ပှၤတဂၤစုာ်စုာ် လၢဟီၣ်ခိၣ်ချၢပှ့ၤန့ၢ် လဲးကိၢ်(Lego) ဖိသၣ်တၢ်လိာ်ကွဲ ပလးစတ့း (plastic)ကိၣ်လိၣ်ဖိ အခါ ၁၀ ဃၣ်ဃၣ် ကိးနံၣ်ဒဲး – အါန့ၢ်အကကွဲၢ်ကထိနွံဆံယဲၢ်ဘျီ(75 Billion)လီၤ. ဘၣ်ဆၣ် မ့တမ့ၢ်လၢပှၤဒဲးန့း(Danish)ဖိပှၤဘှီဖိသၣ် တၢ်လိာ်ကွဲ အီလံၣ်ခဲး ခရံးစထံၣ်ယၢၣ်စၢၣ် (Ole Kirk Christiansen) အတၢ်သးစွံကတုၤဘၣ်န့ၣ်, လဲးကိၢ်ကိၢ်လိၢ်ဖိလၢ တၢ်ကဆဲးဒုးကဲထီၣ်တၢ် တမ့ၢ် ကအိၣ်နီတခါဘၣ်.
ခရံးစထံၣ်ယၢၣ်စၢၣ် ဂုာ်ကျဲးစၢး မၤတၢ်သပှၢ်ပှၢ် ဖဲ ကီၢ်ဒဲမး(Denmark) အဝ့ၢ်ဘ့ၤလၢ်(Billund) လၢနံၣ်အဆံအါမးအပူၤ, တချုးဒံးအမၤကဲထီၣ် “Leg Godl” လၢအခီပညီမ့ၢ် “လိာ်ကွဲဂ့ၤဂ့ၤ”န့ၣ်လီၤ. အဝဲအတၢ်မၤလီၢ် မ့ၣ်အူ အီၣ်ဟးဂီၤခံဘျီညါလီၤ. အဝဲအိၣ်ဒီးကျိၣ်စ့အတၢ်လၢာ် စီဖ့ကလ့ၤ ဒီးတူၢ်ဘၣ် ဟီၣ်ခိၣ်ဒီဖျၢၣ် တၢ်ဒုးလၢ ဒုးအိၣ်ထီၣ် တၢ်ပီးတၢ်လီ အတၢ်တလၢတလီၢ်န့ၣ်လီၤ. လၢခံကတၢၢ်, ဖဲ ၁၉၄၀ နံၣ် အလီၢ်ခံတဖၣ်န့ၣ်, အဝဲမၤန့ၢ် တၢ်ထံၣ်ဘၣ်ဃး “နီၢ်ကစၢ်ဘျးစဲဃာ်ဒၣ်တၢ်” ပလးစတ့းကိၢ်လိၢ်ဖိတဖၣ်လီၤ. (ခရံးစထံၣ်ယၢၣ်စၢၣ်)သံဖဲ ၁၉၅၈ အနံၣ်န့ၣ်, ‘လဲးကိၢ်’ဖျါကဲထီၣ် ဟံၣ်ဖိဃီဖိအတၢ်ကတိၤအဖျၢၣ်လီၤ.
လၢတၢ်ဖံးတၢ်မၤဒီး သးသမူအတၢ်တၤတဖၣ်အပူၤ, တၢ်ပာ်သးစွံကတုၤ မ့ၢ်တၢ်လၢ အကီအခဲသ့ဝဲလီၤ. တၢ်ဂ့ၢ်ဒ်န့ၣ်သိး, မ့ၢ်ဝဲတီဝဲစ့ၢ်ကီးလၢ ပနီၢ်သးတၢ်အိၣ်မူပူၤ ဖဲပဂုာ်ကျဲးစၢး ဒိၣ်ထီၣ်လီၤဂာ်ဒီး ယ့ၣ်ရှူးန့ၣ်လီၤ. တၢ်ကီတၢ်ခဲဘၣ်ပှၤ, ဒီးပလိၣ်ဘၣ်ယွၤအဂံၢ်အဘါ ဒ်သိးပကမၤတၢ်လၢတၢ်သးစူၤအပူၤလီၤ. ပှၤတၢ်မၢဖိစီၤယၤကိာ်ကွဲးဝဲလၢ ‘ပှၤလၢအဒိးဘၣ်တၢ်လ့ပစီန့ၣ်ဘၣ်ဆိၣ်ဂ့ၤဝဲလီၤ’(ယၤကိာ် ၁:၁၂)လီၤ. တဘျီတခီၣ် တၢ်လ့ပစီလၢ ပကွၢ်ဆၢၣ်မဲာ် ကဲထီၣ်တၢ်နီးတၢ်ဘျး လၢတၢ်ရ့လိာ်ဘၣ်ထွဲအပူၤ မ့တမ့ၢ် ကျိၣ်စ့အဂ့ၢ် မ့တမ့ၢ် တၢ်အိၣ်ဆူၣ်အိၣ်ချ့အပူၤလီၤ. တဘျီတခီၣ်, မ့ၢ်တၢ်လ့ပစီတဖၣ်လၢ အမၤဃၢမၤစုာ်ပှၤလၢ ပတၢ်မၤလၤကပီၤယွၤခီဖျိ ပတၢ်အိၣ်မူအပူၤလီၤ.
ဘၣ်ဆၣ် ယွၤအၢၣ်လီၤပှၤလၢ တၢ်ကူၣ်သ့သးဆးလၢ တၢ်ဆၢကတီၢ် ဒ်သိးန့ၣ်အဂီၢ်(:၅), ဒီးယွၤစံးဘၣ်ပှၤလၢ ပကဘၣ်နာ်အီၤ ဒ်ယွၤမ့ၢ်ပှၤလၢအဟ့ၣ်ပှၤ တၢ်လၢပလိၣ်တဖၣ်လီၤ (:၆). လၢတၢ်ခဲလၢာ်အံၤအပူၤ, ဖဲပပျဲယွၤလၢ ကမၤစၢၤပှၤ ဒ်သိးပကအိၣ်ဒီးတၢ်စွံကတုၤ လၢတၢ်မၤလၤကပီၤအီၤ ခီဖျိပတၢ်အိၣ်မူန့ၣ်, ပထံၣ်န့ၢ် တၢ်ဆိၣ်ဂ့ၤအမ့ၢ်အတီလီၤ (:၁၂).
