ဖဲခိၣ်ရိနၣ်(corona) တၢ်ဆါသံသတြိာ်ဘၣ်ပှၤအကတီၢ် ပဘၣ်အိၣ်စီၤစုၤလိာ်သးဒီး ပဘၣ်အိၣ်လီၤဖျီၣ်အကတီၢ် မၣ်တ့ၣ်လူသၢၣ်ခ့ ကၠူနယၢၣ် (Martin Luther King Jr) အတၢ်ကတိၤလၢ အလံာ် “တၢ်ပရၢလၢ ဘၢမ့ၣ်ဟဲၣ်အဃိာ်” (Letter from a Birmingham Jail) ဖျါလၢမ့ၢ်တီဝဲလီၤ. အဝဲကတိၤတၢ်ဘၣ်ထွဲ ဒီးတၢ်မၤတတီတလိၤအဂ့ၢ်န့ၣ် အဝဲကွဲးဃာ်ဝဲလၢ “အဝဲအိၣ်ဆ့ၣ်နီၤဝဲလၢ ဝ့ၢ်တဖျၢၣ် ဒီးတကိာ်တဂီၤဘၣ်လၢ တၢ်မၤအသးလၢဝ့ၢ်အဂၤတဖျၢၣ် ဒ်တၢ်တဘၣ်ဃးအီၤအသိးန့ၣ် တသ့ဝဲဘၣ်. ပဘၣ်တၢ်ဟံးဃာ်ပှၤ တၢ်ဘၣ်ထွဲလိာ်သးယၢ်ခီယၢ်ခီ လၢပထူၣ်ဖျဲးထီၣ်တသ့ဘၣ်လီၤ. တၢ်စၢဃာ်ပှၤလၢ ပတၢ်လဲၤကျဲကတၢၢ်အယၣ်တဘ့ၣ်ဃီလီၤ. တၢ်လၢဘၣ်ပှၤတဂၤလိၤလိၤန့ၣ် ဘၣ်စ့ၢ်ကီး ပှၤခဲလၢာ်လၢကျဲအဂၤတဘိလီၤ.”

ဒ်န့ၣ်အသိး ကိၣ်ဘ့း-၁၉(COVID-19) တၢ်ဆါသံသတြိာ် မၤဖျါထီၣ် ပတၢ်ဘၣ်ထွဲ ဘၣ်ဃးလိာ်သး ဒ်ပထံၣ်ဘၣ်ဟီၣ်ခိၣ်ဒီဖျၢၣ် ဝ့ၢ်တဖၣ်, ထံကီၢ်တဖၣ် ဘၣ်ကးတံာ်အသး ဒ်သိးကဆိကတီၢ် တၢ်ဆါအဃၢ်န့ၣ်လီၤ. တၢ်လၢမၤဘၣ်ဒိဝ့ၢ်တဖျၢၣ်န့ၣ်, တယံာ်ဘၣ် မၤဘၣ်ဒိဝ့ၢ်အဂၤတဖၣ်စ့ၢ်ကီးလီၤ.

လၢနံၣ်ကယၤတဖၣ်အပူၤကွံာ်န့ၣ် ယွၤတဲဘၣ်တ့ၢ်အပှၤဂီၢ်မုၢ်တဖၣ် လၢကဒုးနဲၣ် အတၢ်သးအိၣ်ဘၣ် ပှၤအဂၤတဖၣ်လီၤ. ခီဖျိ စီၤမိၤရှ့န့ၣ် ကစၢ်ယွၤဟ့ၣ်အံၣ်စရ့လးဖိတဖၣ် တၢ်သိၣ်တၢ်သီ ဒ်သိးကနဲၣ်အဝဲသ့ၣ် ဒီးမၤစၢၤအဝဲသ့ၣ် လၢကအိၣ်သကိး ဒ်သိးသိးလီၤ. အဝဲတဲ, “ဆၢထၢၣ်ထီဒါ ပှၤလၢနဃၢၤအသွံၣ်တဂ့ၤ” (၃ မိၤ ၁၉:၁၆). ဒီးဒ်သိး “သုတမၤအၢဆၢတၢ်တဂ့ၤ, ဒီးဃုမၤကၣ်တၢ် ထီဒါနပှၤဂီၢ်မုၢ်တဂ့ၤ, ဒီးနကဘၣ်အဲၣ်ပှၤလၢနဃၢၤ ဒ်နကစၢ်ဒၣ်နဲအသိးလီၤ” (:၁၈). ယွၤသ့ၣ်ညါအပှၤဂီၢ်မုၢ်တဖၣ် မ့ၢ်တကွၢ်တၢ်လၢပှၤဂၤအဂီၢ်, တပာ်လုၢ်ပာ်ပှ့ၤပှၤဂၤ ဒ်အကစၢ်ဒၣ်ဝဲအသိးန့ၣ် လီၢ်ကဝီၤ, ပှၤတဝၢ ကလီၤမုၢ်ပြံပြါလီၤ.

ပဝဲစ့ၢ်ကီး ပစှီၤဃာ် ယွၤအတၢ်နဲၣ်ကျဲ တၢ်ကူၣ်သ့န့ၢ်ဝဲလီၤ. လၢကိးနံၤ ပတၢ်ဟူး တၢ်ဂဲၤတဖၣ်အပူၤ, ဖဲပဃ့ယွၤလၢ ပကအဲၣ်ဒီး မၤတၢ်ခ့တၢ်ပှၤအတၢ်မၤဂ့ၤ ဆူပှၤဂၤအအိၣ်န့ၣ် မ်ပသ့ၣ်နီၣ်ထီၣ် ပတၢ်ဘၣ်ထွဲဘၣ်ဃးလိာ်သးဒီးပှၤဂၤတဖၣ် အိၣ်ဒ်လဲၣ်န့ၣ်တက့ၢ်.