ဝ့လယၢၣ် ရှဲးနၢၣ် (William Shatner) ဂဲၤဒိဝဲ ဒ်မူဒါခိၣ်ခး (Captain Kirk) လၢ ကွဲၤထံၣ်ဟူပူရဲၣ်အပူၤ, ဘၣ်ဆၣ် တၢ်လဲၤနီၢ်နီၢ်ဆူမူပျီအပူၤအဂီၢ်တခီ အတၢ်ကတဲာ်ကတီၤသးတအိၣ်ဘၣ်. အဝဲဒိးပိာ်ဝဲ တၢ်ယူၤမူဖျၢၣ်အကျိၤ လၢလာ်တဆိ (sub-orbital flight) ဖဲတၢ်ဘူးကလဲၤ လၢခံကတၢၢ် အကတီၢ်ဖိအခါ, ဒီးကိးဝဲအတၢ်လဲၤအံၤ ဒ် “တၢ်လဲၤခီဖျိ အဒိၣ်အယိာ်ကတၢၢ်တခါ လၢယဆိကမိၣ်မှံသ့”န့ၣ်လီၤ. အဝဲဟဲဟးထီၣ် လၢမူပျီ ကဟၣ်ယူၤအပူၤဒီး လၢတၢ်ကမၢကမၣ်ဖးဒိၣ်အပူၤ စံးဝဲ “နထံၣ်ဘၣ်တၢ်အလွဲၢ်လါအဲး လဲၤပူၤနၤလၢ နစုထွဲ အခဲအံၤဧိၤ ဒီးနကွၢ်စူၢ်တၢ်ဆူ တၢ်ခံးသူအပူၤ, တၢ်အံၤတမံၤ လီၤလးဒိၣ်ကဲာ်ဆိးလီၤ” န “ကွၢ်လီၤဒီးလၢနဖီလာ် တၢ်အလွဲၢ်လါအဲး အိၣ်ဝဲဒီး ဆူအဖီခိၣ်တခီ တၢ်အလွဲၢ်သူလီၤ.” ဒီးစံးအါထီၣ်ဝဲ “တၢ်အလွဲၢ်အတၢ်ဃံလၤမးအံၤ အိၣ်ဒၣ် ဘူကဘျံးဒံးဖိ ဒီးနလဲၤဖျိအီၤ လၢတၢ်တစိၢ်ဖိဧိၤအပူၤန့ၣ်လီၤ.”

ပမူဖျၢၣ်အံၤ မ့ၢ်တၢ်အဖျၢၣ်လါအဲးအဆံးဖိတဖျၢၣ် လၢအဘၣ်တၢ်ကဝီၤဃာ်အီၤ ဒီး တၢ်သူခံးလၢာ်လၢာ်ဆ့ဆ့န့ၣ်လီၤ. တၢ်အံၤ မ့ၢ်တၢ်လီၤပျံၤလီၤ. ရှဲးနၢၣ် စံးဝဲ တၢ်ယူၤထီၣ်လၢမူကပိာ်လိၤ လါအဲးဆူ တၢ်သူခံးအပူၤန့ၣ် လီၤဂာ်ဒ်တၢ်ယူၤဆူ တၢ်သံအပူၤန့ၣ်လီၤ. “လၢတၢ်တဘျးဖိအတီၢ်ပူၤ နကစံး ‘အိ… တၢ်အံၤ တၢ်သံလီၤမးလဲၣ်’. တၢ်အံၤ မ့ၢ်တၢ်လၢယထံၣ်တ့ၢ်ယဲလီၤ. တၢ်ထိးဘၣ်ယသးဒိၣ်မးလီၤ. တၢ်လဲၤခီဖျိအံၤ မ့ၢ်တၢ်တမံၤလၢ အလီၤကမၢကမၣ် ဒိၣ်မးန့ၣ်လီၤ”.

ရှဲးနၢၣ် အတၢ်ယူၤ လၢလီၤပျံၤလီၤဖုးဒိၣ်မးအံၤ ဒုးထံၣ်တၢ်အိၣ်မူ ဒ်တၢ်ကြၢးထံၣ်အီၤအသိးန့ၣ်လီၤ. ၁ မိၤ ၁:၃-၄ ပာ်ဖျါဝဲ, ပမ့ၢ်တၢ်ဆံးဆံးဖိတဖၣ် လၢမူဟီၣ်ကယၢအပူၤ, ဘၣ်ဆၣ် ပဘၣ်တၢ်အဲၣ်ပှၤ လၢကစၢ်ယွၤလၢအတ့လီၤ တၢ်ကပီၤဒီးနီၤဖးတၢ်အဆၢလၢတၢ်ခံးန့ၣ်လီၤ. လၢ ယိၤဘး ၃၈:၁၉-၂၀ အပူၤ, ပပၢ်ကစၢ်ယွၤသ့ၣ်ညါဝဲ တၢ်ခံးတၢ်နၤ အိၣ်တၢ်အလီၢ် ဒီးကျဲလၢအပၢၢ်ဆူ အအိၣ်န့ၣ်လီၤ. အဆၢဖိ ၄-၇ န့ၣ် အဝဲ “ပာ်လီၤဟီၣ်ခိၣ်အခီၣ်ထံး… ဆၣ်တူၢ်ဂီၤတဖၣ် သးဝံၣ်တၢ်တပူၤဃီ, ဒီးယွၤအဖိခွါခဲလၢာ် ကိးထီၣ်တၢ်လၢအသူၣ်ဖှံသးညီ” န့ၣ်လီၤ.

မ်ပကသန့ၤဒီးပာ် ပတၢ်အိၣ်မူဆံးဆံးဖိတဖၣ်လၢယွၤ လၢအဟံးဃာ်ပၢၤဃာ် မူဟီၣ် ကယၢဒီဘ့ၣ် လၢအစုပူၤန့ၣ်တက့ၢ်.