ယလဲၤဒူၣ်ဖိထၢဖိတဒူၣ် အနံၤအိၣ်ဖျဲၣ်ဆၢတၢ်ပၥ်ဖှိၣ် ထံၣ်လိၥ်သးတခါ ဖဲဟံၣ်ကစၢ်ပၥ်ဖှိၣ်တၢ်ဂ့ၢ်မိၢ်ၦၢ်ဘၣ်ဃး “တၢ်လၢအဘၣ်ပသးတဖၣ်” ဆူတၢ်ကယၢကယဲ, တၢ်ဟ့ၣ်တဖၣ်ဒီး လၢအကျါတၢ်အဂ့ၤကတၢၢ် လၢအမ့ၢ် တၢ်အီၣ်လီၤ. မ့ၢ်လၢ နံၤအိၣ်ဖျဲၣ်ဆၢကစၢ်ပိၥ်မုၣ်ဖိန့ၣ် ဘၣ်အသးလၢ ကျီၣ်ညၣ်ဒီး တၢ်ဒိးတၢ်လၣ်ခွ့ၣ်ခွၣ်အဃိ – ဒီးခၠီးကလဲး ရဲး(စ)ဘဲၢ်ရံၣ်ကိၣ် (chocolate raspberry Bundt cake)အဃိ, ဟံၣ်ကစၢ်ကၣ်ကျီၢ်ညၣ်, မၤတၢ်ဒိးစံၢ်ဃါ ဒီးမၤလိၥ် ကိၣ်ခၠီးကလဲးလၢကျးလီၤ. တၢ်အီၣ်တဖၣ်စံး “ယအဲၣ်နၤ”လီၤ.

လံၥ်စီဆှံအပူၤ, လံၥ်တၢ်ဘၣ်ထွဲဒီးတၢ်အီၣ်စီၢ်နီၤခိၣ်, တၢ်အီၣ်အမူး, ဒီးမူးပွဲတဖၣ် ပၥ်ဖှိၣ်နီၢ်ခိအတၢ်ဟူးဂဲၤဘၣ်ဃး တၢ်အီၣ်တၢ်အီ ဒီးတၢ်ပၥ်ဖျါ ယွၤအတၢ်တီတၢ်လိၤလီၤ. တၢ်အီၣ်အမူးတဖၣ် မ့ၢ်ၦၤအံၣ်စရ့လးဖိသ့ၣ်တဖၣ် အတၢ်လုၢ်တၢ်ပၥ်ကျိၤကျဲတမံၤ စ့ၢ်ကီး (ကွၢ် ၄ မိၤ ၂၈:၁၁-၃၁), ဃုၥ်ဒီးဘူၣ်လဲၤကပၥ်, နွံတဖၣ်အတၢ်အီၣ်မူးဒီး လါထီၣ်သီအမူးလၢ ၦၤမၤကိးအလါဒဲးန့ၣ်လီၤ. ဖဲထါစံးထီၣ်ပတြၢၤ ၂၃:၅ အပူၤ ကစၢ်ယွၤကတဲၥ်ကတီၤ စီၢ်နီၤခိၣ်တဖျၢၣ်ဒီး တၢ်အီၣ်အါအါဂီၢ်ဂီၢ် ဒီးထံအီ ပုၥ်ထီၣ်ယွၤလီၤ ဒီးတၢ်သးကညီၤတၢ်အဲၣ်တဖၣ်လီၤ. တၢ်ပၥ်ဖှိၣ်မၤတၢ်အီၣ် ဒီးစပံးထံအဒိၣ်ကတၢၢ်လၢ ဘၣ်တၢ်ပၥ်ဖျါန့ၣ် ကမ့ၢ်ဝဲ ဖဲယ့ၣ်ၡူးစိၢ်ဘျဲးကိၣ် ဒီးဟံးန့ၢ်စပံးထံ, လၢအပၥ်ဖျါ တၢ်ဟ့ၣ်ဘၣ်ဃး အတၢ်ဒိးသံသးလၢ ထူၣ်လိၤ လၢပတၢ်အုၣ်က့ၤခီၣ်က့ၤအဂီၢ်လီၤ. တၢ်န့ၣ်ဝံၤ, ယ့ၣ်ၡူးဟ့ၣ်မူဟ့ၣ်ဒါၦၤလၢ “မၤတၢ်အံၤလၢ တၢ်သ့ၣ်နီၣ်ယၤအဂီၢ်” လီၤ (လူၤကၣ် ၂၂:၁၉).

ဖဲနဟံးန့ၢ်တနံၤအံၤ တၢ်အီၣ်အပူၤ ဟံးန့ၢ် တၢ်ဆၢကတီၢ်တဘျးဖိလၢ နကဆိကမိၣ်ထံ ကစၢ်ယွၤ, ၦၤလၢအတ့လီၤနကိၥ်ပူၤ ဒီးနဟၢဖၢ, ဒီးဟ့ၣ်ကလီနၤ တၢ်အီၣ်တဖၣ်န့ၣ် ဒ်ယွၤအတၢ်အဲၣ်အကျိၥ်တခါအသိးတက့ၢ်. ပတၢ်တဖၣ် မ့ၢ်ဝဲ ကစၢ်ယွၤတဂၤ, ၦၤလၢအဒုးအီၣ်ၦၤလၢ တၢ်တီတၢ်လိၤ, ပၥ်ဖှိၣ်အတၢ်ဟ့ၣ်မၤၦဲၤလၢ အလၢၦဲၤလၢ ပတၢ်လိၣ်ဖးဒိၣ်န့ၣ် စံးဝဲ “ယအဲၣ်နၤ”လီၤ.