ယတၢ်လဲၤတစိၢ်ဆူ စဲမၢၣ်(Simon)အဟံၣ်န့ၣ် ယသးပ့ၤနီၣ်တန့ၢ်ဘၣ်. လၢကီၢ်ခဲညၣ်(Kenya)အဝ့ၢ် ညၣ်ဟူရူၢ်ရူၢ် (Nyahururu)အမူခိၣ်လၢအၦဲၤဒီးဆၣ်ဧိၤဖိဧိၤတဖၣ်အဖီလၥ်, ပလဲၤသကိးဆူအဟံၣ် လၢဟါတၢ်အီၣ်အဂီၢ်လီၤ. အဟံၣ်ဒါအိၣ်ထဲဖၣ်ကမုၣ် ဒီးမ့ၣ်အူဒၢစိၥ်စု အတၢ်ကပီၤန့ၣ် ပၥ်ဖျါထီၣ် စဲမၢၣ်အတၢ်ဟဲနုၥ်လၢ အတအါကဲၥ်ဆိးဘၣ်န့ၣ်လီၤ. တၢ်အီၣ်တၢ်အီတဖၣ် မ့ၢ်မနုၤလဲၣ်န့ၣ် ယတသ့ၣ်နီၣ်ထီၣ်က့ၤလၢၤဘၣ်. တၢ်လၢယသးပ့ၤနီၣ် တန့ၢ်ဘၣ်တမံၤန့ၣ် မ့ၢ်စဲမၢၣ် အတၢ်သူၣ်ဖှံသးညီလၢ ပမ့ၢ်အၦၤတမှံၤတဖၣ် အဃိ န့ၣ်လီၤ. အဝဲအတၢ်တူၢ်လိၥ်မုၥ်ၦၤလၢအၦဲၤဒီး တၢ်အဲၣ်, တၢ်သးအိၣ်န့ၣ် လီၤဂၥ်ဒ် ကစၢ်ယ့ၣ်ၡူးအသိး, ဆိကမိၣ်ဝဲထဲလၢ ၦၤဂၤအဂီၢ်, ထိးဘၣ်ပတၢ်အိၣ်မူ, ဒီးမၤဖှံထီၣ်က့ၤပသးန့ၣ်လီၤ.

ဖဲ ၁ ကရံၣ်သူး ၁၆:၁၅-၁၈ န့ၣ်, စီၤပီလူးယၢၤထီၣ်ဝဲ ဟံၣ်ဖီဃီဖိတဒူၣ်လၢအမ့ၢ် စီၤစတ့းဖနၣ်အၦၤ ဟံၣ်ဖိတဖၣ်(:၁၅), လၢၦၤသ့ၣ်ညါအီၤအါ မ့ၢ်လၢအဝဲသ့ၣ် အတၢ်သးအိၣ်တူၢ်လိၥ်မုၥ်တၢ်အဃိန့ၣ်လီၤ. အဝဲသ့ၣ် “ဟ့ၣ်လီၤအသးလၢ တၢ်မၤစၢၤ ၦၤစီဆှံတဖၣ်” (:၁၅)န့ၣ်လီၤ. အတၢ်မၤစၢၤန့ၣ် ကမ့ၢ်တၢ်လၢပထံၣ်ဒီးကလၢၢ်ဘၣ်သ့ဒီး ထိးဘၣ်စ့ၢ်ကီးၦၤသူၣ်ၦၤသးတုၤဒၣ်လဲၥ် စီၤပီလူးကွဲးဝဲ “အဝဲသ့ၣ် မၤဖှံထီၣ်က့ၤယသး, ဒ်အမၤဖှံထီၣ်က့ၤသုသး အသိးန့ၣ်လီၤ” (:၁၈).

ဖဲပအိၣ်ဒီး တၢ်ခွဲးတၢ်ယၥ်လၢ ပကနီၤဟ့ၣ်တၢ်ဒီးၦၤဂၤအခါ, ပသးစၢၢ်ဆၢလၢ တၢ်အီၣ်တၢ်အီ, တၢ်လီၢ်တၢ်ကျဲ, ဒီးတၢ်အဂုၤအဂၤလၢအကြၢးဒီး တၢ်မၤသးအကတီၢ် ဒ်သိးအံၤတဖၣ်အဂီၢ်လီၤ. ဘၣ်ဆၣ် တဘျီဘျီ ပသးပ့ၤနီၣ်လၢ “တၢ်ဖိတၢ်လံၤ” ဒီး “တၢ်လီၢ်တၢ်ကျဲ”န့ၣ် အကါဒိၣ်ဒၣ်ကယၢာ်, အဝဲသ့ၣ်တမ့ၢ်တၢ် အကါဒိၣ်ကတၢၢ်တဖၣ်ဘၣ်န့ၣ်လီၤ. တၢ်အီၣ်တဖၣ်လၢအလီၤသ့ၣ်နီၣ်ထီၣ်က့ၤန့ၣ် ဂ့ၤဒိၣ်မးလီၤ. တၢ်လီၢ်တၢ်ကျဲ, တၢ်ဆီလီၤပၥ်လီၤလၢအမုၥ်စ့ၢ်ကီး အလီၢ် အိၣ်ဝဲလီၤ. ဘၣ်ဆၣ်ဒီး, တၢ်အီၣ်တၢ်အီန့ၣ် အိၣ်ဒီးတၢ်အဆၢလၢ အကကဲဂံၢ်ကဲဘါ ဒီးဟ့ၣ်ဂံၢ်ဟ့ၣ်ဘါ လၢလၢၦဲၤၦဲၤ အဂီၢ်လီၤ. တၢ်မၤဖှံ, မၤသီထီၣ်က့ၤတၢ်နီၢ်နီၢ်န့ၣ်, ဟဲယွၤလီၤဝဲဒၣ်လၢ ကစၢ်ယွၤအအိၣ်ဒီးမ့ၢ်တၢ်လၢအဘၣ်ဃး ဒီးပသူၣ်ပသး န့ၣ်လီၤ. အဝဲဒၣ်တုၤဃီၤဆူ ၦၤဂၤအသးကံၢ်ပူၤ, ဒီးဟ့ၣ်ဂံၢ်ဟ့ၣ်ဘါ အဝဲသ့ၣ်ဆူညါဒံး ဖဲအအီၣ် တၢ်အီတၢ်ဝံၤ အလီၢ်ခံဖးယံာ်န့ၣ်လီၤ.