တၢ်ကိၢ်လီၤဆီအထါအမံၤ လၢ ‘လါမ့ၤ’န့ၣ် အိးထီၣ်ဝဲဒၣ်လံၥ်ကျိၤ “ကလံၤနီၣ်တပိၥ်အဖီတဖၣ်” အံၤ ပၥ်ဖျါဝဲ ၦၤကွဲးထါ စၢ်ရၤထံး(စ)ဒ့ (Sara Teasdale) ထုးန့ၢ်ဝဲ အတၢ်ထံၣ်စိနီၣ်တပိၥ်ဖီဖိတဖၣ် ဟူးဝး ဖဲကလံၤကသွံဒံဖိ ဟဲအူသကုၤကလၥ် အခါန့ၣ်လီၤ. ဖဲအံၤ ထံး(စ)ဒ့ ဘၣ်မိၣ်ဘၣ်မး လၢအတၢ်အဲၣ်လီၤမၢ်အဃိ ဒီးအထါဖိဖျါဝဲဒၣ်လၢ တၢ်သူၣ်အုးသးအုးထါ န့ၣ်လီၤ.
ယဟံၣ်လီၢ်ခံနီၣ်တပိၥ်ဖီဖိတဖၣ်စ့ၢ်ကီး ဘၣ်ကွၢ်ဆၢၣ်မဲၥ်ဒီး တၢ်တၤသ့ၣ်တဖၣ်န့ၣ်လီၤ. ဖီဖိတဖၣ် ဖီထီၣ်ဖးထီၣ်အါအါဂီၢ်ဂီၢ် ဃံဃံလၤလၤ အဆၢကတီၢ်ဝံၤအလီၢ်ခံ အဝဲသ့ၣ်ဘၣ်တၢ်ကျီသံကွံၥ်အီၤခဲလၢၥ် ဘၣ်တၢ်မၤလီၤကလဲအီၤန့ၣ်လီၤ. တၢ်မၤအသးဒ်န့ၣ်ဒီး ယဟီၣ်ဘၣ်ယဲလီၤ. သၢနံၣ်ပူၤကွံၥ်ဒီး နီၣ်တပိၥ်အဒ့ဃ့ထီတဖၣ် ပစးထီၣ်ထံၣ်ဘၣ် ကုၤအဝါဖိတဖၣ် မဲထီၣ်ဝဲလီၤ. လၢတၢ်နၥ်ကအိၣ်တၢ်အပူၤ ယရဲၣ်ကျဲၤခူၣ်ထုးကွံၥ်အီၤတဖၣ်န့ၣ် ဟဲက့ၤမဲထီၣ်က့ၤဝဲဒၣ်န့ၣ်လီၤ.
လံၥ်စီဆှံပၥ်ဖျါဝဲလၢ ၦၤတနီၤ ဘၣ်အိၣ်ခိးဆိးသီဝဲဒၣ်လၢတၢ်နၥ်အပူၤ ဖဲဘၣ် လဲၤခီဖျိတၢ်ကီတၢ်ခဲ အဆၢကတီၢ်ဒၣ်လဲၥ် န့ၣ်လီၤ. မ့ၢ်လၢမူခိၣ်စူၤ စဲၤခံအဃိ စီၤနိအၤဘၣ်ခိးဝဲဒၣ်န့ၣ်လီၤ. စီၤကၤလ့း ဘၣ်အိၣ်ခိးဝဲအနံၣ် ၄၀ ဒ်သိးကအိၣ်ဆိးဘၣ်ဝဲလၢ ကီၢ်တၢ်စံးပၥ်အပူၤန့ၣ်လီၤ. နီၢ်ရံးဘကၤ ဘၣ်အိၣ်ခိးဝဲ အနံၣ် ၂၀ ဒ်သိးကဒၢထီၣ်အဖိအဂီၢ်န့ၣ်လီၤ. စီၤယၤကိၥ်ဘၣ်အိၣ်ခိးဝဲ ၇ နံၣ်လၢ ကမၤန့ၢ်နီၢ်ရၤဃ့လးန့ၣ်လီၤ. စီၤစူၤမ့းအိၣ် ဘၣ်ခိးဝဲဒၣ် လၢကထံၣ်ဘၣ် ဖိသၣ်ယ့ၣ်ၡူးအဂီၢ်န့ၣ်လီၤ. အဝဲသ့ၣ် အတၢ်သူၣ်စူၤသးစူၤတၢ်န့ၣ် ဘၣ်တၢ်မၤလၤကပီၤအဝဲသ့ၣ်လီၤ.
တၢ်လၢအထီဒါလိၥ်သးဒီး တၢ်ပၥ်ဖျါထးတဖၣ်န့ၣ် အကွၢ်ဃီၤမုၢ်လၢ်တၢ်လၢ ၦၤကညီတဖၣ်န့ၣ် “ကမၤသး ဒ်ပထိးသ့ၣ်စၢ်ရၢ်လၢ ၦၢ်မုၢ်ကနၢအသိး” န့ၣ်လီၤ (ယံး ၁၇:၆). ၦၤကွဲးထါ ထ့း(စ)ဒ့ မၤကတၢၢ်အထါဖိ “ယတၢ်အိၣ်မူ လဲၤတၢ်ဒ်တၢ်ဂိၢ်ခါ အဆၢကတီၢ်အသိး” မ့ၢ်တၢ်ပၥ်ဖျါလၢသူၣ်ဟးဂူၥ်သးဟးဂီၤအပူၤန့ၣ်လီၤ. ဘၣ်ဆၣ် “ၦၤလၢအသန့ၤအသးလၢယွၤ လၢအတၢ်သန့ၤအလီၢ်မ့ၢ်ယွၤန့ၣ် ဘၣ်ဆိၣ်ဂ့ၤဝဲလီၤ. ကမၤသး ဒ်သ့ၣ်သူၣ်လီၤအသးလၢထံနံၤ”န့ၣ်လီၤ (:၇-၈). ပတၢ်နၥ်မ့ၢ်အိၣ်သူၣ်လီၤအသးလၢကစၢ်ယွၤ မ့ၢ်ယွၤလၢအလဲၤတၢ်ဒီးၦၤ ဖဲပတၢ်အိၣ်မူဘၣ်မုၥ်ဂ့ၤ ဘၣ်ဖှီၣ်ဂ့ၤအပူၤန့ၣ်လီၤ.
