လၢတယံာ်တမီၢ်အပူၤ ယဃုထံၣ်န့ၢ် တၢ်လီၤကမၢမၣ်တခါန့ၣ်လီၤ. ယလဲၤပိာ် ကျဲဖိတဘိအခံ လၢအလဲၤဆူ ယဟံၣ်ကပၤ သ့ၣ်တဖၣ်အကျါ, ဒီးယထံၣ်န့ၢ် တၢ်လိာ်ကွဲပျီ လၢပှၤတ့အီၤတခါန့ၣ်လီၤ. သ့ၣ်ဃီသွါတဖၣ် လၢလဲၤထီၣ်ဆူ တၢ်ခိးကွၢ်တၢ်အလီၢ်, စုာ်ပၣ်တဖၣ် လၢထိၣ်လီၤစဲၤသးလၢ သ့ၣ်ဒ့တဖၣ်အလိၤ, ဒီးပျံၤတိၤတဘိ လၢတၢ်ဘျးစဲအီၤလၢ သ့ၣ်ဒ့ဖးဒိၣ်တဖၣ်အဘၢၣ်စၢၤန့ၣ်လီၤ. ပှၤတဂၤ ဒုးကဲထီၣ်ဝဲ သ့ၣ်ဒီးပျံၤလီၢ်လံၤတဖၣ် ဆူတၢ်တ့ဒုးအိၣ်ထီၣ်တၢ် လီၤသူၣ်ပိၢ်သးဝးအလီၢ်န့ၣ်လီၤ.
ဆွံး(စ)(Swiss)ကသံၣ်သရၣ် ပီ(လ)ထီနံယၤ(Paul Tournier) နာ်ဝဲဒၣ်လၢ ၁ မိၤ ၁:၂၆–၂၇ ပာ်ဖျါဝဲလၢ ပဘၣ်တၢ်တ့ဒုးအိၣ်ထီၣ် ပှၤလၢတၢ်သူၣ်ပိာ်သးဝးအဂီၢ် မ့ၢ်လၢပဘၣ်တၢ်တ့လီၤပှၤ ဒ်ယွၤအက့ၢ်အဂီၤအဃိန့ၣ်လီၤ. ၁ မိၤ ၁:၁-၂၅ အပူၤ ဒ်ယွၤတ့ဒုးအိၣ်ထီၣ် မူဟီၣ်ကယၢ လၢတၢ်သူၣ်ပိာ်သးဝးအပူၤအသိး, ၁ မိၤ ၃: ၅-၆ စံးဝဲလၢ တၢ်ဘၣ်ယိၣ်အလီၢ်အိၣ်ဝဲ ဘၣ်ဆၣ် ယွၤတ့လီၤ ပှၤကညီၤလၢအသ့ဃုထၢ တၢ်ဂ့ၤဒီးတၢ်အၢအသိး, မ့ၢ်ဝံၤ ၁ မိၤ ၁:၂၈ အပူၤ ယွၤစံးဝဲ “မ်သုသၣ်ထီၣ်, ဒီးအါထီၣ်, ဒီးမၤပှဲၤထီၣ် ဟီၣ်ခိၣ်ဒီးမၤနၢၤအီၤ”အသိး, ပဝဲစ့ၢ်ကီး ပအိၣ်ဒီးသးလၢ အနီၣ်ပှၤ ဒ်သိးပကတ့ဒုးအိၣ်ထီၣ်တၢ်, ဒီးမၤတၢ်လၢအလီၤဘၣ်ယိၣ်တဖၣ် ဒီးတဒုးအိၣ်ထီၣ်တၢ်အသီတဖၣ် ဖဲပအိၣ်မူကဲဘျုး, ပၢဆှၢမၤဟီၣ်ခိၣ်အံၤအဆၢကတီၢ်န့ၣ်လီၤ. တၢ်သူၣ်ပိာ်သးဝး အတၢ်မၤတဖၣ်အံၤ ဒိၣ်မ့ၢ်ဂ့ၤဆံးမ့ၢ်ဂ့ၤ မ့ၢ်ကဲဘျုးလၢ ပှၤအဂုၤအဂၤအဂီၢ် ဒီးကမ့ၢ်တၢ်အဂ့ၤကတၢၢ်န့ၣ်လီၤ. ယဆိကမိၣ် ပှၤတဖၣ်လၢ အတ့ဒုးအိၣ်ထီၣ် တၢ်လိာ်ကွဲပျီအံၤ မ့ၢ်ထံၣ်ဘၣ် လၢပှၤကဂဲၤလိာ်ကွဲတၢ်လၢ တၢ်သူၣ်ဖှံသးညီအပူၤ လၢတၢ်လီၢ်ဖိအံၤ ဒီးကသူၣ်ခုသးခုဝဲဒိၣ်မးန့ၣ်လီၤ.
မ့ၢ်ကွဲးထုးထီၣ်တၢ်သးဝံၣ်အသီမ့ၢ်ဂ့ၤ, တၢ်ဃုထံၣ်သ့ၣ်ညါ တၢ်စိာ်တၢ်သးခုကစီၣ် ကျဲအကျိၤအကွၢ်အသီမ့ၢ်ဂ့ၤ, မ့တမ့ၢ် မ့ၢ်မၤမူထီၣ်ကဒါက့ၤ တၢ်ဆီဟံၣ်ဆီဃီ လၢအိၣ်လီၤဖးအသးမ့ၢ်ဂ့ၤ, တၢ်ခဲလၢာ်န့ၣ် ကမၤသူၣ်ပိၢ်သးဝးပှၤန့ၣ်လီၤ. ခဲကနံၣ်အံၤ, တၢ်မၤအသီ မ့တမ့ၢ် တၢ်တိာ်ကျဲၤလၢ နဘၣ်မၤအီၤ လၢလၢာ်ဂံၢ်လၢာ်ဘါန့ၣ် မ့ၢ်တၢ်မနုၤတဖၣ်လဲၣ်. ဘၣ်သ့ၣ်သ့ၣ် ယွၤကဆှၢနၤဆူ တၢ်လီၤသူၣ်ပိၢ်သးဝးအသီ တမံၤအအိၣ်န့ၣ်လီၤ.
