ဘြိးခလ့တိၤ (Brooklyn Bridge) န့ၣ် တၢ်ဆိကမိၣ်အီၤဒ်အမ့ၢ် “ဟီၣ်ခိၣ်တၢ်လီၤကမၢကမၣ် နီၣ်ဂံၢ်ဃိး” လၢတၢ်တ့ထီၣ်ဝံၤ ဖဲ ၁၈၈၃ အဆၢကတီၢ်န့ၣ်လီၤ. ထးပျံၤဆံးဆံးဖိတဘိ လၢတၢ်စၢလီၤအီၤလၢတိၤအပျိာ်အအံၤတကပၤ ဒီးဆူအဂၤတကပၤန့ၣ် အကါဒိၣ်ဝဲနီၢ်နီၢ်လၢ တိၤအံၤကလၢထီၣ်ပှဲၤထီၣ်အဂီၢ်န့ၣ်လီၤ. ထးပျံၤအဂၤ
တဖၣ် တၢ်မၤအါထီၣ်အီၤ လၢထးပျံၤဆံးဆံးဖိအံၤ အဖီခိၣ် ပၢၢ်တုၤလၢကဲထီၣ်ဝဲ ထးပျံၤဖးဒိၣ်တဘိ, ဒီးတၢ်ဘံပကံးအီၤ ဃုာ်ဒီးထးပျံၤအဂၤသၢဘိန့ၣ်လီၤ. ဖဲဝံၤန့ၣ်, ထးပျံၤတဘိစုာ်စုာ်—လၢပာ်ဖှိၣ်ဃုာ်အသး အါန့ၢ်ဒံး ထးပျံၤအဘိယဲၢ်ကထိ— မၤစၢၤဆီၣ်ထွဲ ထးပျံၤတိၤ အထီကတၢၢ်တဘိ လၢစိၤဖဲန့ၣ်အခါန့ၣ်လီၤ. တၢ်စးထီၣ်ဆံးဆံးဖိန့ၣ် ကဲထီၣ်ဝဲ ဘြိးခလ့တိၤ အက့ၢ်ဂီၤဖးဒိၣ်တခါန့ၣ်လီၤ”.
လူၤကၣ် ၂:၇ ပာ်ဖျါဝဲ ယ့ၣ်ရှူးအတၢ်အိၣ်မူ စးထီၣ်ဝဲလၢကျဲဆံးဆံးဖိ—ဖိသၣ်ဆံးအိၣ်ဖျဲၣ်ထီၣ် ဒီးတၢ်ပာ်အီၤလၢ ကျီၢ်အီၣ်ဆၣ်အလီၢ် လၢဝ့ၢ်ဆံးဖိတဖျၢၣ်အပူၤန့ၣ်လီၤ. ဝံမံကၤစံးပာ်ဆိပာ်စၢၤဝဲ ယ့ၣ်ရှူးအတၢ်အိၣ်ဖျဲၣ် လၢပှဲၤဝဲဒီးတၢ်ဆီၣ်လီၤသးအဂ့ၢ်အကျိၤ, ဒီးစံးဝဲ, “ဒီးနဲဒၣ်ဘ့ၤသလ့ဃ့ၣ်အ့ဖရးဧၢ, နဆံးလၢယူဒၤ အကထိတဖၣ် အကျါဘၣ်ဆၣ်ဒီး, ပှၤကဟဲထီၣ်လၢနပူၤ ဆူယအိၣ် လၢအကကဲထီၣ်ပှၤပၢတၢ်လၢ အံၣ်စရ့လးအဖီခိၣ်လီၤ” (မံကၤ ၅:၂; ကွၢ်စ့ၢ်ကီး မးသဲ ၂:၆). တၢ်စးထီၣ်ဆံးဆံးဖိလီၤ, ဘၣ်ဆၣ် ပှၤပၢတၢ်ဒီးပှၤကွၢ်သိတဂၤအံၤ ကထံၣ်ဘၣ်ဝဲ အမံၤကဟုကညီၢ် ဒီးအတၢ်မၤယွၤအတၢ်မၤ “ပၢၢ်တုၤလၢဟီၣ်ခိၣ်အကတၢၢ်” န့ၣ်လီၤ (မံကၤ ၅:၄).
ဖံလံးပံၤ ၂:၈ စံးဘၣ်ပှၤ ယ့ၣ်ရှူးအိၣ်ဖျဲၣ်လၢ တၢ်လီၤဆံးဆံးဖိ လၢတၢ်ဆီၣ်လီၤသးအပူၤ, ဒီးအသးသမူလၢဟီၣ်ခိၣ်အံၤကတၢၢ်ကွံာ်ဝဲ မ့ၢ်လၢ “အဆီၣ်လီၤအသး” ဒီးတူၢ်သံအသးလၢ “ထူၣ်စူညါအလိၤ” န့ၣ်လီၤ (NLT). ဘၣ်ဆၣ် ခီဖျိလၢတၢ်ဟ့ၣ်လီၤသး အဒိၣ်အယိာ်အပူၤ အဝဲမၤဟါမၢ်ကွံာ် တၢ်လီၤဖျိလၢ ပဝဲပှၤဟီၣ်ခိၣ်ဖိ ဒီးယွၤအဘၢၣ်စၢၤ ဒီးဟ့ၣ်လီၤတၢ်အုၣ်က့ၤခီၣ်က့ၤ လၢပှၤစူၣ်က့ၤနာ်က့ၤတၢ်ဖိခဲလၢာ်အဂီၢ်န့ၣ်လီၤ. မ်နကဒိးန့ၢ်ဘၣ် ယွၤအတၢ်ဟ့ၣ်လုၢ်ဒိၣ်ပှ့ၤဒိၣ် လၢခရံာ်အပူၤ ခီဖျိတၢ်နာ်တက့ၢ်. နမ့ၢ်နာ်အီၤနီၢ်နီၢ်ဒီး, တၢ်လၢအမၤဝဲဒၣ်လၢနဂီၢ်ကိးမံၤအဃိ မ်နကဆီၣ်လီၤသး ဒီးစံးထီၣ်ပတြၢၤအီၤ အသီတဘျီန့ၣ်တက့ၢ်.
