လူဝ့း ရိဒရံၣ်ကၢး(Luis Rodriguez)န့ၣ် မၤတၢ်ဆါတၢ်ပှ့ၤကသံၣ်မူၤဘှီးအဃိ ဖဲအသးအိၣ် ၁၆ နံၣ်န့ၣ် ဘၣ်တၢ်တ့ၢ်နုာ်အီၤဆူဃိာ်ပူၤန့ၣ်လီၤ. အခဲအံၤ တဘျီန့ၣ် မ့ၢ်လၢ အဝဲဂုာ်ကျဲးစၢးမၤသံပှၤအဃိ ဘၣ်တၢ်ဖီၣ်တ့ၢ်နုာ်ကဒီးအီၤဆူ ဃိာ်ပူၤန့ၣ်လီၤ. ဘၣ်သ့ၣ်သ့ၣ် အဝဲကဒိးန့ၢ် တၢ်စံၣ်ညီၣ်လၢ ကဘၣ်လီၤဃိာ်တစိၤသးန့ၣ်လီၤ. ဘၣ်ဆၣ် ကစၢ်ယွၤကတိၤတၢ်ဒီးအီၤ လၢမၤကမၣ်တၢ်အဆၢကတီၢ်အပူၤဒၣ်လဲၣ်န့ၣ်လီၤ. ဖဲဘၣ်အိၣ်လၢဃိာ်ပူၤအခါ လူဝ့းသ့ၣ်နီၣ်ထီၣ်က့ၤ တၢ်လၢအနီၢ်ဆံးအဆၢကတီၢ် ထီဘိန့ၣ် အမိၢ်လဲၤကိးအီၤဆူ တၢ်ဘါသရိာ်န့ၣ်လီၤ. ခဲကနံၣ်အံၤ အဝဲပလၢၢ်ဘၣ်ဝဲဒၣ်လၢ ကစၢ်ယွၤထိးဘၣ်အသးန့ၣ်လီၤ. အကတၢၢ်န့ၣ် လူဝ့း ပီၢ်ယၢ်လီၤက့ၤအသးလၢ အတၢ်ဒဲးဘးတဖၣ် ဒီးဟဲက့ၤဝဲဆူ ကစၢ်ယ့ၣ်ရှူးခရံာ်အအိၣ်န့ၣ်လီၤ.
ဖဲလံာ်မၤတၢ်အပူၤ, ပထံၣ်ဘၣ် ပှၤသူၣ်ဆူၣ်သးဂဲၤတဂၤ လၢအမံၤမ့ၢ် စီၤစီလူး, ဒီးလၢပှၤကိးအီၤစ့ၢ်ကီးလၢ စီၤပီလူးန့ၣ်လီၤ. မၤတၢ် ၉:၁ စံးဝဲလၢ အဝဲအိၣ်ဒီးတၢ်ကမၣ်လၢ အမၤအၢမၤသီ ပှၤလၢအစူၢ်နာ်ယ့ၣ်ရှူးတဖၣ် ဒီးလၢအိၣ်ဒီး တၢ်မၤသံပှၤကညီ လၢအသးပူၤအဃိန့ၣ်လီၤ. မၤတၢ် ၇:၅၈ အပူၤ, တၢ်အုၣ်သးအိၣ်ဝဲဒၣ်လၢ အဝဲဖျါလီၤဂာ်ဒ် ပှၤတဖုအခိၣ် ဒီးအိၣ်လၢပှၤဂီၢ်မုၢ်အကျါ ဖဲပှၤကွံာ်သံ စီၤစတ့းဖၣ်လၢလၢၢ်အခါန့ၣ်လီၤ. ဘၣ်ဆၣ်, ကစၢ်ယွၤကတိၤတၢ်ဒီး စီၤစီလူး လၢအတၢ်သရူးကမၣ်တဖၣ်အပူၤန့ၣ်လီၤ. မၤတၢ် ၉:၄ ပာ်ဖျါဝဲ စီၤပီလူးအတၢ်လဲၤဆူ ဒၤမ့ၤစ့းအခါ, တၢ်ကပီၤလၢမူခိၣ် မၤဘျီၣ် စီၤစီလူးအမဲာ်, ဒီးယ့ၣ်ရှူးစံးဘၣ်အီၤ, “ဘၣ်မနုၤ နမၤအၢယၤလဲၣ်”န့ၣ်လီၤ. အဆၢဖိ ၅ အပူၤ စီၤစီလူး သံကွၢ်ဝဲဒၣ်, “နမ့ၢ်မတၤတဂၤလဲၣ်, ကစၢ်ဧၢ”, ဒီးတၢ်အံၤမ့ၢ် အတၢ်အိၣ်မူအသီ တၢ်စးထီၣ်ကဲထီၣ်သးန့ၣ်လီၤ. အဝဲသုးဃီၤအသးဆူ ယ့ၣ်ရှူး အအိၣ်န့ၣ်လီၤ.
လူဝ့း ရိဒရံၣ်ကၢး ဘၣ်အိၣ်လၢဃိာ်ပူၤ, ဒီးလၢခံန့ၣ် ဘၣ်တၢ်ပျၢ်လီၤဆိကွံာ်အီၤ လၢဃိာ်ပူၤန့ၣ်လီၤ. စးထီၣ်ဖဲန့ၣ်လံၤလံၤ, အဝဲမၤယွၤအတၢ်မၤ, ဟ့ၣ်လီၤသးလၢ ဃိာ်ပူၤတၢ်သးခုကစီၣ်အဂီၢ် လၢအမဲရကၤကီၢ်စၢဖှိၣ် ဒီးလီၢ်ခၢၣ်သးအမဲရကၤအပူၤန့ၣ်လီၤ.
ယွၤအိၣ်ဒီးတၢ်သ့တၢ်ဘၣ် အဒိၣ်အထီ လၢကအုၣ်က့ၤခီၣ်က့ၤ ပတၢ်အၢတၢ်သီန့ၣ်လီၤ. အဝဲထိးဘၣ်ပသး ဒီးကတိၤနုာ်လီၤတၢ်ဆူ ပသးလၢအပှဲၤလုၢ်ကွံာ်ဒီး တၢ်သရူးကမၣ်တဖၣ်န့ၣ်လီၤ. အခဲအံၤကမ့ၢ်ဝဲ တၢ်ဆၢကတီၢ်လၢ ပကပီၢ်ယၢ်လီၤက့ၤပသး ဒီးသုးဃီၤပသးဆူ ယ့ၣ်ရှူးအအိၣ်န့ၣ်လီၤ.
