ပှၤကိးဂၤဒဲးလၢတီၤထီကၠိန့ၣ် ဘၣ်သူၣ်ဘၣ်သး ကၠဲး(Jack)အတၢ်ပာ်သးဖှံဖှံညီညီ ဒီးအတၢ်သ့တၢ်ဘၣ်လၢတၢ်လိၣ်ခိၣ်လိာ်ကွဲန့ၣ်လီၤ. အဝဲအသးခုကတၢၢ်အကတီၢ် မ့ၢ်ဖဲအအိၣ်လၢကလံၤကျါ လၢတၢ်တစွၤလီၤလၢအအိၣ် ‘U’အက့ၢ်အဂီၤအဖီခိၣ်, အစုတခီဟံးဃာ် အနီၣ်တလူၣ်ဘ့ၣ်ဘၣ် (skakeboard) ဒီးအဂၤတခီ ယူာ်ထီၣ်ဃာ်လၢ တၢ်ဒီပၢၤအနီၢ်ခိအဂီၢ်န့ၣ်လီၤ.

ကၠဲး ဃုထၢပိာ် ကစၢ်ယ့ၣ်ရှူးအခံ ဖဲအဝဲစးထီၣ်လဲၤထီၣ်လီၢ်ကဝီၤ တၢ်အိၣ်ဖှိၣ်တဖုဝံၤအလီၢ်ခံန့ၣ်လီၤ. တုၤအကတီၢ်ဖဲန့ၣ်န့ၣ်, အဝဲတူၢ်ဘၣ်တ့ၢ် ဟံၣ်ဖိဃီဖိအတၢ်ဂဲၤလိာ်ကီခဲဒိၣ်ဒိၣ်မုၢ်မုၢ်, ဒီးအဝဲသူတ့ၢ် ကသံၣ်မူၤဘှိးတဖၣ်လၢ အကမၤစၢ်လီၤ အတၢ်ဘၣ်ဒိဆါတဖၣ်အဂီၢ်လီၤ. အဝဲဆီတလဲအတၢ်စူၢ်တၢ်နာ်ဝံၤအလီၢ်ခံ တစိၢ်ဖိန့ၣ်, ဖျါလၢတၢ်လဲၤအသးဂ့ၤဂ့ၤဘၣ်ဘၣ်လၢအဂီၢ်လီၤ. ဘၣ်ဆၣ်ဒီး နံၣ်တဖၣ် လဲၤပူၤကွံာ်ဝံၤအလီၢ်ခံ, အဝဲစးထီၣ်သူက့ၤကဒီး ကသံၣ်မူဘှိးတဖၣ်န့ၣ်လီၤ. တၢ်နုာ်လီၤမၤစၢၤလၢအကြၢးအဘၣ် ဒီးတၢ်ကူစါယါဘျါတဖၣ် တအိၣ်ဘၣ်အဃိ, တဆီဘၣ်တဆီန့ၣ် အဝဲသံဝဲလၢ အသူကသံၣ်အါကဲၣ်ဆိးအဃိန့ၣ်လီၤ.

ဖဲပဘၣ်ကွၢ်ဆၢၣ်မဲာ်တၢ်ကီတၢ်ခဲအခါ, တၢ်ညီလၢပကဃၣ်ကဒါက့ၤဆူ တၢ်လၢအညီနုၢ်ဒီးပှၤန့ၣ်လီၤ. ဖဲအံၣ်စရ့လးဖိတဖၣ် သူၣ်ကိၢ်သးဂီၤဒီးပျံၤဝဲဖုးဝဲလၢ ပှၤအၤရှူၢ်ဖိတဖၣ် တယံာ်ဘၣ် ကဟဲမၤဒၢၣ်မၤဆူၣ်အဝဲသ့ၣ်အခါ, လၢတၢ်မၤစၢၤအဂီၢ် အဝဲသ့ၣ်စွါက့ၤကဒါအခိၣ်ဆူ ပှၤအဲၤကူပတူးဖိတဖၣ် လၢတဘျီမ့ၢ်တ့ၢ်အကုၢ်ကစၢ်အအိၣ်န့ၣ်လီၤ (ယရှါ ၃၀:၁-၅). ယွၤစံးဆိပာ်လၢတၢ်အံၤကမ့ၢ်တၢ်ဟးဂူာ်ဟးဂီၤဖးဒိၣ်, ဘၣ်ဆၣ် ဖဲ အဝဲသ့ၣ်ဃုထၢကမၣ်တၢ်နာ်သက့, ယွၤအံးထွဲကွၢ်ထွဲသူၣ်အိၣ်သးအိၣ် အဝဲသ့ၣ်ဒံးန့ၣ်လီၤ. ဝံယရှါယၤ တဲဖျါထီၣ် ယွၤအသူၣ်အသးဒ်အံၤ “ယွၤကအိၣ်ခိး ဒ်သိးအကသး ကညီၤသု, ဒီးမၤသးဒ်န့ၣ်ဒီး ကဂဲၤဆၢထၢၣ် ဒ်သိးအကသးအိၣ်သုလီၤ” (:၁၈).

တၢ်အံၤမ့ၢ်ယွၤအတၢ်ပာ်သူၣ်ပာ်သးလၢပဖီခိၣ်, ဖဲပဃုထၢကွၢ်ဃီၤဆူ တၢ်အဂုၤအဂၤ ဒ်သိးပကမၤစၢ်လီၤ ပတၢ်ဘၣ်ဒိဆါအဂီၢ်ဒၣ်လဲာ်န့ၣ်လီၤ. ယွၤအဲၣ်ဒိးမၤစၢၤပှၤလီၤ. အဝဲတအဲၣ်ဒိးဝဲလၢ ပကမၤဆါလီၤက့ၤပသးဒီး လုၢ်လၢ်တဖၣ်လၢ အဒုးကဲထီၣ် တၢ်စၢဃာ်န့ၣ်ဘၣ်. ကသံၣ်မူၤဘှိးဒီးတၢ်ဟူးတၢ်ဂဲၤတနီၤန့ၣ် ကွဲန့ၢ်လွဲန့ၢ်ပှၤလၢ တၢ်မၤကိညၣ်ထီၣ်တၢ်ချ့ချ့န့ၣ်လီၤ. ဘၣ်ဆၣ် ယွၤအဲၣ်ဒိးဟ့ၣ်ပှၤတၢ်ဘျါက့ၤနီၢ်နီၢ် ဒ်ပလဲၤတၢ်ဘူးဘူးတံၢ်တံၢ် ဒီးအီၤန့ၣ်လီၤ.