ဖဲ ၁၈၈၉ နံၣ်န့ၣ်, တၢ်သူၣ်ထီၣ် ဟံၣ်အတၢ်တိာ်ကျဲၤ ဟဲအိၣ်ထီၣ် ဖဲကီၢ်အမဲရကၤလီၤ. ဖဲတၢ်မၤလီၢ်န့ၣ်, စဲးဖီကဟၣ် ထုးထီၣ် ဒၢးခီ/အူးခဲ(brick)တနံၤန့ၣ် အဖျၢၣ် ၃၂,၀၀၀ လီၤ. တၢ်မၤဝဲန့ၣ် မၤဘၣ်တၢ်ဆူညါ ဃုနံၣ် တုၤ ကၠီးဘဲ(န)ဒါဘဲး ခံဂၤတဂၤ (George Vanderbilt II) အ “တၢ်ယီၤခါဟံၣ်” ဝံၤဝဲတစု, န့ၣ်လီၤ. ဘ့(လ)မီ ဟီၣ်ခိၣ်လီၢ်ကဝီၤ (Biltmore Estate) လၢအအိၣ်လၢ ဝ့ၢ်အး(ရှ)ဘ့လၣ် (Ashevilla), လၢကီၢ်စဲၣ်ခဲရိလဲနၤကလံၤစိး(North Carolina) ဟဲအိၣ်ထီၣ်ဝဲလီၤ. တုၤမုၢ်မဆါတနံၤတစု, တၢ်လီၢ်ဝဲန့ၣ် မ့ၢ်တၢ်အိၣ်ဆိးလီၢ်အဒိၣ်ကတၢၢ်လၢ ကီၢ်အမဲရကၤအပူၤ, ဒီးဒၢးအိၣ်ဝဲ အဖျၢၣ်၂၅၀ (ပာ်ဃုာ်လီၢ်မံဒၢး ၃၅ ဒၢး ဒီးတၢ်လုၢ်ထံဒၢး ၄၃ ဒၢး) လၢအဟံးန့ၢ် တၢ်လီၢ် ၁၇၈,၉၂၆ စကွဲယါပ့ၣ်န့ၣ်လီၤ.

တၢ်မၤအံၤ, နထိၣ်သတြီၤဒီး တၢ်သူၣ်ထီၣ်လၢ ယ့ၣ်ရှူးစံးဘၣ်တဲဘၣ် အပျဲၢ်အဘီၣ်တဖၣ် လၢအဖျါဝဲဖဲ မးသဲ ၁၆ န့ၣ် တန့ၢ်ဘၣ်. ဖဲ စီၤပ့းတရူးမၤလီၤတံၢ်ဝဲလၢ ယ့ၣ်ရှူးမ့ၢ် “မ့းရှံအၤ, ယွၤလၢအမူဝဲအဖိခွါ”လီၤ (:၁၆). ဝံၤအလီၢ်ခံန့ၣ်, ယ့ၣ်ရှူးတဲဖျါထီၣ်ဝဲလၢ “နမ့ၢ် ပ့းတရူး, ဒီးယကပာ်လီၤ ယတၢ်အိၣ်ဖှိၣ်လၢ လၢၢ်အံၤအဖီခိၣ်, ဒီးပျုၤပူၤ အပဲတရီတဖၣ် တမၤနၢၤမၤဃၣ်ဘၣ်အီၤဘၣ်”(:၁၈). ဖဲပှၤမၤလိထူဂ့ၢ်ယွၤဂ့ၢ်တဖၣ် ကတိၤဂ့ၢ်လိာ်သးဘၣ်ဃး ‘လၢၢ်’အံၤ အတၢ်မ့ၢ်တၢ်အခါ, ဘၣ်ဃး ယ့ၣ်ရှူးအတၢ်တိာ်ကျဲၤအဂ့ၢ်အဖီခိၣ် တၢ်ကတိၤဂ့ၢ်လိာ်တအိၣ်ဘၣ်. အဝဲကသူၣ်ထီၣ်အတၢ်အိၣ်ဖှိၣ် ကမၤလဲၢ်အလီၢ် တုၤဟီၣ်ခိၣ်အကတၢၢ်လီၤ (မး ၂၈:၁၉-၂၀). ပာ်ဃုာ်ပှၤကိးကလုာ်ဒီး, ပှၤကတိၤတၢ်ကျိာ်လၢ ဟီၣ်ခိၣ်ခဲလၢာ်လီၤ (လီၣ် ၅:၉).

တၢ်သူၣ်ထီၣ်အတၢ်တိာ်ကျဲၤ အလုၢ်အပှ့ၤမ့ၢ်ထဲလဲၣ်. မ့ၢ်ဝဲယ့ၣ်ရှူးအနီၢ်ကစၢ်အသွံၣ်ခီဖျိ အတၢ်တူၢ်သံသးလၢသ့ၣ်ဖျၢၣ်ထူၣ်လိန့ၣ်လီၤ (မၤ ၂၀:၂၈). ဒ်ယ့ၣ်ရှူးအတၢ်သူၣ်ထီၣ် အကရၢဖိတဖၣ်, လၢအဘၣ်တၢ်ပှ့ၤက့ၤဒီးအလုၢ်အပှ့ၤဒိၣ်မးအဃိ, မ်ပကမၤလၤကပီၤသကိး ကစၢ်အတၢ်အဲၣ်ဟ့ၣ်လီၤသး ဒီးနုာ်လီၤမၤသကိးတၢ်ဒီးအီၤလၢတၢ်မၤဖးဒိၣ်အံၤတက့ၢ်.