ယဝၤနီၣ်ဆှၢပှၤ သိလ့ၣ်ဆူ တၢ်လီၢ်လၢ ပတညီနုၢ်လဲၤအဆၢကတီၢ် အဝဲပာ်သူၣ်ပာ်သးဝဲ စဲးအပီးအလီ ကၠံၣ်ပံၣ်အဲး(စ)(GPS)အတၢ်ဒုးနဲၣ်တၢ်န့ၣ် ပာ်ဖျါဝဲ တၢ်တဘၣ်လိာ်ဘၣ်စးန့ၣ်လီၤ. ဖဲပလဲၤနုာ်လီၤ နီၣ်သိလ့ၣ်ဆူကျဲမုၢ်ဖးဒိၣ်အခါ ကၠံၣ်ပံၣ်အဲး(စ) ဟ့ၣ်ကူၣ်ဝဲလၢ ပကဘၣ်ဟးထီၣ်လၢကျဲမုၢ်ဖးဒိၣ်ဒီး ပိာ်ကျဲဖိလၢ သိလ့ၣ်တခိၣ်လဲၤသ့ ဒီးကျဲအံၤ ပှၤဆိးကါလၢ ပှၤဖံးတၢ်မၤတၢ်အဂီၢ်န့ၣ်လီၤ. ဖဲပလဲၤတၢ်ကအိၣ်မံးလးတဆံဃၣ်ဃၣ် သိလ့ၣ်တဖၣ် လၢကျဲမုၢ်ဖးဒိၣ်အပူၤ လၢအလဲၤသဃဲၤဒီးပှၤန့ၣ် ဘူးတံၢ်မးလၢ ကဘၣ်အိၣ်ပတုာ် ခီဖျိတၢ်ဂ့ၢ်ကီလၢ တၢ်တ့ဘှီကျဲအတၢ်မၤဖးဒိၣ်အဃိန့ၣ်လီၤ. ကျဲဖိလၢပပိာ် တဘိန့ၣ် သိလ့ၣ်လဲၤထီၣ်က့ၤလီၤစှၤအဃိ ဒုးကဲထီၣ်ပတၢ်လဲၤဘျ့ဘျ့ဆှီဆှီန့ၣ်လီၤ. ယဝၤ ဒဲၣ်(Dan)စံးဝဲ “ယတထံၣ်ဆိ တၢ်ကမၤအသး ခါဆူညါဘၣ်ဆၣ် ကၠံၣ်ပံၣ်အဲး (GPS) ထံၣ်ဆိဝဲ”န့ၣ်လီၤ. “ဒ်ကစၢ်ယွၤထံၣ်ဆိ ခါဆူညါအသိး”, ပအၢၣ်လီၤတူၢ်လိာ်ကိးဂၤဒဲးန့ၣ်လီၤ.

ကစၢ်ယွၤထံၣ်သ့ၣ်ညါဆိ တၢ်ကမၤအသးလၢခါဆူညါအဂီၢ်အဃိ ကစၢ်ယွၤဆီတလဲ ပှၤမၤကူးပှၤကူၣ်သ့လၢ မုၢ်ထီၣ်တဖၣ် အတၢ်က့ၤကျဲန့ၣ်လီၤ. မးသဲ ၂:၂ ပာ်ဖျါဝဲ “ပှၤအိၣ်ဖျဲၣ်ယူဒၤအစီၤပၤ” အိၣ်ဖဲလဲၣ်န့ၣ်လီၤ. စီၤပၤဟ့ၤရိာ်အသးတံာ်တာ်ဝဲဘၣ်ဃး ဒီးတၢ်ကစီၣ်လၢ စီၤပၤအထီဒါပၢဆှၢတၢ်တဂၤအဂ့ၢ်အဃိ စံးကတိၤကဘျံးကဘျၣ် ပှၤမၤကူးဖိတဖၣ် ဒီးမၢအလဲၤဝဲဆူ ဝ့ၢ်ဘ့ၤသလ့ဃ့ၣ်န့ၣ်လီၤ. မး ၂:၈ ပာ်ဖျါဝဲ စီၤပၤဟ့ၤရိာ်အတၢ်ကတိၤ “လဲၤသံကွၢ်တၢ်လီၤတံၢ်လီၤဆဲးလၢ ဖိသၣ်န့ၣ်အဂ့ၢ်အကျိၤတက့ၢ်. ဒီးသုထံၣ်န့ၢ်အီၤဒီး, ဒ်သိးယကလဲၤစ့ၢ်ကီး ဘူၣ်ထီၣ်ဘါထီၣ်အီၤဒီး, စံးဘၣ်က့ၤယၤတက့ၢ်” န့ၣ်လီၤ. အဆၢဖိ ၁၂ ပာ်ဖျါဝဲ ကစၢ်ယွၤအတၢ်ဟ့ၣ်ဒုးပလီၢ် ခီဖျိတၢ်မံမီၢ် “ဒီးတၢ်သိၣ်အီၤ လၢတၢ်မံမီၢ်အပူၤ, ဒ်သိးအသုတက့ၤကဒါက့ၤဆူ စီၤဟ့ၤရိာ်အအိၣ်တဂ့ၤ သတးဒီး, က့ၤက့ၤဝဲဆူ အထံအကီၢ်ဒၣ်ဝဲ
လၢကျဲအဂၤတဘိ”န့ၣ်လီၤ.

ကစၢ်ယွၤဒုးနဲၣ် ပခီၣ်ခါစ့ၢ်ကီးန့ၣ်လီၤ. ဖဲပလဲၤတၢ်လၢ ပတၢ်အိၣ်မူ အတၢ်လဲၤကျဲမုၢ်ဖးဒိၣ် အကတီၢ် ပနာ်ကစၢ်ယွၤသ့လၢ အဝဲထံၣ်သ့ၣ်ညါဆိတၢ် ခါဆူညါလၢပဂီၢ်ဒီး ဒ်လံာ်ကတိၤဒိ ၃:၆ ပာ်ဖျါဝဲ “ဒီးအဝဲဒၣ် ကမၤလိၤနကျဲလီၤ” အသိးန့ၣ် ပမ့ၢ်သန့ၤပသး ဒီးသ့ၣ်ညါယွၤလၢ ပကျဲခဲလၢာ်အပူၤန့ၣ်ဒီး ပကအိၣ်ဂၢၢ်ဆိးကျၢၤ လၢတၢ်နာ်ကစၢ်ယွၤတမံၤဧိၤန့ၣ်လီၤ.