“နကအိၣ်လၢ ယတၢ်ဆိကမိၣ်ဒီး ယတၢ်ထုကဖၣ်အပူၤထီဘိလီၤ”, ဖဲနနၢ်ဟူတၢ်ကတိၤဒ်န့ၣ်ဒီး နကဆိကမိၣ် မ့ၢ်အဝဲကမၤဝဲ အနီၢ်နီၢ်ဧါလီၤ. ဘၣ်ဆၣ် ဖဲအဲးဒနၣ်ဒါဘံး(Edna Davis) တဲတၢ်န့ၣ် တလိၣ်နသးဒ့ဒီဘၣ်. ပှၤကိးဂၤလၢ ဝ့ၢ်ဖိအိၣ်ဒီးတၢ်ခီကျဲ မ့ၣ်ထဲတတီၤန့ၣ် သ့ၣ်ညါ ‘မုၣ်ကနီၤ အဲးဒနၣ်’ အလံာ်ဖါဘီဖိ လၢတကဘျံးဝံၤတကဘျံး, တကျိၤဝံၤတကျိၤအိၣ်ဒီး ပှၤအမံၤတဖၣ်လီၤ. ကိးမုၢ်ဂီၤဒဲးလၢဂီၤဂီၤန့ၣ် ပိာ်မုၣ်သးပှၢ်အံၤ ထုကဖၣ် ယွၤလၢအကလုၢ်ဖးဒိၣ်လီၤ. ပှၤကိးဂၤလၢအဝဲအမံၤစရီပူၤ တန့ၢ်ဘၣ် အတၢ်ထုကဖၣ် တၢ်စံးဆၢဘၣ်. ဘၣ်ဆၣ် ဖဲအဝဲအတၢ်သံတၢ်ဘါန့ၣ် ပှၤအါဂၤအုၣ်အသးလၢ တၢ်မၤအသးဖးဒိၣ်တဖၣ် လၢအဝဲသ့ၣ်အတၢ်အိၣ်မူအပူၤဒီး အဝဲသ့ၣ်စံးဝဲလၢ အဲးဒနၣ် ထုကဖၣ် အဃိ တၢ်မၤအသးလီၤ.

ဖဲစီၤပ့းတရူးဘၣ် တၢ်စၢဃာ်လၢဃိာ်ပူၤန့ၣ် ယွၤဒုးနဲၣ်ဖျါထီၣ် တၢ်ထုကဖၣ်အစိကမီၤလီၤ. ဖဲစီၤပၤဟ့ၤရိာ်အပှၤတဖၣ် ဖီၣ် စီၤပ့းတရူး ဝံၤန့ၣ် တ့ၢ်နုာ်ဝဲဆူဃိာ်ပူၤ အိၣ်ဒီးသုးဖိ တဆံဃုဂၤလၢ ခိးအီၤလွံၢ်ကပၤလိာ်လီၤ (မၤတၢ် ၁၂:၄), တၢ်မုၢ်လၢ်တအိၣ် လၢကထူၣ်ဖျဲးဘၣ်. ဘၣ်ဆၣ် အဆၢဖိ ၅ အပူၤ ပာ်ဖျါ “တၢ်အိၣ်ဖှိၣ် ဘါထုကဖၣ်တၢ်လၢ ယွၤသပှၢ်ပှၢ် လၢအဂီၢ်လီၤ”. စီၤပ့းတရူး အိၣ်လၢအဝဲသ့ၣ်အတၢ်ဆိကမိၣ်ဒီး အတၢ်ထုကဖၣ်အပူၤလီၤ. တၢ်လၢယွၤမၤမ့ၢ် တၢ်လီၤလးဖးဒိၣ်လီၤ. အဆၢဖိ ၇-၁၀ အပူၤ, မူခိၣ်ကလူးလီၣ်ဖျါထီၣ်အသး ဖဲစီၤပ့းတရူးအိၣ်လၢ်ဃိာ်ပူၤ ဒီးပျၢ်ဖျဲးကွံာ်အထးသွဲတဖၣ်. ဒီးဆှၢအီၤပူၤပူၤဖျဲးဖျဲး ခီဖျိဃိာ် အပဲတရီလီၤ.

ပှၤတနီၤစူးကါ “တၢ်ဆိကမိၣ်ဒီး တၢ်ထုကဖၣ်” သ့ဝဲတအိၣ်ဒီး တၢ်မၤအီၤနီၢ်နီၢ်ဘၣ်. ဘၣ်ဆၣ် ပပၢ်သ့ၣ်ညါ ပတၢ်ဆိကမိၣ်, ဒိကနၣ် ပတၢ်ထုကဖၣ်, ဒီးမၤဝဲလၢပဂီၢ် ဒ်အတၢ်ဘၣ်သးအလၢအပှဲၤအသိးလီၤ. ဖဲလၢပမၤန့ၣ် ကစၢ်လၢအစိကမီၤဒိၣ်ဝဲတဂၤ အတၢ်မၤန့ၣ် ပှၤကထုကဖၣ်န့ၢ် ပဂီၢ်ဒီး ပကထုကဖၣ်န့ၢ် ပှၤဂၤအဂီၢ်န့ၣ် တမ့ၢ်တၢ်အဆံးဘၣ်န့ၣ်လီၤ.