ဒြူး(Drew) ဘၣ်လီၤဝဲဃိာ်ပူၤခံနံၣ် မ့ၢ်လၢစံၣ်တဲၤတဲလီၤ ကစၢ်ယ့ၣ်ရှူးခရံာ်အဂ့ၢ်အဃိန့ၣ်လီၤ. အဝဲဖးဘၣ်ဝဲ ပှၤမၤတၢ်သးခုကစီၣ်တဖၣ်အဂ့ၢ်အါမး လၢအဝဲသ့ၣ်သူၣ်ခုသးခုဝဲဒၣ်လၢ ဘၣ်တၢ်တ့ၢ်နုာ် အဝဲသ့ၣ်လၢဃိာ်ပူၤအဃိန့ၣ်လီၤ. ဘၣ်ဆၣ် ဒြူးစံးဝဲလၢ တၢ်ဂ့ၢ်သ့ၣ်တဖၣ်န့ၣ် တမ့ၢ် အဝဲအတၢ်လဲၤခီဖျိ, အတၢ်တူၢ်ဘၣ်န့ၣ်ဘၣ်လီၤ. အဝဲစံးဝဲဒၣ် အမါလၢ ကစၢ်ယွၤဃုထၢ ပှၤလၢအကမၣ် ဒ်သိးကတူၢ်ဘၣ်တၢ်နးတၢ်ဖှီၣ်လၢ ကစၢ်ယွၤအဂီၢ်န့ၣ်လီၤ. အမါစံးဆၢအီၤ “တမ့ၢ်ဒ်ဘၣ်. ယဆိကမိၣ် ကစၢ်ယွၤဃုထၢပှၤလၢ ကြၢးဝဲဘၣ်ဝဲတဂၤ ဒီးတမ့ၢ်တၢ်မၤအသးကလီကလီဘၣ်”န့ၣ်လီၤ.

ဒြူးအတၢ်လဲၤခီဖျိအံၤ မ့ၢ်ကလီၤဂာ်ဘၣ်ထွဲ ဒ်ဝံယံးရမံယၤ လၢအမၤ ကစၢ်ယွၤ အတၢ်မၤတီတီလိၤလိၤ ခီဖျိဟ့ၣ်ပလီၢ်ကီၢ်ယူဒၤလၢ ကစၢ်ယွၤ ကစံၣ်ညီၣ်အပှၤဂီၢ်မုၢ် လၢအတၢ်ဒဲးဘးအဃိန့ၣ်လီၤ. တချုး ကစၢ်ယွၤအတၢ်စံၣ်ညီၣ်ဟဲဝဲဒၣ်န့ၣ် ယူဒၤပှၤခိၣ်ပှၤနၢ်တဖၣ် ဒိတီၢ်ဝံယံးရမံယၤ ဒီးဒုးဃာ်အီၤန့ၣ်လီၤ. ဝံယံးရမံယၤ ပာ်တၢ်ကမၣ်လၢကစၢ်ယွၤဒီးစံးဝဲ “ယွၤဧၢ, နကလံာ်ယၤ”န့ၣ်လီၤ. ဝံနာ်ဝဲဒၣ်လၢကစၢ်ယွၤ တအုၣ်က့ၤခီၣ်က့ၤအီၤန့ၣ်ဘၣ်လီၤ(:၇). “အဂ့ၢ်ဒ်အံၤ ဖဲယကတိၤတၢ်တဘျီဘျီန့ၣ်…ယွၤအကလုၢ်ကထါကဲထီၣ် တၢ်ဒုၣ်ဒွဲၣ်အလီၢ် ဒီးတၢ်မၤတရီတပါအလီၢ် လၢယဂီၢ် ကိးမုၢ်နံၤမုၢ်နၤဒဲးလီၤ” (:၈). အဝဲစံးဝဲ“မုၢ်တနံၤလၢယအိၣ်ဖျဲၣ်န့ၣ် မ်အဘၣ်တၢ်ဆိၣ်အၢတက့ၢ်”(:၁၄). “ယဟဲထီၣ်လၢပှၤအဒၢလီၢ်, ဒ်သိးယကထံၣ်ဘၣ် တၢ်မၤကိၢ်မၤဂီၤ ဒီးတၢ်သူၣ်အုးသးအုး, ဒီးဒ်သိးယမုၢ်နံၤတဖၣ် ကလၢာ်ဝဲလၢ တၢ်မဲာ်ဆှးအပူၤန့ၣ် မ့ၢ်အဘၣ်မနုၤလဲၣ်”န့ၣ်လီၤ(:၁၈).

အကတၢၢ်န့ၣ် ပှၤပျၢ်လီၤဒြူးလၢဃိာ်အတၢ်စၢဃာ်ဒီး ခီဖျိဘၣ်တၢ်မၤကွၢ် အကီအခဲအပူၤ အဝဲနၢ်ပၢၢ်ဝဲဒၣ်လၢ ဒ်သိးကစၢ်ယွၤဃုထၢ ဝံယံးရမံယၤအသိးန့ၣ် ကစၢ်ယွၤဃုထၢစ့ၢ်ကီးအီၤန့ၣ်လီၤ. အဂ့ၢ်ဒ်အံၤ အဝဲသ့ၣ် အမ့ၢ်လၢပှၤဂံၢ်စၢ်ဘါစၢ်အဃိ န့ၣ်လီၤ. ဒြူးဒီး ဝံယံးရမံယၤတဖၣ် မ့မ့ၢ်ဘၣ်ဖုး ပှၤဂံၢ်ဆူၣ်ဘါဆူၣ်တဖၣ်န့ၣ် ဘၣ်သ့ၣ်သ့ၣ် ကဒိးန့ၢ်ဘၣ်ဝဲ တၢ်စံးကတိၤပတြၢၤအဝဲသ့ၣ် လၢတၢ်မၤနၢၤတၢ်အဃိန့ၣ်လီၤ. ဘၣ်ဆၣ် အဝဲသ့ၣ် မ့မ့ၢ် ပှၤဂံၢ်စၢ်ဘါစၢ် ဒ်အန့ဆၢၣ်ဒၣ်ဝဲန့ၣ်ဒီး လၢအဝဲသ့ၣ် တူၢ်ဘၣ်ဝဲတၢ်နးတၢ်ဖှီၣ်တဖၣ်အဂီၢ် တၢ်မၤလၤကပီၤတဖၣ် ကတုၤဃီၤဝဲဒၣ်ဆူ ကစၢ်ယ့ၣ်ရှူးခရံာ်အအိၣ်န့ၣ်လီၤ (၁ ကရံၣ်သူး ၁:၂၆-၃၁). ဒြူးအတၢ်ဂံၢ်စၢ်ဘါစၢ်အံၤ ဒုးကဲထီၣ်အီၤလၢ ပှၤလၢပှၤပှဲၤတဂၤလၢ ကစၢ်ယ့ၣ်ရှူးကစူးကါအီၤအဂီၢ်န့ၣ်လီၤ.