စဲမၣ်တ့ၣ် (Sand martins) မ့ၢ်ဝဲ ထိၣ်ဘျ့ၣ်ဘျီၣ် ဆံးဆံးဖိတကလုာ် လၢခူၣ်အသွံ လၢထံကျိကၢၢ်ခိၣ်အနံၤန့ၣ်လီၤ. ဟီၣ်ခိၣ် တၢ်ဂုၤထီၣ်ပသီထီၣ်လၢ ကီၢ်အ့ကလၢ်(England) ကလံၤထံးမုၢ်ထီၣ်တကပၤ မၤဆံးလီၤစှၤလီၤ အဝဲသ့ၣ် အတၢ်အိၣ်မူအိၣ်ဂဲၤအလီၢ်, ဒီးဖဲအဝဲသ့ၣ်ဟဲက့ၤလၢ တၢ်ဂိၢ် တၢ်သုးလီၢ်သုးကျဲအကတီၢ် ဒ်သိးကမၤအသွံအဂီၢ် တၢ်လီၢ်တဖၣ်စှၤလီၤဝဲ တလီၢ်လီၢ်န့ၣ်လီၤ. လီၢ်ကဝီၤ ပှၤအံးထွဲကွၢ်ထွဲန့ဆၢၣ်ခိၣ်ဃၢၤတဖၣ် ဟူးဂဲၤဖံးမၤထီၣ်တၢ် ဒီးတ့သူၣ်ထီၣ် မဲးပျီခိၣ်ဖးဒိၣ်တခါ ဒ်သိးကဟ့ၣ်အဝဲသ့ၣ် တၢ်လီၢ်တၢ်ကျဲန့ၣ်လီၤ. ခီဖျိ မုၢ်ကျိၤဝဲၤကွာ်တၢ်မၤကရၢလၢစိးပျၤမဲးတဖု အတၢ်မၤစၢၤ, အဝဲသ့ၣ် တ့ထီၣ်ဘှီထီၣ်မဲး ဒ်သိးကဒုးအိၣ်ထီၣ် တၢ်လီၢ်တၢ်ကျဲ လၢထိၣ်တဖၣ်ကအိၣ်ကဆိးအဂီၢ် လၢနံၣ်လၢကဟဲတဖၣ်အပူၤန့ၣ်လီၤ.

တၢ်အဲၣ်တၢ်သူၣ်အိၣ်သးအိၣ် အတၢ်မၤစၢၤအံၤ ဒုးနဲၣ်ဖျါထီၣ် တၢ်ကတိၤလၢ ကစၢ်ခရံာ်ညီနုၢ် မၤမုာ်မၤခုၣ် အပျဲၢ်အဘီၣ်တဖၣ်လီၤ. ဖဲတဲဘၣ်အဝဲသ့ၣ်လၢ အဝဲကလဲၤပာ်စၢၤ ဒီးအဝဲသ့ၣ် ပိာ်အခံ အခဲအံၤ တသ့ဒံးဘၣ် ဝံၤအလီၢ်ခံ (ယိၤ ၁၃:၃၆), ကစၢ်ယ့ၣ်ရှူး ဟ့ၣ်အဝဲသ့ၣ်တၢ်အၢၣ်လီၤလၢ အဝဲ “ကလဲၤကတဲာ်ကတီၤ သုလီၢ်တပူၤ” လၢမူခိၣ်န့ၣ်လီၤ (၁၄:၂). ကစၢ်ခရံာ်စံးလၢ တယံာ်ဘၣ်ဒီး ကပာ်တ့ၢ်အဝဲသ့ၣ် ဒီးပိာ်အခံ တသ့ဘၣ်အဃိ အဝဲသ့ၣ်အသးဘၣ်ဒိသနာ်က့, ကစၢ်ယ့ၣ်ရှူးဟ့ၣ်ဂံၢ်ဟ့ၣ်ဘါအဝဲသ့ၣ်လၢ ဒ်သိးကဆိကမိၣ် တၢ်လဲၤစီဆှံအံၤ ဒ်အမ့ၢ် အတၢ်ကတဲာ်ကတီၤ လၢကတူၢ်လိာ်အဝဲသ့ၣ်—ဒီးပဝဲတဖၣ်န့ၣ်လီၤ.

ခရံာ်အတၢ်ဟ့ၣ်လီၤသးလၢ ထူၣ်စုညါအလိၤ မ့ၢ်တအိၣ်ဘၣ်ဒီး, “တၢ်အိၣ်အလီၢ်အါပူၤ” လၢပၢ်အဟံၣ်ပူၤ တမ့ၢ်တူၢ်လိာ်ပှၤ ကသ့ဘၣ် (:၂). ခီဖျိအတၢ်လဲၤဆိလၢပမဲာ်ညါ ဒီးကတဲာ်ကတီၤန့ၢ်တၢ်လၢပဂီၢ်, ယ့ၣ်ရှူး ဟ့ၣ်ပှၤတၢ်အၢၣ်လီၤလၢ အဝဲကဟဲက့ၤကဒီး, ဒီးကဟံးက့ၤ ပှၤလၢအနာ် အတၢ်ဟ့ၣ်လီၤသး ဒ်သိးကအိၣ်ဘၣ်ဒီးအီၤန့ၣ်လီၤ.

ဖဲန့ၣ်ပကလဲၤအိၣ်ဘၣ်ဒီးအီၤ လၢတၢ်သးခုလီၤထူလီၤယိာ်အပူၤန့ၣ်လီၤ.