လၢတၢ်ဃုပာ်ပနီၣ် ဖိသၣ်တနီၤလၢအအိၣ်လၢကျဲခိၣ်, လၢဝ့ၢ်မၢၣ်ဘါ (Mumbai), ကီၢ်အ့ၤဒယၢၣ်(India)အဂီၢ်, ရဲၣ်ကၠ့း(Ranjit)တ့ထီၣ်တၢ်သးဝံၣ်တယုၢ်လၢ အဝဲသ့ၣ်အမံၤတဖၣ်န့ၣ်လီၤ. မံၤကိးဖျၢၣ်ဒဲးအဂီၢ် ထါအသီၣ်မုာ်ဒီး လီၤဆီန့ၣ်အိၣ်ဝဲလီၤ. အဝဲသိၣ်လိန့ၢ် အဝဲသ့ၣ်တၢ်သးဝံၣ်အသီၣ်အံၤ, ဒီးမုၢ်လၢ်ဝဲလၢကဟ့ၣ်အဝဲသ့ၣ် တၢ်သ့ၣ်နီၣ်လၢအဂ့ၤတကပၤ, ဘၣ်ထွဲဒီးအမံၤ ဒ်တၢ်ကိးအီၤန့ၣ်လီၤ. ဖိသၣ်တဖၣ်လၢ အတညီနုၢ်နၢ်ဟူ အမံၤဘၣ်တၢ်ကိးအီၤလၢ တၢ်အဲၣ်အပူၤတဖၣ်အဂီၢ်န့ၣ်, အဝဲဟ့ၣ်လီၤ တၢ်ပာ်ကဲအတၢ်ဟ့ၣ်တမံၤအံၤန့ၣ်လီၤ.

လၢလံာ်စီဆှံအပူၤ, ပှၤအမံၤတဖၣ်အကါဒိၣ်ဝဲ, အါစုအါဘျီ ပာ်ဖျါထီၣ်က့ၤ ပှၤတဂၤအသကဲာ်ပဝး မ့တမ့ၢ် အမူဒါအသီလၢ အလီၤဘၣ်အီၤန့ၣ်လီၤ. အဒိ, ယွၤလဲလိာ် စီၤအၤဘြၣ်ဒီး နီၢ်စၤရဲအမံၤတဖၣ်, ဖဲအဝဲမၤတၢ်အဲၣ်အတၢ်အၢၣ်လီၤအီလီၤ ဒီးအဝဲသ့ၣ်, ဒီးအၢၣ်လီၤဝဲလၢ အဝဲကမ့ၢ် အဝဲသ့ၣ်အယွၤဒီး အဝဲသ့ၣ်ကကဲထီၣ်အပှၤဂီၢ်မုၢ်န့ၣ်လီၤ. စီၤအၤဘြၣ်, လၢအခီပညီ မ့ၢ် “ပှၤအါကလုာ်အပၢ်” န့ၣ်လီၤ. ဒီးနီၢ်စၤရဲ အခီပညီမ့ၢ် “နီၢ်ပၤမုၣ်ဖိ”, ကဲထီၣ်နီၢ်စၤရါ အခီပညီမ့ၢ်ဝဲ :“ပှၤအါကလုာ်အနီၢ်ပၤမုၣ်ဖိ”န့ၣ်လီၤ (ကွၢ်ဖဲ ၁ မိၤရှ့ ၁၇:၅,၁၅).

မံၤအသီတဖၣ်လၢ ယွၤဟ့ၣ်ဝဲန့ၣ် ပၣ်ဃုာ်ဒီး တၢ်ဘျုးတၢ်ဖှိၣ်အတၢ်အၢၣ်လီၤ လၢအဝဲသ့ၣ်တဖၣ် တမ့ၢ်ပှၤလၢအဖိတအိၣ်တဖၣ်လၢၤဘၣ်န့ၣ်လီၤ. ဖဲနီၢ်စၤရါဆံးစၢ်အဖိခွါအခါ, အဝဲသ့ၣ်သူၣ်ခုသးခုဒိၣ်မး ဒီးယုၢ်န့ၢ်အမံၤလၢ စီၤအံၤစဲး အခီပညီမ့ၢ် “အဝဲနံၤဝဲ”န့ၣ်လီၤ. “နီၢ်စၤရါ စံးဝဲဒၣ်, ယွၤဒုးနံၤယၤလီၤ. ကယဲၢ်ပှၤလၢအနၢ်ဟူခဲလၢာ်န့ၣ် ကနံၤဃုာ်ဒီးယၤလီၤ” (၁ မိၤ ၂၁:၆).

ပပာ်ဖျါထီၣ် တၢ်မၤလၤကပီၤ ဒီးတၢ်ယူးယီၣ်ပာ်ကဲဆူပှၤဂၤအအိၣ်, ဖဲပကိးအဝဲသ့ၣ်လၢ အမံၤဒီး မၤဂၢၢ်မၤကျၢၤ ဒ်အမ့ၢ် ယွၤအတၢ်ဘၣ်တ့တဖၣ်န့ၣ်လီၤ. မံၤဖိသၣ်လၢ တၢ်ကိးအီၤလၢ တၢ်အဲၣ်အပူၤစ့ၢ်ကီး ကမ့ၢ်တၢ်တမံၤဃီ ဒ်တၢ်ပာ်ဂၢၢ်ပာ်ကျၢၤ ပှၤတဂၤအကံၢ်အစီလီၤဆီတဖၣ် ဒ်အဘၣ်တၢ်တ့ဃာ်အီၤလၢယွၤအက့ၢ်အဂီၤအသိးန့ၣ်လီၤ.