ်လီၤ.

တၣ်ဟၣ် အတၢ်ထူၣ်ဖျဲးလီၤလးတဘျီအံၤ တဲဖျါကဒါက့ၤ စီၤဒၤနံးယ့လးအဂ့ၢ်န့ၣ်လီၤ. အဝဲကဘၣ် တၢ်ပာ်ထီၣ်ထီအီၤဆူ ဘီမုၢ်ဒီဘ့ၣ်ညါအခိၣ်အဃိ အပှၤမၤသကိးတၢ်တဖၣ် သူၣ်က့ၣ်သးကါအီၤန့ၣ်လီၤ(ဒၤ ၆:၃-၅). အဝဲသ့ၣ်ကူၣ်ဝဲလၢ ကမၤဟးဂီၤစီၤဒၤနံးယ့လးအဂီၢ် ဒီးဟ့ၣ်ကူၣ်ဝဲ စီၤပၤဒၤရယါဝ့ၣ် ဒ်သိးကဟ့ၣ်လီၤအကလုၢ်ဒီးဘိးဘၣ်သ့ၣ်ညါ တၢ်သိၣ်တၢ်ဘျၢ လၢကထီဒါ ပှၤလၢ အဘါထီၣ်ပှၤတဂၤဂၤ လၢအတမ့ၢ်စီၤပၤန့ၣ်လီၤ. ဘၣ်ဆၣ် စီၤဒၤနံးယ့လး တကနာ်ဃုာ်တၢ်ဘၣ်. စီၤပၤဒၤရယါဝ့ၣ် မၤတဘၣ်ဘၣ် ဘၣ်တ့ၢ်နုာ်အီၤဆူ ခ့ယုၢ်အကပိၤအပူၤန့ၣ်လီၤ (:၁၆). ဘၣ်ဆၣ် ကစၢ်ယွၤ “မၤပူၤဖျဲး စီၤဒၤနံးယ့လး” ဒီးအုၣ်က့ၤခီၣ်က့ၤအီၤလၢတၢ်သံ (:၂၇), ဒ်သိး အဝဲအုၣ်က့ၤခီၣ်က့ၤ တၣ်ဟၣ်ခီဖျီ စံၣ်ညီၣ်ကွီၢ်တဂၤ အတၢ်မၤထူၣ်ဖျဲးလီၤလးန့ၣ်လီၤ.

မုၢ်မဆါတနံၤအံၤ ပှၤစူၢ်က့ၤနာ်က့ၤတၢ်အါဂၤ တူၢ်ဘၣ်ခီၣ်ဘၣ်တၢ် ခီဖျိအပိာ် ကစၢ်ခရံာ်အခံ ဒီးတဘျီဘျီ ဘၣ်တၢ်မၤသံအဝဲသ့ၣ်စ့ၢ်ကီးန့ၣ်လီၤ. ဖဲပဘၣ်ကွၢ်ဆၢၣ်မဲာ်ဒီး တၢ်မၤအၢမၤနးပှၤအဆၢကတီၢ် ပမ့ၢ်နၢ်ပၢၢ်လၢယွၤအိၣ်ဒီး ကျဲအကျိၤအကွၢ်တဖၣ် လၢပဆိကမိၣ်တထီၣ်ဘးအပူၤန့ၣ် ပမၤဒိၣ်ထီၣ်ယိာ်ထီၣ် ပတၢ်နာ်သ့ဝဲဒၣ်န့ၣ်လီၤ. ဖဲနဘၣ်ကွၢ်ဆၢၣ်မဲာ်ဒီး တၢ်ဒုးတၢ်ယၤတမံၤလၢ်လၢ်န့ၣ် သ့ၣ်ညါလၢယွၤအိၣ်ဒီးနၤန့ၣ်လီၤ.