သုးခိၣ်ကျၢၤ ခၠါ(လ) ကီဒၢၣ်(General Charles Gordon) (၁၈၃၃-၁၈၈၅) မၤတၢ်လၢနီၢ်ပၤမုၣ် ဘံၣ်ထိရံယၤ(Queen Victoria)အဂီၢ် လၢ ကီၢ်တရူး ဒီးတၢ်လီၢ်အဂၤန့ၣ်လီၤ. ဘၣ်ဆၣ် ဖဲအအိၣ်ဝဲဆိးဝဲ လၢကီၢ်အဲကလံးအခါ အဝဲဟ့ၣ်လီၤကွံၥ် အတၢ်ဟဲနုၥ်မျးကယၤ ၉၀ န့ၣ်လီၤ. ဖဲအဝဲနၢ်ဟူဘၣ် တၢ်သၣ်ဝံၤလီၤဒိအိၣ်ဖဲ လဲ(န)ကၢး(စ)ၡဲယၤ(Lancashire)ဟီၣ်ကဝီၤအခါ, အဝဲကွးထုးထီၣ်ကွံၥ် လံၥ်မဲၥ်ဖျၢၣ်တဖၣ် လၢတၢ်ဂဲၤဃၥ်အီၤလၢ တၢ်မၤလၤကပီၤ ပနီၣ်ထူစီကဘျၣ် လၢအဒိးန့ၣ်ဘၣ်ဝဲ လၢဟီၣ်ခိၣ်ဒီဘ့ၣ် ခိၣ်နၢ်တဂၤအအိၣ်, ဒီးဆှၢလီၤဆူ ကလံၤစိးဒီး တဲဘၣ် လၢအဝဲသ့ၣ် ကြၢးမၤၦံၢ်လီၤအီၤ ဒီးသူတိၢ်စ့လၢ ကပှ့ၤကိၣ်လၢ ၦၤဖှီၣ်ဖိယၥ်ဖိတဖၣ်အဂီၢ်လီၤ. အနံၤအဝဲန့ၣ်, အဝဲကွဲးလီၤဝဲလၢ အလံၥ်ကွဲးနီၣ် တနံၤဘၣ်တနံၤအပူၤ ဒ်အံၤ “ဟီၣ်ခိၣ်အတၢ်ဖိတၢ်လံၤ လၢခံကတၢၢ် လၢအအိၣ်ဒီးယၤလၢဟီၣ်ခိၣ်အံၤ, လၢယပၥ်လုၢ်ပၥ်ပှ့ၤအီၤန့ၣ်, ယဟ့ၣ်လီၤလံဆူ ကစၢ်ယ့ၣ်ၡူး အအိၣ်လံ” န့ၣ်လီၤ.

သုးခိၣ်ကျၢၢ် ကီဒၢၣ် အတၢ်သးအိၣ်သးညီအတီၤန့ၣ် ကဖျါဒ်အအိၣ်ထီၣ်ထီန့ၢ်ဒီး, တလၢကွံၥ် တၢ်လၢပယူာ်ဃီၤသ့တက့ၢ်န့ၣ်လီၤ. ဘၣ်ဆၣ်ဒီး, ထီဘိယွၤကိးအၦၤဂီၢ်မုၢ် လၢကကွၢ်ၦၤလၢအအိၣ်လၢ တၢ်တလၢတလီၣ်အပူၤတဖၣ်အဂီၢ်လီၤ. လၢတၢ်သိၣ် တၢ်သီတနီၤ လၢအဟ့ၣ်လီၤဝဲ ခီဖျိစီၤမိၤရှ့အပူၤ, ယွၤမၤလိၥ်အၦၤဂီၢ်မုၢ်လၢအတဘၣ် ကူးတၢ်တုၤစံၥ်ပျီအကနူၤတဖၣ်ဘၣ်. တဘၣ်ထၢဖှိၣ်ဘုဟု, သ့ၣ်သူဝၣ်သၣ်တဖၣ် ခဲလၢၥ်ဘၣ်. မ့မ့ၢ်, ဖဲအထၢဖှိၣ်တၢ်လၢစပံးလီၢ်အပူၤအခါ, အဝဲသ့ၣ်ကဘၣ်ပၥ်တ့ၢ် စပံးသၣ်လၢ အလီၤတဲၥ်တဖၣ် “လၢၦၤဖှီၣ်ဖိယၥ်ဖိ, ဒီးၦၤတခီဘီမုၢ်ဖိအဂီၢ်” (၃ မိၤ ၁၉:၁၀)န့ၣ်လီၤ. ယွၤအဲၣ်ဒိးလၢအၦၤဂီၢ်မုၢ်တဖၣ် ကပၥ်သူၣ်ပၥ်သးဒီးဟ့ၣ်မၤစၢၤ ၦၤဂံၢ်စၢ်ဘါစၢ်တဖၣ် လၢအအိၣ်လၢအသိးအကျါအဂီၢ်လီၤ.

ပမ့ၢ်သးကလၢၢ်ဘၣ်လၢ ပဟ့ၣ်တၢ်ညီထဲလဲၣ်ဂ့ၤထဲလဲၣ်ဂ့ၤ, ပဃ့ယွၤ ဒ်သိး ကမၤအါထီၣ် ပတၢ်ဆၢဟ့ၣ်ၦၤဂၤ ဒီးကဃုအတၢ်ကူၣ်သ့ ဒ်သိးပကသ့ ဒုးအိၣ်ထီၣ် ကျဲတဖၣ် လၢကဟ့ၣ်တၢ်အဂီၢ်သ့ဝဲန့ၣ်လီၤ. ယွၤအဲၣ်ဒိးမၤစၢၤၦၤဒ်သိး ပကဒုးနဲၣ် အတၢ်အဲၣ်ဆူ ၦၤဂၤအအိၣ်အဂီၢ်လီၤ.