ဖဲ ၂၀၂၀ နံၣ် လါအီကူးအပူၤ, ၦၤအိၣ်ဆိးတၢ်တဖၣ်လၢဝ့ၢ်အီ(လ)တၢၢ်(Olten), လၢကီၢ်စဝ့းစၣ်လဲၣ်(Switzerland)န့ၣ် ဖုးသံပျီၢ်သံ ဖဲခၠီးကလဲးသဖှံၣ်တဖၣ် ဟဲလီၤဝဲအခါလီၤ. ဖဲတၢ်ထုးထီၣ် ခၠီးကလဲးတၢ်မၤလီၢ်န့ၣ်, ပိးလီလၢ အမၤဆှံဒၢး အကလံၤ တမၤတၢ်ဘၣ်ဘျီးဘၣ်ဒါ အဃိ, ခၠီးကလဲးကမှံဒံဖိတဖၣ် ပြါသကုၤဆူ ကလံၤကျါန့ၣ်လီၤ. လၢတၢ်န့ၣ်အဃိ, ခၠီးကလဲးအကဘျံးဘူသလါလၢၦၤအီၣ်သ့တဖၣ် ပဲဘၢအသးလၢသိလ့ၣ်ဒီးကျဲတဖၣ်အလိၤ, ဒီးဝ့ၢ်ဒီတဝ့ၢ်ညါ နၢမူ ဒ်တၢ်ဆၢကိၣ် အကျးအသိးန့ၣ်လီၤ.

ဖဲယဆိကမိၣ်ထီၣ် တၢ်အီၣ်အဝံၣ်အဘဲလၢ အဟဲလီၤဝဲလီၤလိၥ်လီၤလး လၢမူခိၣ်အဂ့ၢ်န့ၣ်, ယတဆိကမိၣ်ဘၣ် ယွၤအတၢ်လုၢ်အီၣ်လုၢ်အီ ၦၤအံၣ်စရ့လးဖိ တဖၣ် လၢ ၂ မိၤရှ့အပူၤအဂ့ၢ်န့ၣ်, ယအိၣ်တသ့ဘၣ်. အဝဲသ့ၣ် အတၢ်ဟးထီၣ်ကွံၥ် လီၤလိၣ်လီၤလးလၢ ကီၢ်အဲၣ်ကူပတူးဝံၤအလီၢ်ခံ, ၦၤဂီၢ်မုၢ်တဖၣ် ဘၣ်ကွၢ်ဆၢၣ်မဲၥ် ဒီး တၢ်တၤဖးဒိၣ်တဖၣ် လၢၦၢ်မုၢ်ကနၢအပူၤယ လီၤဆီဒၣ်တၢ် တၢ်အီၣ်တၢ်အီ ဒီးထံနိ အတၢ်တလၢတလီၢ်န့ၣ်လီၤ. အဝဲသ့ၣ် အတၢ်ကီတၢ်ခဲဖးဒိၣ်န့ၣ် ထိးဘၣ်ယွၤအသး, ဒီးယွၤအၢၣ်လီၤဝဲလၢ “ကဒုးဟဲစူၤကိၣ်လၢမူခိၣ်”(၂ မိၤ ၁၆:၄)န့ၣ်လီၤ. လၢခံတဂီၤ, တၢ်အကဘျၣ်ဘူဖိတဖၣ် အိၣ်ၦဲၤဝဲလၢၦၤမုၢ်ကနၢအဟီၣ်ခိၣ်လိၤန့ၣ်လီၤ. တၢ်လုၢ်အီၣ်ကိးနံၤဒဲးအံၤ, လၢတၢ်သ့ၣ်ညါအီၤ ဒ်ကိၣ်မၤနၤန့ၣ် ဟဲလီၤဝဲ အနံၣ် ၄၀ န့ၣ်လီၤ.
ကစၢ်ယ့ၣ်ၡူးဟဲဆူဟီၣ်ခိၣ်ချၢအခါ, ၦၤစးထီၣ်နၥ် ဒ်အဘၣ် တၢ်ဆှၢအီၤလၢ ယွၤဖဲအဝဲဒုးအီၣ်ၦၤဂီၢ်မုၢ် တဖၣ်လၢကိၣ်, လီၤလိၣ်လီၤလးအခါန့ၣ်လီၤ (ယိၤ ၆:၅-၁၄). ဘၣ်ဆၣ် ကစၢ်ယ့ၣ်ၡူးသိၣ်လိဝဲလၢ အဝဲအနီၢ်ကစၢ်ဒၣ်ဝဲန့ၣ် မ့ၢ်“ကိၣ်မူ” (:၃၅), ဒီးဘၣ်တၢ်ဆှၢလီၤအီၤ ဒ်သိးအကဟဲစိၥ် တမ့ၢ်ထဲ တၢ်အီၣ်န့ၢ်ဂံၢ်န့ၢ်ဘါတစိၢ် တလီၢ်ဧိၤဘၣ်, မ့မ့ၢ် တၢ်မူ အထူအယိာ်န့ၣ်လီၤ(:၅၁).

ပဝဲလၢအသၣ်ဝံၤ နီၢ်သးအဂံၢ်အဘါအဂီၢ်န့ၣ်, ကစၢ်ယ့ၣ်ၡူးဟ့ၣ်ဃီၤဝဲ တၢ်မူဒီးယွၤ လၢအတကတၢၢ်ဘၣ်န့ၣ်လီၤ. မ်ပစူၢ်နၥ်လၢအဝဲဟဲဝဲ ဒ်သိးကမၤမုၥ်မၤမံ တၢ်ဆၢမိၣ်န့ၣ် အယိာ်ကတၢၢ်တဖၣ်တက့ၢ်.