ခၠၣ်လၣ်သ့ၣ်(Charla)ညါလီၤအသးလၢ ကသံဘူးထီၣ်လံလီၤ. လၢတၢ်ဆါဟံၣ်ဒၢးအပူၤ မံလီၤအိၣ်လၢလီၢ်မံလိၤအခါ အကသံၣ်သရၣ် ဒီးကသံၣ်ကၠိဖိတဖၣ် ဟဲနုၥ်လီၤဆူအဒၢးပူၤန့ၣ်လီၤ. လၢတၢ်အါမံးနံးအပူၤ တကနၣ်ဃုၥ်အီၤ ဒီးပၥ်ဖျါဝဲၦၤဆါတၢ်အိၣ်အသး ဆူကၠိဖိသ့ၣ်တဖၣ်အအိၣ်န့ၣ်လီၤ. အကတၢၢ်န့ၣ် ကသံၣ်သရၣ်န့ၣ် ကွၢ်ဆူအအိၣ်ဒီးသံံကွၢ်ဝဲ “နအိၣ်မၤသးဒ်လဲၣ်”န့ၣ်လီၤ. ခၠၣ်လၣ်န့ၣ် လၢတၢ်ဂံၢ်ဘါစၢ်အပူၤ နံၤကမှံဝဲ ဒီးစံးကတိၤဝဲ အတၢ်မုၢ်လၢ်ဒီး အတၢ်မုၥ် တၢ်ပၢၤလၢ ယ့ၣ်ၡူးခရံၥ်အပူၤဆူ ၦၤတဖုန့ၣ်လီၤ.

အပူၤကွံၥ်နံၣ်ခံကထိန့ၣ် ကစၢ်ယ့ၣ်ၡူးဘၣ်ဂ့ၢ်လိၥ်ဝဲ တၢ်ဒုး, အနီၢ်ကစၢ် အိၣ်ဘ့ၣ်ဆ့ဒီး ဘၣ်တၢ်ဘျးလီၤစဲၤအီၤ လၢတၢ်မဲၥ်ဆှးလၢ ထူၣ်စုညါလိၤ ဖဲကမျၢၢ် တဖၣ် ခိးကွၢ်အီၤအဆၢကတီၢ်န့ၣ်လီၤ. ကစၢ်ကတိၤအၢကတိၤဆၢ ၦၤမၤနးမၤဖှီၣ်အီၤဧါ. တစံးဝဲဒၣ်ဘၣ်. စံးဝဲဒၣ် “ပၢ်ဧၢ, ပျၢ်အတၢ်ဒဲးဘးတက့ၢ်. အဂ့ၢ်ဒ်အံၤ, မ့ၢ်အမၤဝဲဒ်လဲၣ်ဒ်လဲၣ်န့ၣ်, တသ့ၣ်ညါဘၣ်” (လူၤ ၂၃:၃၄)န့ၣ်လီၤ. ၦၤစံၣ်ညီၣ်တတီတလိၤ ဒီးၦၤတီၢ်အီၤလၢထူၣ်စုညါအလိၤသနၥ်က့ ကစၢ်ဃ့ထုကဖၣ်တၢ်လၢအဒုၣ်ဒါတဖၣ်အဂီၢ်န့ၣ်လီၤ. လၢခံ ကစၢ်ယ့ၣ်ၡူးကတိၤတၢ်ဒီး ၦၤတၢ်ဒဲးဘးဖိအဂၤတဂၤလၢ ဘၣ်တၢ်မၤမဲၥ်ဆှး အလၤကပီၤတဂၤလၢ “ယစံးဘၣ်နၤတီတီအံၤ, ခဲမုၢ်ဆါအံၤ နကအိၣ်ဒီးယၤလၢ ပၤရဒံစူးအပူၤလီၤ” (လူၤ ၂၃:၄၃) န့ၣ်လီၤ. လၢအတူၢ်ဘၣ်တၢ်နးတၢ်ဖှီၣ်ဒီး တၢ်မဲၥ်ဆှးအပူၤ ယ့ၣ်ၡူးစံးကတိၤဟ့ၣ်နီၤလီၤ တၢ်မုၢ်လၢ်ဆူၦၤအဂၤတဖၣ် အတၢ်အိၣ်မူလၢ တၢ်အဲၣ်တအိၣ်တၢ်အပူၤန့ၣ်လီၤ.

ခၠၣ်လၣ်နီၤလီၤ ခရံၥ်အဂ့ၢ်ဆူ ၦၤကနၣ်တၢ်သ့ၣ်တဖၣ်အိၣ် ဝံၤသံကွၢ်ကဒါက့ၤတၢ်ဆူ ကသံၣ်သရၣ်အိၣ်န့ၣ်လီၤ. အဝဲကွၢ်ထံဝဲဒၣ် ကသံၣ်သရၣ် လၢအမဲၥ်ချံၦဲၤဒီး မဲၥ်ထံမဲၥ်နိအပူၤ ဒီးသံကွၢ်ဝဲ “နအိၣ်မၤသးဒ်လဲၣ်”န့ၣ်လီၤ. ခီဖျိ ကစၢ်ခရံၥ်အတၢ်သူၣ် ကညီၤသးကညီၤ ဒီးအစိကမီၤအဃိ ခၠၣ်လၣ်ဟ့ၣ်ခီဟ့ၣ်နီၤသးသမူအတၢ်စံးကတိၤလၢ ပၥ်ဖျါထီၣ် တၢ်အဲၣ်ဒီးတၢ်သးအိၣ်ဆူ ကသံၣ်သရၣ်ဒီး ၦၤမၤလိတၢ်ဖိတဖၣ် လၢအအိၣ်လၢဒၢးပူၤန့ၣ်လီၤ. ကယဲၢ်တၢ်မၤအသးတဖၣ် လၢမုၢ်မဆါတနံၤမ့ၢ်ဂ့ၤ မုၢ်နံၤခါဆူညါလၢ ကဟဲတဖၣ် ပကဂုၥ်ကျဲးစၢးနၥ်ကစၢ်ယွၤ, ကဟ့ၣ်ၦၤတၢ်သူၣ်ဒုသးဒုဒီး တၢ်အဲၣ်တၢ်ကွံအပူၤလၢ ပကစံးကတိၤသးသမူ အတၢ်စံးကတိၤတၢ်န့ၣ်တက့ၢ်.