“ပှၤလၢအမ့ၢ် (စီၤဝါ) အနီၢ်ကီၢ်, ဝံသးစူၤ ဆၢထၢၣ်ဘၣ်တက့ၢ်.” အဝဲအံၤန့ၣ်တၢ်ကတိၤတဘီလၢပနၢ်ဟူညီနုၢ်အီၤ ဖဲပကွၢ်ကွဲၤထံၣ်ဟူဖျါတၢ်လိၥ်ကွဲအတၢ်ဒုးနဲၣ် “တဲတၢ်တီတီ” အကတၢၢ်န့ၣ်လီၤ. ပှၤမံၤဟူသၣ်ဖျါလွံၢ်ဂၤတဖု သံကွၢ်ဝဲဒၣ်ပှၤသၢဂၤလၢအစံးလီၤအသး လၢအဒိ, သါမ့ၢ်စီၤဝါန့ၣ်လီၤ. ပှၤသၢဂၤအကျါခံဂၤမ့ၢ်ပှၤလီတၢ်လီၤ. ဘၣ်ဆၣ်, တၢ်အံၤမ့ၢ် တၢ်လၢပှၤသံကွၢ်တၢ်တဖု ကဘၣ်နီၤဖးမၤဖျါ စီၤဝါအမ့ၢ်အတီတဂၤလီၤ. လၢတၢ်ဒုးနဲၣ်အကူၥ်တခါအပူၤန့ၣ်, ပှၤမံၤဟူသၣ်ဖျါတဖုအံၤ ဂုၥ်ကျဲးစၢးတယၥ် ဃုသ့ၣ်ညါဝဲ ကၠီနံၣ် မး(စ) (Johnny Marks) အမ့ၢ်အတီတဂၤ လၢအကွဲးတၢ်သးဝံၣ် “Rudolph the Red-Nosed Reindeer” အဖျၢၣ်တဖၣ်န့ၣ်လီၤ. ပှၤမံၤဟူသၣ်ဖျါတဖုအံၤ ထံၣ်ဝဲဒၣ်လၢ ပကသ့ၣ်ညါပှၤမတၤမတၤလဲၣ်န့ၣ် ကီဝဲဒၣ်ဒိၣ်မး, ဖဲကသံကွၢ်အီၤ တၢ်သံကွၢ်အကီအခဲသ့ၣ်တဖၣ်ဒၣ်လဲၥ်န့ၣ်လီၤ. ကွဲၤဟူထံၣ်ဖျါတၢ်မၤမဲၥ်မုၥ်ဖှံသးရဲၣ်ကျဲၤတခါအံၤ ကကဲထီၣ်အဂီၢ် ပှၤဟဲဒုးနဲၣ်လိၥ်ကွဲတၢ်တဖၣ် ကျဲးစၢးပၥ်မၤအသးဒ်ပှၤအမ့ၢ်အတီတဂၤအသိးန့ၣ်လီၤ.

တၢ်သ့သ့ၣ်ညါနီၤဖး ဝံဘျၣ်သရၣ်ဘျၣ်တဖၣ်န့ၣ်, လီၤဆီဝဲဒၣ်ဒိၣ်မးဒီး ကွဲၤထံၣ်ဟူဖျါတၢ်လိၥ်ကွဲအတၢ်ဒုးနဲၣ်န့ၣ်လီၤ. ဘၣ်ဆၣ်တၢ်အံၤမ့ၢ် တၢ်လၢအတၤပှၤဒ်သိးသိး, ဒီးအကါဒိၣ်မးသပှၢ်တၢၢ်န့ၣ်လီၤ. ထွံၣ်မံၤလၢအဒူဝဲတဖၣ်န့ၣ် အါဘျီဟဲဆူပအိၣ် သိးဒီးသိအကူအသိးန့ၣ်လီၤ. ဒီးကစၢ်ယ့ၣ်ရှူးဟ့ၣ်ပလီၢ် ပှၤကူၣ်သ့လၢပသိးပကျါဒၣ်လဲၥ် ဒ်သိးကပလီၢ်အသးန့ၣ်လီၤ (မး ၇:၁၅). တၢ်မၤကွၢ်အဂ့ၤကတၢၢ်န့ၣ် တမ့ၢ်ခီဖျိတၢ်သံကွၢ်တဖၣ်ဘၣ်. မ့မ့ၢ်ခီဖျိ မဲၥ်ချံလၢကွၢ်တၢ်အဂ့ၤတဖၣ်လီၤ. ကွၢ်အတၤသၣ်တက့ၢ်. အန့ၣ်ဒီးနသ့ၣ်ညါနီၤဖးပၥ်ပနီၣ်အဝဲသ့ၣ်ကသ့ဝဲဒၣ်လီၤ (:၁၆-၂၀).

လံၥ်စီဆှံမၤစၢၤပှၤဒ်သိးပကထံၣ်တၤသၣ်လၢအဂ့ၤဒီးတၤသၣ်လၢအတဂ့ၤတဖၣ်လီၤ. တၤသၣ်လၢအဂ့ၤတဖၣ်န့ၣ်လီၤဂၥ်ဒီး “တၢ်အဲၣ်တၢ်ကွံ, တၢ်သူၣ်ခုသးခု, တၢ်ဃူတၢ်ဖိး, တၢ်ဝံသးစူၤ, တၢ်သူၣ်စူၤသးစူၤ, တၢ်မၤဂ့ၤတၢ်, တၢ်စူၢ်တၢ်နၥ်, တၢ်ဆီၣ်လီၤပသး, တၢ်ကီၤသူၣ်ကီၤသးသ့ၣ်တဖၣ်န့ၣ်လီၤ(ကလၤ ၅:၂၂-၂၃). ပဘၣ်ခိးကွၢ်ဘူးဘူးတံၢ်တံၢ်လီၤတံၢ်လီၤဆဲးလီၤ, မ့ၢ်လၢထွံၣ်မံၤတဖၣ် လီန့ၢ်တၢ်အဃိလီၤ. ဘၣ်ဆၣ်, ဒ်ပမ့ၢ်ပှၤစူၢ်က့ၤနၥ်က့ၤတၢ်တဖၣ်အသိး, ပအိၣ်လၢပှဲၤဒီးသးစီဆှံ ဒီးပမၤပှၤကွၢ်သိလၢအဂ့ၤတဂၤနီၢ်နီၢ် လၢအပှဲၤဒီး တၢ်ဘျုးတၢ်ဖှိၣ်ဒီးတၢ်မ့ၢ်တၢ်တီတဂၤအတၢ်လီၤ (ယိၤ ၁:၁၄).