တၢ်န့ၣ်, လၢလီၤသးအုးအပူၤ ကဲထီၣ်တမ့ၢ်ထဲတၢ်ကထီဒါ ၦၤဂၤအတၢ်ထံၣ်ဘၣ်, ထီဒါစ့ၢ်ကီး ၦၤလၢအိၣ်ဒီးတၢ်ထံၣ်ဒ်သိးန့ၣ် ညီနုၢ်ဝဲဒၣ်လံလီၤ. တၢ်ဒ်အံၤကဲထီၣ် တၢ်အမ့ၢ်အတီလၢတၢ်မၤလိ လံၥ်ဒိၣ်လံၥ်လဲၢ်ၦၤကရူၢ်အပူၤသ့ဝဲလီၤ. လၢတၢ်ဂ့ၢ် ဒ်သိးအံၤအဃိ, ယဖုးပျီၢ်ဘၣ်ယသး ဖဲၦၤကူၣ်ဘၣ်ကူၣ်သ့ ဒီးၦၤမၤလိ ယွၤဂ့ၢ်ပီညါ ရ့းချဲး ဘံၣ်. ဟ့(စ) (Richard B. Hays) ကွဲးတၢ်ကွဲးဖုၣ်တယုၢ်လၢ အမၢဆူၣ်ၦၤကဟံးန့ၢ်မူဒါလၢ တၢ်မၤတခါလၢ အဝဲအနီၢ်ကစၢ်ကွဲး ဖဲအပူၤကွံၥ်နံၣ်တဖၣ်န့ၣ်လီၤ. ဖဲလံၥ် “Reading with the Grain of Scripture” လံၥ်အပူၤ ဟ့(စ) ပၥ်ဖျါတၢ်ဆီၣ်လီၤသးဖးဒိၣ် ခီဖျိ အဝဲမၤလိၤမၤဘၣ်က့ၤ အနီၢ်ကစၢ် အတၢ်ဆိကမိၣ်လၢအပူၤကွံၥ်ခါလီၤ. မ့မ့ၢ်ခဲအံၤ နၢ်ပၢၢ်က့ၤ ၦၤဂၤအတၢ်ဆိကမိၣ် ခီဖျိတၢ်ဟ့ၣ်လီၤသးလၢၥ်လၢၥ်ဆ့ဆ့ လၢတၢ်မၤလိအပူၤ လၢတၢ်အိၣ်မူဒီကတီၢ်အပူၤဃိလီၤ.

ဖဲလံၥ်တၢ်ကတိၤဒိအဆၢအဆိတဖၣ်အပူၤ, စီၤပၤၡလိၤမိၤ ကွဲးရဲၣ်လီၤ ၦၤကူၣ်တၢ်သ့ အတၢ်ကတိၤအတၢ်ပၥ်ဖှိၣ်အံၤ အကလုၥ်ကလုၥ်လီၤ. ဘၣ်ဆၣ်လၢ တၢ်ကွၢ်စိတဖၣ်အပူၤ အဝဲမၤၦဲၤအါထီၣ် တၢ်တၤဒ်အံၤ, “မ်ၦၤကူၣ်တၢ်သ့ကနၣ်တက့ၢ်…” (ကတိၤ ၁:၁၅) န့ၣ်လီၤ.

ဒ်ၦၤတၢ်မၢဖိစီၤပီလူး, ၦၤလၢအစံး, ဖဲအပိၥ်ခရံၥ်အခံလၢပူၤကွံၥ်နံၣ် အဆံအါမးဒၣ်လဲၥ် အဝဲကျဲးစၢးမၤအါထီၣ် အတၢ်သ့ၣ်ညါယ့ၣ်ၡူးလီၤ (ဖံလံၤပံၤ ၃:၁၀). စီၤၡလိၤမိၤသဆၣ်ထီၣ် ၦၤကူၣ်သ့တဖၣ်လၢကဒိကနၣ်, ကမၤလိဒီး ကဒိၣ်ထီၣ် အါထီၣ်ဆူညါလီၤ.

ၦၤဘၣ်ဒိဆါလၢ အဟံးဃၥ်တၢ်သးအိၣ်ဒီး သိၣ်လိသးအဃိ တအိၣ်နီတဂၤဒံးဘၣ်. ဖဲပဃုထံၣ် ဒ်သိးပကဒိၣ်ထီၣ်ဆူညါဒီး မၤလိတၢ် ဘၣ်ဃးဒီးတၢ်စူၢ်တၢ်နၥ် ဒီးတၢ်ဘၣ်ဃးသးသမူန့ၣ် မ်ပကပျဲသးစီဆှံကစၢ် ကနဲၣ်ပကျဲ ဆူတၢ်မ့ၢ်တၢ်တီအပူၤ (ယိၤဟၣ် ၁၆:၁၃), သတး ပကနၢ်ပၢၢ်အါထီၣ် ပကစၢ်ယွၤလၢအဂ့ၤ ဒီးဒိၣ်ဝဲမုၢ်ဝဲတဂၤ အတၢ်လီၤလးတက့ၢ်.