ကွဲၤထံၣ်ဟူအတၢ်ဘိးဘၣ်ဟူသါ တၢ်သးဝံၣ်အဖုၣ်မုၥ်ဆၢ တယုၢ် ဖဲ ၁၉၇၀ အနံၣ်တဖၣ်အပူၤန့ၣ် ဒုးအိၣ်ထီၣ်တၢ်သးဘၣ်ဆဲးလၢ ၦၤအစိၤတစိၤန့ၣ်လီၤ. တၢ်သးဝံၣ်တၢ်နီၢ်နီၢ် (the Real thing)အံၤ ဘၣ်တၢ်ဒုးအိၣ်ထီၣ်အီၤ ဒ် ကိၣ်ကၣ် ကိၣ်လၣ် (Coca Cola)အတၢ်ဘိးဘၣ်ဟူသါခဲၣ်ဖ့(Campaign) အက့ၢ်အဂီၤတမံၤအသိးလီၤ. လၢခံတဆီဘၣ်တဆီ, ၦၤဘြံးတံၣ်ဖိ(British)တဖုအမံၤလၢ ၦၤဃုထံၣ်တၢ်အသီ (The New Seekers) တဖၣ် သးဝံၣ်အီၤ ဒ်တၢ်သးဝံၣ်အထီလၢၦဲၤ တယုၢ်, ဒီးကဲထီၣ်နီၣ်ဂံၢ်တၢလၢတၢ်သံကျံ အမံၤအသၣ်စရီလၢ တၢ်ထုးထီၣ်အီၤ ကိးနွံဒဲး လၢ ဟီၣ်ခိၣ်ချၢန့ၣ်လီၤ. ဘၣ်ဆၣ် တၢ်သးဝံၣ်ဖုၣ်လၢ အခီၣ်ထံးကတၢၢ်တယုၢ်လၢ ကွဲၤထံၣ်ဟူအပူၤလၢ အဘၣ်တၢ်သးဝံၣ်အီၤလၢ ၦၤသူၣ်ဘီၣ်သးစၢ်တဖု ဖဲကစၢၢ်တဖျၢၣ်အဒီခိၣ်လၢ ဝ့ၢ်ရိမ့ၤအချၢန့ၢ် ၦၤအါဂၤ တမ့ၢ်ကသးပ့ၤနီၣ်အီၤဘၣ်. မ့ၢ်တၢ်သးဝံၣ်လီၤဆီ, အိၣ်ဒီး တၢ်ဆိကမိၣ်ထံၣ်မှံ ကနဲဒီးတၤသၣ်အမုၢ်တဖၣ်, ဒီးဒုးဆၢန့ၢ်ၦၤ တၢ်တမံၤဃီဒီး ၦၤကွဲးတၢ်သးဝံၣ်တဂၤ အတၢ်ဆၢသိၣ်လိဟီၣ်ခိၣ်အံၤ ဒ်သိး ကသးဝံၣ်တၢ်လၢ တၢ်အဲၣ်တၢ်ကွံ ဒီးတၢ်အိၣ်ဃူအိၣ်ဖိးလိၥ်သးအပူၤန့ၣ်လီၤ.

တၢ်မၢဖိစီၤယိၤဟၣ် ပၥ်ဖျါထီၣ် တၢ်မံမီၢ်အလၢၦဲၤ ဂ့ၤကတၢၢ်, လၢအဒိၣ် အါမးန့ၢ်အန့ၣ် တယုၢ်န့ၣ်လီၤ. အတၢ်ထံၣ်စိ မ့ၢ်ဝဲတၢ်သးဝံၣ်တယုၢ်လၢ အဘၣ်တၢ်သးဝံၣ် အီၤလၢ “ကယဲၢ်တၢ်ဘၣ်တ့အသးလၢမူခိၣ်, ဒီးလၢဟီၣ်ခိၣ်ချၢ, ဒီးလၢဟီၣ်ခိၣ်အဖီလၥ်, ဒီးလၢပီၣ်လဲၣ်အဖီခိၣ်, ဒီးကယဲၢ်တၢ်အိၣ်လၢတၢ်န့ၣ်တဖၣ်အပူၤခဲလၢၥ်” န့ၣ်လီၤ. (လီၣ်ဖျါ ၅:၁၅). တၢ်သးဝံၣ်ရိဖးဒိၣ်အံၤ တမ့ၢ်တၢ်ဆိကမိၣ်မှံဘၣ်. ကစၢ်လၢ အဘၣ် တၢ်သးဝံၣ်စံးထီၣ်ပတြၢၤအီၤတဂၤန့ၣ် ဟ့ၣ်တ့ၢ်ဝဲတၢ်အပှ့ၤနီၢ်နီၢ်လီၤ. တၢ်ထံၣ်လၢညါခီ ဘၣ်ဃးဒီး တၢ်ဒုးတၢ်ယၤ, တၢ်သံတၢ်ၦၢ်ဒီး တၢ်ပိၥ်ထွဲထီၣ်အခံလၢ ခရံၥ်အတၢ်အဲၣ် အတၢ်ဟ့ၣ်လီၤသး ဒ်သိးကမၤနၢၤတၢ်တဖၣ်အံၤအဂီၢ်န့ၣ် မ့ၢ်တၢ်လၢ အတမုၥ်တလၤ လၢအကဘၣ်မၤအသးတဖၣ်လီၤ.

မ့ၢ်နၥ်သ့လၢတၢ်အံၤအဂီၢ်, ယွၤအသိဖိ ဘၣ်တူၢ်ပတၢ်ဒဲးဘးဒီး မၤနၢၤ တၢ်သံ, မၤနၢၤ ပတၢ်ပျံၤတၢ်သံ, ဒီးသိၣ်လိမူခိၣ်ဒီးဟီၣ်ခိၣ်လၢကသးဝံၣ်တၢ်, လၢတၢ်ဃူဖိးလိၥ်သး အလၢအၦဲၤအပူၤန့ၣ်လီၤ.