ကံး(သ)(Keith) ဖဲအလဲၤတၢ်လၢကျဲဖိ လၢပှၤဆါပှ့ၤတၢ်ဒိးတၢ်လၣ်တဖၣ်အဆၢကတီၢ်, အသူၣ်လီၤဘှံးသးလီၤဘှါဝဲန့ၣ်လီၤ. အစုတဖၣ် ကနိးကစုာ်န့ၣ် မ့ၢ်လၢဖါခ့ၣ်စၣ်(Parkinson) တၢ်ဆါအခီၣ်ထံးအတၢ်ပနီၣ်အဃိန့ၣ်လီၤ. တချုးအသးသမူအကံၢ်အစီ စးထီၣ်ဆံးလီၤစှၤလီၤန့ၣ် တၢ်မၤအသးအံၤ ကယံၢ်ဝဲဆံးယံၢ်လဲၣ်. လၢအဖိဒီးအမါအဂီၢ် တၢ်မၤအသးအံၤ ကမ့ၢ်တၢ်အခီပညီမနုၤလဲၣ်. ဖဲနၢ်ဟူဘၣ်ဝဲတၢ်နံၤသီၣ်ဒီး ကံး(သ)အတၢ်သူၣ်အုးတဖၣ် လီၤမၢ်ကွံာ်ဝဲဒၣ်န့ၣ်လီၤ. မ့ၢ်လၢပှၤပာ်လီၤဆါ အၣ်လူတံၢ်အလီၢ်န့ၣ်ပၢ်တဂၤ ဆီၣ်လ့ၣ်ဆ့ၣ်နီၤဖိ ဒီးအလိၤန့ၣ် အဖိခွါဖိနံၤဃဲးဃီးဝဲဒၣ်န့ၣ်လီၤ. ပၢ်တဂၤအံၤကတိၤကသွံတၢ်ဒီးအဖိန့ၣ် နံၤအဆၢတတဲာ်လၢၤဘၣ်န့ၣ်လီၤ.ဖိသၣ်ဖိအံၤ အတၢ်ဆါဖျါလၢအနးဒိၣ်န့ၢ်ဒံး ကံး(သ)ဘၣ်ဆၣ် ဒီဖိပၢ်ခံဂၤ ဃုထံၣ်န့ၢ် တၢ်သူၣ်ခုသးခု တသ့ဖဲအသ့န့ၣ်လီၤ.
ဖံ ၁:၁၂-၁၃ အပူၤ ပကထံၣ်ဘၣ် တၢ်မၢဖိစီၤပီလူး ဘၣ်အိၣ်ခိးတၢ်စံၣ်ညီၣ်အစဲ လၢအဂီၢ် အဆၢကတီၢ်, အတၢ်ကွဲးတဖၣ်လၢဃိာ်ပူၤမ့ၢ်ဂ့ၤ, တၢ်ဒုးဃာ်လၢဟံၣ်ပူၤဂ့ၤ, တၢ်ဂ့ၢ်တအိၣ်လၢ စီၤပီလူး ကသူၣ်ဖှံသးညီတၢ်အဂီၢ်ဘၣ်န့ၣ်လီၤ. စီၤပၤနံရိၣ်မ့ၢ် ပှၤအၢပှၤသီ ဒီးအမံၤဟူသၣ်ဖျါလၢ တၢ်မၤဆူၣ်မၤစိးတၢ် ဒီးတၢ်မၤအၢမၤနးမၤဖှီၣ်တၢ်အဃိ, တၢ်ဘၣ်ယိၣ်ဘၣ်ဘီအိၣ်ဝဲလၢ စီၤပီလူးအဂီၢ်န့ၣ်လီၤ. ဖဲစီၤပီလူး ဘၣ်အိၣ်ယံၤဒီး တၢ်အိၣ်ဖှိၣ်အဆၢကတီၢ် ပှၤစံၣ်တဲၤတဲလီၤတၢ်တနီၤ ဟံးန့ၢ်တၢ်ခွဲးတၢ်ယာ် ဒ်သိးကဃုန့ၢ်နီၢ်ကစၢ်အတၢ်လၤကပီၤအဂီၢ်န့ၣ် ပသ့ၣ်ညါဘၣ်စ့ၢ်ကီးန့ၣ်လီၤ. ဖဲစီၤပီလူး ဘၣ်တၢ်ဒုးဃာ် လၢဃိာ်ပူၤအဆၢကတီၢ် အဝဲသ့ၣ်ဆိကမိၣ်ဝဲဒၣ်လၢ ကဒုးအိၣ်ထီၣ် တၢ်အ့ၣ်လိာ်ဆိးက့လိာ်သးတဖၣ် လၢတၢ်အိၣ်ဖှိၣ်အပူၤန့ၣ်လီၤ.
အဆၢဖိ ၁၈-၂၁ ဒုးသ့ၣ်ညါပှၤလၢ စီၤပီလူးဃုထၢတၢ်သူၣ်ခုသးခု ဒီးစံးဘၣ်ပှၤဖံလံးပံၤဖိတဖၣ်လၢ ကလူၤပိာ်ထွဲအတၢ်ဟ့ၣ်ဒိအိၣ်မူ ဒ် ဖံ ၄:၄ ပာ်ဖျါဝဲအသိး “သးခုလၢကစၢ်အပူၤ တဘိယူၢ်ဃီတက့ၢ်. ယစံးကဒီး-သးခုတက့ၢ်”န့ၣ်လီၤ. ပတၢ်အိၣ်သးတဖၣ် ဖျါတမုာ်တလၤ ဘၣ်ဆၣ်ခဲကနံၣ်အံၤ ကစၢ်ယ့ၣ်ၡူးအိၣ်ဒီးပှၤအဃိ တၢ်အံၤမ့ၢ်တၢ်မၤဂၢၢ်မၤကျၢၤခါဆူညါ ပတၢ်အိၣ်မူ အလၤကပီၤအဂီၢ်န့ၣ်လီၤ. ကစၢ်ခရံာ်လၢ ဂဲၤဆၢထၢၣ်သမူထီၣ်က့ၤ လၢတၢ်သွၣ်ခိၣ်တဂၤန့ၣ် ကဟဲက့ၤဒုးဂဲၤဆၢထၢၣ် အပျဲၢ်အဘီၣ်တဖၣ် ဒ်သိးကအိၣ်ဆိးဒီးအီၤအဂီၢ်န့ၣ်လီၤ. ဒ်ပစးထီၣ် ပမုၢ်နံၤအသီ လၢနံၣ်သီလါသီအပူၤန့ၣ် မ်ပကသူၣ်ခုသးခုတက့ၢ်.
