ဖဲ ၁၉၄၁ န့ၣ် ဆိၣ်ကရ့ထံး(Socratic)ကရၢ ဘၣ်တၢ်ဒုးအိၣ်ထီၣ်အီၤ ဖဲကီၢ်အဲကလံး, အီးစဖီး (Oxford)ဖၠၣ်စိမိၤလီၤ. တၢ်ဒုးအိၣ်ထီၣ်အီၤ ဒ်သိးကဟ့ၣ်ဂံၢ်ဟ့ၣ်ဘါတၢ်ကတိၤဂ့ၢ်လိာ်လၢ ပှၤနာ်ခရံာ်တဖု ဒီးပှၤတနာ်ယွၤ ပာ်ဖှိၣ်ဒီးပှၤလၢတသ့ၣ်ညါယွၤတဖုလီၤ.
တၢ်တဲးလိာ်ဃိလိာ်ဘၣ်ထွဲ သူၣ်ဂ့ၢ်သးကျိၤန့ၣ် တၢ်တညီနုၢ်မၤအီၤ ဖဲဖၠၣ်စိမိၤလၢတမ့ၢ် ခရံာ်ဖိအတၢ်ကရၢကရိတဖၣ်အပူၤန့ၣ်ဘၣ်. တၢ်လၢလီၤလးတခီ မ့ၢ်ဝဲဆိၣ်ကရ့ထံးကရၢ အပှၤပၢၤလီၢ်ဆ့ၣ်နီၤ မ့ၢ်ဝဲ ခရံာ်ဖိပှၤသ့လံာ် သရၣ်ဖးဒိၣ် စံၣ်.အဲး လူဝံး (C. S. Lewis) ဒီးကဲတ့ၢ် ကရၢခိၣ်(၁၅)နံၣ်လီၤ. ဆၢဝဲလၢ ပှၤကမၤကွၢ်အတၢ်ဆိကမိၣ် ဒီးလူဝံးနာ်ဝဲလၢ တၢ်နာ်ခရံာ်လဲၤခီဖျိတၢ်မၤကွၢ်အီၤ ဃံးထီၣ်ဃံးထီၣ်သ့ဝဲလီၤ. အဝဲသ့ၣ်ညါဝဲလၢ တၢ်နာ်ခရံာ်အံၤ အိၣ်ဒီးအဂ့ၢ်လၢ ပတူၢ်လိာ်အီၤသ့ ဒီးတၢ်မၤသးတဖၣ်လၢ ပဆိကမိၣ်နီၤဖးအီၤ သ့ဝဲဒၣ်န့ၣ်လီၤ.
လၢတၢ်နၢ်ပၢၢ်အီၤသ့န့ၣ်, လူၤဝံး မၤပိာ်ဝဲ စီၤပ့းတရူးအတၢ်ဟ့ၣ်ကူၣ် ပှၤစူၢ်က့ၤနာ်က့ၤတၢ် ခရံာ်ဖိလၢလီၤပြံလီၤပြါတဖၣ် ဒ်တၢ်မၤသ့ၣ်နီၣ်အဝဲသ့ၣ် လၢ ၁ ပ့း ၃:၁၅ အပူၤ “ပာ်စီဆှံကစၢ်ခရံာ်လၢသုသးကံၢ်ပူၤတက့ၢ်. ဒီးကယဲၢ်ပှၤလၢအသံကွၢ်သုလၢ တၢ်မုၢ်လၢ်အိၣ်လၢသုပူၤ အဂ့ၢ်အကျိၤကိးဂၤဒဲးန့ၣ် အိၣ်ကတီၤသုသးထီဘိလၢ တၢ်စံးဆၢ မ့မ့ၢ်လၢတၢ်သူၣ်စူၤသးစူၤဒီး တၢ်ပျံၤတၢ်ဖုးတက့ၢ်”. စီၤပ့းတရူ းပာ်ဖျါတၢ်ဂ့ၢ်ဒိၣ်ခံမံၤ ပအိၣ်ဒီးတၢ်ဂ့ၢ်တၢ်ကျိၤအဂ့ၤလၢ ပတၢ်နာ်ခရံာ်အပူၤ ဒီးပဘၣ်ပာ်ဖျါထီၣ် ပတၢ်ဂ့ၢ်တၢ်ကျိၤပှဲၤဒီး “တၢ်သူၣ်စူၤသးစူၤ” ဒီးတၢ်ပျံၤတၢ်ဖုး(တၢ်ယူးယီၣ်ပးကဲ)န့ၣ်လီၤ.
တၢ်နာ်ကစၢ်ခရံာ် တမ့ၢ်တၢ်ဘူၣ်တၢ်ဘါ လၢတၢ်ပာ်မုာ်အသးလၢကပဒ့ၣ်တၢ်ကီတၢ်ခဲမ့ၢ်ဂ့ၤ တၢ်ဆၢမၤပှဲၤထီၣ် ပသးအတၢ်မိၣ်န့ၢ်တၢ် မ့ၢ်ဂ့ၤဘၣ်. ပတၢ်နာ် အိၣ်သူၣ်လီၤသးလၢ တၢ်စံၣ်စိၤတဲစိၤအဂ့ၢ်အကျိၤအတီအဘၣ် လၢအအိၣ်ဃုာ်ဒီး ခရံာ်အတၢ်ဂဲၤထၢၣ်သမူထီၣ် ဒီးတၢ်ဂ့ၢ်ဘၣ်ထွဲတၢ်ဘၣ်တ့ လၢအုၣ်အသးဒီး တၢ်ဘၣ်တ့အကစၢ်န့ၣ်လီၤ. ဒ်ပသန့ၤလီၤပသးလၢ ယွၤအတၢ်ကူၣ်သ့ ဒီးသးစီဆှံအစိကမိၤန့ၣ်ဒီး မ်ပကကတဲာ်ကတီၤပသးလၢ ပကဟ့ၣ်နီၤတၢ်ဂ့ၢ်လၢ ပနာ်ကစၢ်ဖးဒိၣ်တဂၤ ဒ်လဲၣ်ဒ်လဲၣ်န့ၣ်တက့ၢ်.
